Hatutan.com, (02 Agostu 2024), Díli– Hahú fulan-Janeiru to’o fulan-Jullu 2024, ekipa konjunta kompostu hosi Patrimóniu Estadu, Polísia Nasionál Timor-Leste (PNTL), Komisaun Funsaun Públiku (CFP), Komisaun Anti-Korrupsaun (CAC) ho Diresaun Nasionál Transporte no Terrestre (DNTT) halo ona apreensaun bá veíkulu Estadu hamutuk 24 ne’ebé ajente estadu sira iha loron feriadu ka sábadu ho domingu.

Lee Mós: Karreta Estadu ho Númeru Matrikula 03.430G Hetan Dezastre no Hetan Serveja Dos Rohan iha Laran

Karreta Estadu estasiona iha arredór Diresaun Jerál Jestaun Patrimóniu Estadu, Balide, Díli. Foto/Tome da Silva

Husi veíkulu estadu nian 24 ne’e, kompostu husi motór 19 no karreta sia (9) ne’ebé utilizadór sira ho livremente viola regra no regulamentu sira utilizasaun patrimóniu Estadu nian. Ho nune’e, parte infratór sira hetan sansaun administrativu hodi selu koima hamutuk montante $1,035.

“Sira ne’e mak indika viola regra utilizasaun Patrimóniu Estadu nian mak hanesan Xefe Gabinete na’in-ida (1), Diretór nasionál na’in-ida (1), Xefe Departamentu na’in-ida (1), restu ne’e funsionáriu baibain,” Diretora Jerál interina Diresaun Jerál Jestaun Patrimóniu Estadu (DJJPE),  Timotea P. Marquez informa  bá Hatutan.com iha nia servisu fatin,  Balide, Díli, Sesta  (02/08/2024).

Prosesu ne’e iha ona CFP, CAC no Inspesaun Jerál Estadu tanba ne’e karreta  sia (9) ne’e ekipa konjunta entrega fila-fali ona ba ministériu relevante ho kondisaun, inklui motór balu.

“Ba evidénsia ne’ebe mak ita labele entrega ba Ministériu relevante mak motór hamutuk (6) tanba ne’e ita tenke koordena malu nafatin bainhira se-se de’it mak hetan depois nia hasai foto publika iha media sosiál, maka ami hetan ita-boot sira nia publikasaun ho evidénsia ruma iha media sosiál rasik, ami hare hetan mak ami kontinua foti asaun husi ita-boot sira-nia informasaun ne’e ami halo notifikasaun atu konfirma no prosesu kontinua nafatin kabe ba iha instituisaun idak-idak ne’ebe mak hola parte iha ekipa konjunta ne’e entaun Ekipa Konjunta ne’e iha kompeténsia atu foti medida ruma atu prosesu,” Nia esplika.

Nia garante katak atividade Ekipa Konjunta kontinua la’o  hodi kontrola movimentu veíkulu Estadu ne’ebe ema balu utiliza la tuir regra ho meius sira hanesan check point, swuipin, inspesaun hodi tau matan ba hahalok aat sira ne’e tanba ne’e ekipa integradu ida ne’e se haree mós ba iha kada instituisaun.

Nia hatutan, regra prosedimentu sira ne’e hatuur tia ona iha ne’ebá katak karreta ne’e rasik mak la iha autorizasaun entaun atu utiliza hanesan ba kargu funsionál ne’e la iha ona tanba ne’e karreta hotu-hotu konsidera hanesan operasionál no para iha fronta kada ministériu sira nian nune’e lojístika mak jere fali ba ninia utilizasaun.

Bá kargu xefia balu ne’ebé mak sei utiliza sasán Estadu nian la tuir regra ida ne’e ekipa Konjunta sei servisu makas hodi identifika nafatin nune’e tama mós ba Patrimóniu Estadu nia planu rasik hodi identifika atu haree ministériu ida ne’ebe mak sei kontinua viola regra sira- ne’e.

Jornalista Estajiáriu:  Lazaro Pereira Quefi