Hatutan.com, (02 Agostu 2024), Díli -Asidente karreta Estadu ho númeru matrikula  03.430G ne’ebé soke iha Domingu (21/07/2024), hale’u tuku 2:00 madrugada, iha área Kakaulidun, Suku Bairru Píte, Postu Administrativu Dom Aleixo, Munisípiu Díli nia prosesu  to’o agora la’o hela iha ministériu relevante.

Lee Mós: CAC Halibur Hela Informasaun Kona-bá Karreta Estadu Hetan Asidente iha Loron La’ós Servisu Nian

Kerreta Estadu hetan dezastre iha Domingu (21/07/2024), hale;u tuku 02:00 madrigada. Foto/Leopoldina de Carvalho

“Relasiona ho Insidente Karreta Estadu ne’ebé hetan asidente iha Domingu liubá ne’e nia prosesu agora la’o hela. Patrimóniu Estadu nia  ekipa identifika ona, nune’e haruka ona karta notifikasaun ba ministériu relevante no ministériu relevante mós halo kedas asaun bazeia ba ministériu ninia guia hamutuk ho Komisaun Anti-Korrupsaun (CAC) halo ona investigasaun ba utilizadór ne’e. Tuir ami nia notifikasaun ne’e katak ministériu refere mak tenke halo inspesaun tuir prosesu legal,” Diretora Jerál interina Diresaun Jerál Jestaun Patrimóniu Estadu, Timotea P. Marquez hateten ba Hatutan.com iha nia servisu fatin, Balide, Díli, Sesta (02/08/2024).

Tuir nia, insidente ne’e presiza atu investiga ho didi’ak atu bele hatene utilizadór  atu ba ne’ebé no nia objetivu saida atu nune’e haree aktu sira ne’e tanba ne’e  nia prosesu ne’e agora la’o depois mak haree nia relatóriu ne’e komete saida.

Nia hateten, bainhira relatóriu mai mak ekipa foin bele análize hodi haree nia prosesu ne’e sivíl ka oinsá tanba ne’e karreta refere nia paradeiru agora daudauk iha hela ministériu relevante nia fatin.

Lee Mós: Karreta Estadu ho Númeru Matrikula 03.430G Hetan Dezastre no Hetan Serveja Dos Rohan iha Laran

Jornalista Estajiáriu: Lazaro Pereira Quefi