Hatutan.com, (27 Jullu 2024), Díli-Policia Ciêntífica e de Investigação Criminal (PCIC), Sesta (26/07/2024), asegura tan objetu krime osan montante rihun $150 husi sidadaun Indonézia nian na’in-rua ho inisial SPD no MU.

Lee Mós: PCIC Detein Sidadaun Nigeria Na’in-rua ho Objetu Krime Osan Millaun $3

Objetu krime osan rihun $150 ne’ebé PCIC asegura husi WNI na’in-rua, Sesta (26/07/2027). Foto/Elio dos Santos da Costa

WNI (Warga Negra Indonesia) ka sidadaun ho nasionalidade Indonézia nian na’in-rua ne’e, PCIC katura iha Sesta loraik iha área jurisdisaun Munisípiu Díli deskonfia envolve iha rede ida de’it hamutuk Nigerianu na’in-rua (2) ne’ebé PCIC detein antes ona.

Portavós PCIC, Mário Tavares informa katak, atividade operasasaun sira sei la’o nafatin, no ohin, dala-ida tán, ho servisu sira kooperasaun  ho entidade sira hothotu iha área seguransa nian, no mós iha área PCIC hamutuk ho servisu informasaun nian sira hotu mak prende tán osan ho montante rihun $150.

“Ita konsege rekolla ka halo tán apreensaun bá osan ho totál rihun $150, ne’ebé mak mai hosi fundu ida hanesan mós suspeitu Nigerianu nian na’in-rua ne’ebé hacker osan millaun $3,” Mário Tavares informa bá Jornalista sira liuhosi konferénsia imprénsa iha kna’ar-fatin, PCIC.

Sidadaun sira ne’e, kategoria bá iha krime trans-nasionál nian, entaun, sidadaun ida ne’e mai hosi nasaun estranjeiru, la’os Timoroan.

Investigadór PCIC nian ne’e prezume katak, tanba sidadaun ne’e halo parte mós bá iha organizasaun refere, maka sei aprezenta hotu sira bá iha autoridade kompetente hodi tuir prosesu legál ne’ebé mak Timor-Leste iha.

Sidadaun ho nasionalidade Nigeria na’in-rua ho inisial VD no USN ne’ebé PCIC detein uluk iha loron 25 fulan-Jullu ne’e, kompleta ona oras 72 iha sela detensaun, no Sábadu ne’e sei submete bá Primeiru Interrogatóriu Judisial iha Tribunál Judisial Primeira Instánsia Dili (TJPID).

Jornalista: Rogério Pereira Cárceres