Hatutan.com, (16 Setembru 2024), Díli- Asosiasaun Futeból Munisípiu (AFM) hamutuk 13 konsidera konferénsia re-estruturasaun ne’ebé organiza husi Sekretáriu Jerál  Federasaun Futeból Timor-Leste (FFTL), Gregório Correia hodi truka estrutura atuál husi Asosiasaun Futeból Munisipiu Viqueque, Ainaro, Lospalos no Asosiasaun Arbitrajen ilegal no la tuir estatutu Federasaun no Asosiasaun nian.

Lee Mós:Kongresu FFTL Falla, Komité Eleitorál La Prudente no Inkapasidade

Asosiasaun Futeból Munisípiu (AFM) hamutuk 13 konsidera konferénsia re-estruturasaun ne’ebé organiza husi Sekretáriu Jerál Federasaun Futeból Timor-Leste (FFTL), Gregório Correia ne’e ilegál. Foto/Elio dos Santos da Costa

Portavós AFM nu’udár mós Prezidente Asosiasaun Futeból Munisípiu Ermera, Lomelino Salsinha, haktuir ba karta notifikasaun ba kongresu estraordináriu FFTL 2024 husi Sekretáriu Jerál ho Nú ref. 172/GC-GS/ FFTL/ VIII/2024, hodi husu Asosiasaun Futeból Munisipál no Asosiasaun Profisionál sira atu submete lista delegadu asosiasaun tuir estatutu FFTL (Edisaun 2021) art.26.2,3,4 & 5. Tamba ne’e, Prezidente Asosiasaun Futeból Viqueque konsidera karta notifikasaun refere ilegal no la tuir prosedimentu administrativu FFTL no viola estatutu FFTL.

 AFM mós konsidera Karta Notifikasaun ne’ebé Sekretáriu Jerál Gregório Correia notifika ba Asosiasaun Futeból Munisipál Viqueque la hato’o ba Prezidente Asosiasaun.

“Sekretáriu Jerál Gregório Correia mós viola Estatutu FFTL no Estatutu Asosiasaun hodi uza nia podér organiza konferénsia re-estruturasaun ba estrutura Asosiasaun Futeból munisipiu Viqueque, Ainaro, Lospalos no Asosiasaun Arbitrajen hodi troka pozisaun sira prezidente sein koñesimentu no prezensa husi Prezidente atuál ne’ebé iha direitu tomak organiza konferénsia ka kongresu tuir estatutu Asosiasaun art. 38 alinea 4 ne’ebé hateten katak, prezidente mak prezide kongresu,” Portavós  Lomelino Salsinha ba jornalista sira iha Otél Luz Clarita, Díli, Segunda (16/09/2024).

Konferénsia ne’e mós sira konsidera la tuir orientasaun karta ne’ebé mai husi FIFA no AFC ne’ebé hateten katak, husu FFTL atu re-organiza nia membru sira ne’ebé nia mandatu termina iha fim do ano 2024.

 Bazeia ba desizaun husi komite appeal ho Nu ref. 04/ appeal C/FFTL/1/ 2024, Asosiasaun Futeból Munisípiu Viqueque, Ainaro, Lospalos no Asosiasaun Arbitrajen nafatin mantein ho prezidente atuál ne’ebé prevee iha Estatutu Asosiasaun artigu 39.

Konsidera ilegal asosiasaun 13 sei la submete lista delegadu

Bazeia ba Estatutu FFTL no Asosiasaun Futeból Munisípiu no Asosiasaun profisionál sira, AFM sei la submete lista delegadu ne’ebé fixa ona iha data tuir mai.

Bazeia ba Estatutu FFTL, AFM reklama katak sei la hatama  karta  hodi rejistu bá iha kongresu ne’ebé maka sei realiza iha  loron 28 fulan-Setembru 2024 tanba pozisaun Sekretáriu Jerál FFTL Gregório Correia iha FFTL ilegálmente ho razaun tanba  Gregório Correia rezigna aan ona husi kargu Sekretáriu jerál iha  loron 25 fulan-Outubru 2023. Nune’e nia laiha ona kompeténsia tuir lei hodi prezide enkontru ka kongresu.

“Ami husu atu kria komité independente ida ne’ebé neutru no nafatin lidera husi Prezidente Interinu Tenente Jenerál Domingos Raul “Falur Rate Laek”, hodi  kontinua kongresu estraordináriu  ne’ebé antes ne’e pendente iha loron 10 fulan-Janeiru  2024,” Lomelino Salsinha hateten.

 Tuir estatutu asosiasaun  artigu 38 aliña 4 hatete katak só prezidente asosiasaun maka  legalmente halo kongresu, maibé tan de’it interese Gregório Correia nian, entaun nia orienta no mobiliza hodi organiza kongresu iha munisipál troka hotu  prezidente asosiasaun sein koñesimentu prezidente asosiasaun atuál.

