Hatutan.com, (06 Setembru 2024), Díli-Primeiru-Ministru (PM), Kay Rala Xanana Gusmão, Sesta (06/09/2024) iha Gabinete Fronteira Maritima, Díli, hala’o sorumutu ida ho ajénsia sira Organizasaun Nasaun Unidas  (ONU) nian iha Timor-Leste, hodi diskute oinsá bele tulun liután populasaun sira iha setór oioin.

Lee Mós: Komisáriu Henrique da Costa Husu ONU Envolve PNTL Barak iha Misaun Pás

“Ami ko’alia oinsá koordena malu ho  ONU ninia prezensa ne’e bele fó benefísius di’ak liu, no ajuda governu atu atende liu bá nesesidades rai ne’e nian, no povu ne’e nian,” Primeiru-Ministru, Kay Rala Xanana Gusmão informa bá Jornalista sira, hafoin sorumutu ho ajénsia sira ONU nian  ne’e.

PM Xanana halo sorumutu ho ajénsia sira ONU nian iha Díli. Foto/Elio dos Santos da Costa

Ajénsia sira ONU nian ne’e mak hanesan, Organizasaun Mundial bá Saúde (WHO-sigla Inges), Nasoes Unidas bá Asuntu Feto nian (UN Woman), Nutrition, IOM, United Nations Populationa Fund (UNFP), United Nations International Children’s Emergency Fund (UNICEF), Watershed and Flood Prevention Operations (WFPO) Program.

Koordenadóra Rezidente ONU nian iha Timor-Leste, Olufunmilayo Abosede Balogun-Alexander esplika, enkontru atu rona mós Primeiru-Ministru kona-ba oinsá ONU iha Timor-Leste bele apoia di’ak liután, governu no povu Timor-Leste iha área saúde no edukasaun, kona-bá feto, kona-ba joven sira, kona-bá nutrisaun no seluk tan.

Abosede Balogun-Alexander dehan, nu’udár membru ekipa nasaun ONU nian iha Timor-Leste, uluk liu hato’o sira-nian kongratulasaun bá Xefe Governu Xanana Gusmão, tanba iha loron 30 Agostu foin lalais, povu Timor-Leste selebra nia aniversáriu Konsulta Populár dala-25 nian.

Jornalista: Rogério Pereira Cárceres