Hatutan.com, (25 Jullu 2024), Díli—Iha Kuarta loraik (24/07/2024), pasiente ho família pasiente sira ne’ebé hala’o tratamentu iha Ospitál Nasionál Guido Valadares (HNGV)  enfrenta difikuldade asesu ba bee. Ho nune’e, iha família pasiente balu tenke lori bee husi uma ka lori jerigen bá kuru fali iha fatin sira ne’ebé bele fornese bee gratuita.

Lee Mós: Forensik HNGV Rejista Kazu Omisídiu ho Suisídiu ho Númeru Aas iha Timor-Leste

Ekipa tékniku HNGV halo hela manutensaun bá makina prdus bee iha HNGV ne’ebé avaria. Foto/Tome da Silva

Informasaun ne’ebé hato’o husi Diretóra Servisu Admistração no Finanseira no Lojistika Ospitál Nasionál Guido Valadares (HNGV), Sara Maria Filomena Xavier,  katak iha loron ne’ebá, hale’u tuku 14:00 Otl, bee  iha HNGV maran mákin fornesimentu bee avaria.

HNGV iha makina bomba bee rua; ida ho kapasidade 9000l bá produsaun bee kada oras  no ida tan mak bomba bee ho volume kiik no ida ne’ebé bele fornese bee  ho kapasidade boot ne’e mak avaria tanba sirkuitu iha liña fornesimentu eletrisidade.

Bá jornalista sira iha HNGV, Kinta (25/07/2024),  Sara Maria Filomena Xavier  informa bainhira  mákina bomba bee ho kapasidade boot ne’e prejudika bee sae ba enxe iha tanke atu bele fornese tuun fali mai HNGV laran.

Esforsu ne’ebe ekipa kontinua halo mak  utiliza makina ne’ebe ho kapasidade kiik 5,5 kwh hodi produz bee no fornese bá enfermaria laran tomak maske ho volume ne’ebe kiik.

Kona-bá foto ne’ebe viral iha media sosial katak familia pasiente lori rasik bee husi liur, diretóra Sara  Maria Xavier rekoñese katak ne’e loos duni tanba bee konsege para durante oras rua (2) tanba iha prosesu ligasaun foun, nune’e tanba nesesidade urjenti família pasiente sira obrigadu tenke buka  lai alternativu seluk.

HNGV mós kontakta kompañia Iramor nune’e bele fornese ba makina  fase-ran nian, nune’e bele fasilita tratamentu bá pasiente fase-ran la’o normal.

Esforsu seluk tan ne’ebe mak HNGV kontinua halo mak koordena ho kompañia ESTARTEC ENTERPRISE ne’ebe durante ne’e halo manutensaun bá makina fura bee iha HNGV bainhira makina hirak ne’e avaria.

Tékniku sira halo manutensaun bá mákina bomba bee iha HNGV. Foto/Tome da Silva

Kompañia kompañia ESTARTEC ENTERPRISE hamutuk ho xefe lojístik HNGV no mós xefe enjenãria HNGV  esforsu hodi hadia makína motor ne’ebe mak fura bee ba HNGV durante ne’e no HNGV  nafatin husu apoiu husi Bombeiros Timor-Leste hodi fornese bee ba tanke HNGV nian ne’ebe disponivel.

Ekipa garantia katak ohin loron ekipa HNGV hamutuk ho HNGV sei finaliza prosesu instalasaun makína motor ba fura bee nian ho kapasidade 4 inch 7,5 kwh ne’ebe bele produz bee 11.000 litru kada oras.

Diretór ESTARTEC ENTERPRISE, Kim Tchia deklara katak  hahú ohin kompañia halo instalasaun bá mákina motor foun no garantia katak to’o loraik bele fornese bee la’o normal hanesan bain-bain.

Tuir informasaun makína motor fura bee nian ho kapasidade 4 inch no 7,5 Kwh  ne’e kompañia sosa husi Estadus Unidus Amérika (EUA).

Jornalista: Leopoldina de Carvalho