Hatutan.com (04 Setembru 2024), Díli– Ajendamentu online bá trata pasaporte iha Servisu Notariadu Ministériu Justisa (MJ) la’o normal hela, maibé tanba eletrisidade mate-lakan prejudika efetividade ajendamentu online ne’e rasik.

Lee Mós: Governu Sosa Ona Mákina Impresora Pasaporte Unidade Rua ho Kustu $330,000

Abitante sira tuur hein hela iha fati trata pasaporte nian Servisu Rezistu Notariadu atu trata sira-nia pasaporte. Foto/Dok.Tome da Silva

Diretór Jeral Notariadu, Agustino Gonçalves  iha nia servisu fatin, Segunda (02/09/2024), informa ajendamentu online bá pasaporte durante ne’e la’o hela no kuandu hotu loke fali de’it, maibé kadavez eletrisidade mate bei-beik  halo avaria no dalaruma la funsiona.

Tuir nia haree kauza seluk mós tanba velosidade internet ne’ebé la estavel (rede internet monu hela de’it). Mezmu nune’e, parte sira kontinua hala’o sira-nia servisu hodi halo atendimentu bá emisaun pasaporte nian kada loron bele prodús de’it  pasaporte 100.

Nia hateten bainhira makina rua foun ne’ebé Governu sosa instala ona, mak kada loron bele prodús  pasaporte 250 tuir rekizitu  ne’ebé mak iha.

Nia esplika tán katák durante ne’e sidadaun sira iha kada munisípiu halo kompleta dokumentu no hasai fotografia iha ida-idak nian munisípiu depois mak Notariadu kada munisípiu lori dokumentu hirak ne’e mai prodús pasaporte iha Notariadu Díli tanba durante Governu seidauk instala makina emisaun pasaporte iha munisípiu sira.

Nia mós husu sidadaun sira karik identifika ema halo  kobransa ilegal ka broker sira bele halo keixa bá Polísia Sientífika Invetigasaun Kriminál (PCIC, siglá Portuges) atu bele prosesa tuir lei.

“Buat broker ne’e ita rona lia-anin dehan iha, maibé la’ós funsionariu iha ne’e mak halo sé karik funsionariu iha ne’e mak halo kobransa ilegal bele identifika no prosesu nia imi bele mai fó hatene bá ami tanba ami iha PCIC no ami bele kontaktu bá PCIC hodi atende ema sira halo kobransa ilegál sira ne’e,” nia afirma.

Jornalista Estajiária: Zita Menezes.