Hatutan.com, (31 Jullu 2024), Díli—Ajénsia Kooperasaun Internasionál Japaun (JICA, sigla Inglés), sei fo tán osan bá Timor-Leste (TL) ho valór millaun $19,6 hodi halo Projetu Rekualifikasaun Hospital Nacional Guido Valadares (HNGV).

Ospitál Nasionál Guido Valadares (HNGV, sigla portugés). Foto/Tome da Silva.

Konsellu Ministrus delibera ona hodi aprova akordu Kontribuisaun Finanseira entre Repúblika Demokrátika Timor-Leste no Ajénsia Kooperasaun Internasionál Japaun kona-bá Projetu Rekualifikasaun HNGV ne’e, ne’ebé sei asina hosi Ministra Finansas (MF), Santina José Rodrigues F. Viegas Cardoso.

Lee Mós: JICA Oferese Ekipamentu Teste Mikrobiolojia bá Laboratóriu Nasionál no UNTL

“Tuir akordu ida-ne’e, Japaun sei fó kontribuisaun finanseira besik dolar amerikanu millaun $19,6. Finansiamentu ida-ne’e ho objetivu atu haforsa kapasidade prestasaun servisu no hadi’a kualidade kona-ba kuidadu médiku sira, liu hosi konstrusaun instalasaun foun no fornesimentu ekipamentu médiku nian sira bá Hospital Nacional Guido Valadares,” Hatutan.com sita komunikadu, kuarta (31/07/2024).

Projetu ne’e inklui edifísiu andár lima ne’ebé sei fahe bá unidade pediatria no kuidadu intensivu. Edifísiu foun ne’e prevee sei remata iha fulan-abríl tinan 2027.

Jornalista: Vito Salvadór