Hatutan.com, (25 Jullu 2024), Díli- Primeiru-Ministru (PM), Kay Rala Xanana Gusmão hateten, komemorasaun tinan XXV loron konsulta Populár,  30 Agostu 1999-2024, sei halo iha Munisípiu to’o Postu-Administrativu sira iha territóriu nasionál atu valoriza sakrifísiu no determinasaun ne’ebé ferik-katuas no inan-aman sira halo hodi Timor-Leste hetan nia independénsia.

Lee Mós: SekJer ONU ho Xefe UNAMET Partisipa Selebrasaun Tinan XXV Konsulta Populár

PR José Ramos-Horta ho PM Xanana Gusmão. Foto/Elio dos Santos da Costa

Primeiru-Ministru Kay Rala Xanana Gusmão ba jornalista sira iha Palásiu Prezidensiál, Kinta (25/07/2024), informa ona ba Prezidente Repúblika katak governu sei prepara hela atu membru governu hotu-hotu sei ba too munisípiu hotu no postu-administrativu hotu atu selebra tinan XXV loron konsulta Populár tamba ne’e festa povu nian.

Nia afirma liután katak hanesan bain-bain dehan katak povu mak manan ukun rasik an, ho nia terus no nia mate, la’ós de’it iha tinan 24 nia laran, maibé iha dunik momentu ne’ebá (30 Agostu 1999) mak povu deside katak Timoroan hakarak ukun rasik an liu husi votu ida.

“Ita haratak atu selebrasaun loron konsulta Populár 30  Agostu ne’e foin-sa’e hotu bele komprende terus, sakrifísiu no determinasaun imi nia inan-aman sira nian hodi ohin loron ita bele moris iha ukun an nia laran,” Xanana hateten.

Xefe Governu ne’e hatutan 30 Agostu la’ós festa UNAMET nian, maibé festa povu nian, tamba ne’e Governu sei aprezenta didi’ak programa oinsá atu selebrasaun ne’e ba too dunik ferik no katuas sira.

Prezidente Repúblika José Ramos-Horta konkorda ho desizaun Governu nian atu selebrasaun loron konsulta Populár ne’e sai dunik festa ida ba povu no lori ba too ferik no katuas sira hodi valoriza sira nia sakrifísiu no determinasaun ba Timor-Leste nia independénsia.

“Primeiru-Ministru nia pozisaun ne’ebé ha’u tane no aseita, mak 30  Agostu ne’e povu nian tamba povu mak ba vota no ho povu nia votu mak ita hetan ita nia independénsia tamba ne’e nia lakoi selebrasaun loron konsulta Populár labele iha Dili d’eit, tenke ba mós iha foho tamba sira iha foho partisipa iha luta, partisipa iha vota,” Prezidente Repúblika José Ramos-Horta hateten.

Nia subliña mós katak ba membru UNTAET no ONU sira ne’ebé hakarak mai sira ida-idak mós sei bele iha posibilidade ba to’o iha munisípiu fatin sira ne’ebé uluk sira halo monitorizasaun ba eleisaun 30  Agostu 1999.

Jornalista: Vito Salvadór