Sira-nia parte konsidera katak ida ne’e viola estatutu asosiasaun no viola estatutu Federasaun Futeból Timor-Leste.  Bazeia Notifikasaun ne’ebé maka husi Gregório Correia hato’o mai asosiasaun hotu-hotu, maibé la hato’o ba prezidente asosiasaun, hanesan informasaun de’it katak sei realiza kongresu estraordináriu iha  28 fulan-Setembru 2024. Tanba ne’e, parte sira konsidera katak ida ne’e la tuir rekezitu ne’ebé hakerek iha estatutu no  sei kontinua ezije tuir mata dalan estatutu nian  hodi levanta bá oin.

Submete Reklamasaun ba FFTL

Iha parte loraik AFM hamutuk 13 lori kedas sira nia karta reklamasaun ba entrega iha FFTL no bainhira iha prazu loron tolu tuir estatutu FFTL maka laiha resposta sei lori kazu ne’e bá tribunal arbitrajen liga ba atividade Desportu nian. 

“Ami submete ona karta ne’e iha FFTL, dentru loron tolu maka  laiha resposta maka ami sei lori kazu ne’e bá tribunal arbitrajen,” Lomelino Salsinha afirma.

Prezidente Asosiasaun Arbitrajen, Aniceto Berlelo hateten    sira  tuur hamutuk iha ne’e nu’udar Prezidente asosiasaun atu husu bá Gregório Correia hanesan sekretáriu jerál no prezidente Interinu hanoin ida de’it atu lori Federasaun Futeból ne’e bá futuru tuir ema hotu nia  hakarak.

Nia afirma hanesan prezidente asosiasaun sente deskontente  kuandu ezekutivu FFTL organiza prosesu sira ne’e la tuir estatutu Federasaun  nian no mos estatutu asosiasaun nian rasik. Tanba ida-ne’e maka durante ne’e prosesu sira ne’ebé maka la’o hela bá asosiasaun hirak ne’e ami atu hatete  de’it katak Kolega sira ne’ebé maka sekretáriu jerál Gregório Correia organiza ne’e la tuir prosedimentu legal.

“La tuir estatutu Federasaun ne’e rasik no estatutu asosiasaun ne’e rasik, la  konsidera. Tanba ida-ne’e maka ami mai hamutuk iha ne’e hanoin ida de’it atu lori Futeból ne’e bá oin ita tenke tuir regra ne’ebé mai husi FIFA, AFC, AFF, FFTL no asosiasaun, tanba  prosesu sira ne’e hotu  ne’e, lei inan maka Federasaun no  lei ne’ebé maka iha hatún  mai iha asosiasaun sira ne’e, ida ne’e maka iha, no ikus mai prosesu sira ne’e la’o Sekretáriu jerál lori nia podér ne’e, viola estatutu FIFA ninian tantu mai to’o asosiasaun,” Aniceto Berlelo esklarese.

Nia hatutan ho aktu sira ne’ebé viola lei no estatutu FFTL no asosiasaun sira nian ne’e,  mak AFM la konkorda, rejeita no sei la hato’o naran delegadu sira  bá iha Federasaun tanba prosesu ne’e viola lei ne’ebé maka iha.

Nia argumenta,  Loloos Prezidente Interinu ho sekretáriu jerál atu halo kontinuasaun kongresu ne’ebé maka pendente, no asosiasaun sira mós lee tiha ona karta ne’ebé maka mai husi FIFA katak husu bá asosiasaun sira ne’ebé maka iha problema uitoan halo re-organiza, re-harmonia, maibé ida ne’e  la fó tempu bá ami derepente  de’it organiza kongresu asosiasaun sem iha koñesimentu husi estrutura atuál. Tanba ida ne’e ami kontra desizaun sira ne’e tanba viola lei.

Hafoin AFM sira submete karta reklamasaun ba parte ezekutivu FFTL iha edifísiu FFTL, jornalista sira tenta halo kedas konfirmasaun ho Sekretáriu jerál FFTL Gregório Correia maibé nia parte lakohi ko’alia ho jornalista sira tamba sei iha hela enkontru importante balun iha FFTL no husu atu loron seluk mak sei ko’alia kona-ba asuntu ne’ebé ohin AFM reklama ne’e.

Asosiasaun Futeból Munisipiu ne’ebé ohin hatama reklamasaun mak hanesan Asosiasaun Futeból Dili Leste, Asosiasaun Futeból Dili Oeste, Asosiasaun futeból Aileu, Asosiasaun Futeból Ainaro, Asosiasaun Futeból Covalima, Asosiasaun Futeból Viqueque, Asosiasaun Futeból Ermera, Asosiasaun Futeból Manatuto, Asosiasaun Futeból Oé-Cusse, Asosiasaun Arbitrajen, Asosiasaun Futeból Manufahi, asosiasaun Treinadór no ikus liu DIT FC hanesan kampiaun liga II (2).

Jornalista: Vito Salvadór