Hatutan.com, (06 Setembru 2024), Díli-Primeiru-Ministru (PM), Kay Rala Xanana Gusmão simu medalla Grand Cruz Órdem Independénsia hosi  Guiné Equatoriál.

Lee Mós: Xanana ba Simu Doutór Onoráriu Rua Hosi Universidade Waseda Japaun

Embaixadóra Timor-Leste (TL) bá CPLP, Laura Abrantes entrega Grand Cruz Órdem Independénsia hosi  Guiné Equatoriál bá PM Xanana. Foto/Mídia GPM

Medalla ne’e entrega direta hosi embaixadóra Timor-Leste (TL) bá Komunidade Nasaun Lian Portugés (CPLP, sigla portugés), Laura Abrantes iha Palásiu Governu, Sesta (06/09/2024).  Medalla ne’e entrega tanba kontribuisaun Primeiru-Ministru Xanana Gusmão nian iha tinan-10 liubá hanesan rekoñesimentu ne’ebé fó tanba politikamente no estratéjikamente Primeiru-Ministru halo Guiné Equatoriál sai membru CPLP.

“Tuir loloos Primeiru-Ministru mak simu direta medalla ne’e, maibé okupadu ho servisu Estadu entaun delega ha’u mak simu, iha loron 30 fulan-Jullu, iha Guiné Equatoriál no ohin ha’u mai entrega diretamente iha-ne’e,” Hatutan.com sita iha komunikadu imprensa.

Grau medalla ne’ebé atribui, baibain Guiné Equatoriál utiliza hodi kondekora eis-titulár nasaun nian no líder sira ne’ebé fó apoiu bá susesu nasaun nian.

Ho rekoñesementu ne’e, Xefe Governu sei hato’o agradesimentu liu-hosi karta ofisiál ida ne’ebé sei lori hosi Embaixadora Laura Abrantes entrega bá Prezidente Repúblika Guiné Equatoriál.

Diplimata ne’e relata mós servisu bá Xefe Ezekutivu no kontinua simu orientasaun hodi kontinua servisu ho didi’ak, koopera ho país membru CPLP hodi promove Timor-Leste iha mundu.

Jornalista: Rogério Pereira Cárceres