Hatutan.com, (16 Setembru 2024), Díli-Inísiu projetu reabilitasaun Estrada sira iha Díli laran, liuliu estrada prinsipál sira ne’ebé Sua Santidade Papa Francisco liu iha leten tenke termina ona iha loron ikus fulan-Agostu 2024. Realidade, projetu estrada  sira ne’ebé mai ho karater emerjénsia no adjudikasaun direta la konsege konklui 100% tuir tempu (fim de Agostu 2024).

Lee Mós: Projetu Reabilitasaun Estrada iha Díli Laran “La Obedese” bá Prinsípiu Transparénsia

Inisiu projetu reabilitasaun estrada prinsipál Rotunda Prezidente Nicolau Lobato ba Tasi-tolu. Foto/Dok

Hatán bá preokupasaun sira-ne’e, Ministru Obras Públikas (MOP), Samuel Marçal informa katak, projetu sira kona-bá reabilitasaun estrada nian ne’ebé durante ne’e la’o iha kapitál Dili, oras ne’e balu atinje ona pursentu 80 (80%), no hela tán de’it ona 20% atu konklui. Maibe, projetu estrada sira iha diresaun Rotunda Estatua Prezidente Nicolau Lobato nian bá to’o Tasi-tolu ho mós diresaun Bebonuk nian, empréza kontratór presiza atu nahe aumenta tán alkatraun dalas (lapis) ida-ida, nune’e bele konklui.

“Sira kuaje hothotu ne’e atinje ona porsentu 70 pursentu, balu porsentu 80 (80%), balu  porsentu 20 (20%)  tanba iha parte hanesan puré-zemplu Tasi-tolu, presiza alkatraun ne’e lapis ida tán. Nune’e mós Bebonuk, presiza lapis ida tán, ne’e mak falta porsentu  20 (20%) mós kuaje ne’e la han tempu, parese semana ida tán bele konklui hotu ona bá Díli laran nian ne’e,” Ministru Marçal informa bá Jornalista sira iha Palásiu Governu, Díli, Segunda (16/09/2024).

Projetu reabilitasaun estrada nian sira ne’ebé mak la’o iha bairu-bairu sira, hanesan Bairru-Pité nian mak kompañia kontratór hadi’a dadauk hela valeta, no mós iha área Delta-IV, Delta-II, besik ona atu konklui.

“Delta-I sei hadi’a de’it valeta, bá Manleu nian mós kuaje konklui hotu ona. Ne’ebé, Díli laran nian ne’e kuaje ita bele dehan antes fim do anu 100% ona,” Samuel Marçal garante.

Kona-bá Pagamentu

Atuál Estrada Rotunda Prezidente Nicolau Lobato ba Tasi-tolu. Foto/Elio dos Santos da Costa

Ministru Samuel informa mós kona-bá persentájen pagamentu nian bá kompañia kontratór sira katak, ministériu obras públikas rasik selu tiha ona iha fulan-Agostu kotuk, maibé balu foin mak hetan pagamentu ho pursentu 70-resin (70%), balu 80%, no iha balu mós mak MOP foin mak halo pagamentu.

“Sira finaliza tiha lai mak ita foin selu tán 10%, tanba 10% tenke rai bá retensaun. Totál orsamentum ne’e balu hetan kontratu millaun  $3,  millaun $4, balu millaun $2, ne’ebé, depende. Sira ida ne’ebé ho millaun $2 ne’e kuaje ita selu ona millaun $1 resin ona bá sira,” tenik nia.

Kontinuasaun Estrada Dolok-Oan

Ministru Samuel Marçal hatutan, governu ida ne’e mós sei kontinua projetu reabilitasaun estrada hosi Kritu Rei nian bá to’o Dolok-Oan, no dadauk ne’e sira verifika tán de’it dezeñu oan ida, kuandu hotu ona iha semana oin, ne’e bele kontinua ona to’o rohan.

“Sim, ne’e tenke aumenta tán orsamentu, tanba agora ne’e, ida todan ne’e mak ita halo tiha ona ne’e. Agora, bá liu ne’ebá ne’e estrada di’ak hela, hein para atu tau de’it alkatraun ho halo drainajen de’it, bá sorin ne’e di’ak ona,” Samuel hateten.

Kontinuasaun estrada husi Kristo Rei bá to’o Dolok-Oan ho totál kilometru 30 resin, no tuir MOP nia kalkulasaun orsament  bele gasta tán millaun $3.

Seluk fali kona-bá Projetu reabilitasaun bá Jardím iha Kristu Rei, kuaje konklui ona 70%, falta de’it drainajen ida-rua mak seidauk finaliza no MOP liuhosi diretór jerál, diretór nasionál sira, halo ona reuniaun ho na’in bá empréza kontratór sira.

“Agora, ha’u fó hatene ona bá sira hotu-hotu, só ema ne’ebé bele kaer tán projetu, kuandu sira finaliza ona obra ida primeiru, sira tenke konklui tiha lai mak bele fó tán projetu. Sé lae, lalika fó projetu bá sira,” dehan Samuel Marçal.

Kompañia nasionál lima ne’ebé MOP kontrata liuhusi prosesu adjudikasaun direta hodi responsábiliza bá projetu emerjénsia bá reabilitasaun estrada urbana iha kapitál Díli mak hanesan, Kompañia Arquiris Unipessoál Lda, kaer projetu estrada Kristu Rei, Dolok-Oan, kompañia Montana Di’ak Unipessoál Lda, kaer projetu estrada hosi Rotunda estátua Prezidente Nicolau Lobato bá Rai-kotu, Kompañia Jonize Construction Unipessoál Lda, tomakonta estrada Delta I no Fomento bá Manleu, Kompañia Star King Unipessoál Lda, kaer projetu estrada Delta II no Delta IV, Kompañia Fortuna Unipessoál Lda, kaer projetu reabilitasaun emerjénsia estrada diresaun Manleu-Ana.

Lee Mós: Projetu Adjudikasaun Direta Estrada Kristu Rei ba Dolok-Oan La Tau Valor Orsamentu iha Kuadru Informasaun

Jornalista: Rogério Pereira Cárceres