Hatutan.com, (30 Agostu 2024), Díli-Governu liuhusi Ministériu Justisa (MJ) kontinua hein desizaun  Tribunál Rekursu (TR) atu halo prosesu sira estradisaun nian hasoru fujitivu Arnolfo Teves Jr bá nia nasaun orijen Filipina.

Lee Mós: Kona-bá Estradisaun Fujitivu Teves Jr, Governu Hein Desizaun Definitiva Husi Tribunál Rekursu

Fujitivu Arnolfo Teves Jr submete bá prosesu audisaun iha Tribunál Supremu Juastisa, Tersa (11/06/2024). Foto/Elio dos Santos da Costa

“Iha prosesu, ita hein de’it desizaun Tribunál Rekursu nian, tanba ita-boot sira hatene katak, desizaun Tribunál nu’udár desizaun ida ikus liu, fó oportunidade bá iha Teves Jr nia advogadu sira atu halo rekursu, ka halo kontraditóriu para atu respeitu bá iha buat ida direitus umanu, bá iha direitu ema nian,”  Ministru Justisa Sergio Hornai hatán bá Hatutan.com iha nia kna’ar fatin Caicoli, Tersa (06/08/2024).

Ministru Sergio Hornai hateten, bainhira laiha tán ona dalan seluk, maka Tribunál tenke deside konforme desizaun Tribunál nian, no fó bá iha autoridade sentrál hanesan Prokuradór Jerál Repúblika nian iha prazu legál loron 10 to’o loron 15, no ministériu justisa iha loron 20 atu bele halo kooperasaun ho Governu Filipina.

“Sé iha prazu loron 20 másimu, sé ohin mai, aban ita bele dehan katak, buat koordena, no halo buat sira ne’e, ita bele halo buat sira ne’e, ita bele halo desizaun hodi bele haruka nia hela, ou halo deportasaun,” Sergio Hornai hateten.

Iha Kuarta, 27 fulan-Juñu 2024, hale’u tuku 17:00 Otl, Tribunál Rekursu (TR) ka Supremu Tribunál Justisa nian (STJ), liuhosi despaxu ikus deside ona hodi halo estradisaun bá fujitivu Arnolfo Teves Jr bá nia nasaun orijen Filipina, hodi submete bá prosesu legál.

Desizaun bá estradisaun ne’e tanba durante prosesu audisaun, Juiz sira iha Tribunál Rekursu entende katak, krime hirak ne’ebé mak Ministériu Públiku promove bá arguidu Arnolfo Teves, maiória faktu sira provadu.

Maske nune’e, tuir prazu legál, parte advogadu sira bele hatama rekursu bá Tribunál durante loron tolu-nulu, sura hosi loron ne’ebé despaixu ne’e sai. No hosi karta rekursu ne’e Tribunál sei estuda ninia konteúdu sira, molok foti desizaun bá halo estradisaun.

Rekursu ne’ebé atu hato’o hosi arguidu Teves Jr nia advogadu sira ne’e, atu bele halo kontestasaun ruma bá Tribunál nia desizaun sira. Haree bá prazu legál loron tolu bá defeza sira atu hato’o sira-nian kontraditóriu, liu tiha ona, (27 fulan-Juñu to’o loron 27 fulan-Jullu 2024).

Hatutan.com halo  esforsu lubun ida atu konfirma ho parte Defeza sira Arnolfo Jr nian, liu-liu Advogadu Timoroan, José Ximenes, iha Filipinu ne’e rezidénsia arrendada iha Top Golf, Metiaut-Dili, Kinta (28/06/2024), maibé lakohi fó nia komentáriu.

Iha Tersa, 06 fulan-Agostu 2024, Hatutan.com kontinua buka tuir atu konfirma prosesu kazu Arnolfo Teves  Jr nian, liu-liu kona-bá Defeza sira hatama ona rekursu bá Tribunál ka seidauk, no sé hatama ona rekursu karik, oinsá ho desizaun Tribunál Rekursu nian, Advogadu José Ximenes ho lian tun dehan, to’o oras ne’e seidauk iha novidade foun ruma.

“Seidauk iha novidade foun. Dala-ruma depois ferias judisiál karik. Obrigadu u’ain, maun. Hakuak-boot,” Advogadu José Ximenes responde bá Hatutan.com iha via komunikasaun WhatsApp.

Jornalista: Rogério Pereira Cárceres