Hatutan.com, (25 Setembru 2024), Díli-Primeiru-Ministru (PM), Kay Rala Xanana Gusmão,  Tersa (24/09/2024),  ofisialmente atribui ka  entrega  sertidaun Repúblika Demokrátika Timor-Leste (RDTL)  bá Sekretáriu Jerál Organizasaun Nasaun Unidas (ONU), António Manuel de Oliveira Guterres hodi sai hanesan Timor.

Lee Mós: PN Aprová ho Unanimidade Rezolusaun Atribuisaun Nasionalidade Onradu bá António Guterres

Haktuir iha komunikadu ne’ebé Hatutan.com asesu, relata katak, Sertidaun RDTL ne’e, Xefe Governu Xanana Gusmão entrega direta bá António Guterres iha nia servisu fatin Kuartél Jerál ONU, hafoin abertura Simeira kona-bá Futuru iha Sesaun bá dala-79 Asembleia Jerál Nasaun Unidas (AGNU sigla portugés).

PM Xanana entrega Sertidaun RDTL bá SekJer ONU, António Guterres iha Nova Iorke, Tersa (24/09/2024). Foto/Média GPM

“Hodi povu Timor-Leste nia naran, ami entrega Sertidaun RDTL ida-ne’e hodi rekoñese ita nu’udár Timorense,” Hatutan.com sita Xanana Gusmão nia espresaun iha komunikadu.

António Guterres ninia partisipasaun iha istória luta Timor-Leste no ninia vizita mai Timor-Leste iha ámbitu komemorasaun aniversáriu Konsulta Populár dala-25 ne’e, nakonu ho ksolok iha ne’ebé marka konkluzaun ida signifikativu no konsidera Timor nu’udár país domin na’in no pás nian.

Iha komunikadu ne’e SekJer ONU, António Guterres ne’ebé hetan ona títulu sidadania hanesan timoroan sente orgullu no hatudu apresiasaun bá ospitalidade ne’ebé nia simu durante hala’o vizita mai Timor-Leste, hodi partisipa iha komemorasaun tinan 25 konsulta populár ne’ebé organiza hosi ONU iha tinan 1999.

“Ha’u sente orgullu no konsidera hanesan onra boot hodi sai sidadaun bá rai ida ne’ebé ha’u sempre lori iha ha’u-nia fuan,” António Guterres agradese.

António Guterres moris iha Lisboa-Portugál iha tinan 1949 no kaben ho Catarina de Almeida Vaz Pinto no sira iha oan na’in-rua.

Antes ne’e Estadu Timor-Leste (TL) atribui nasionalidade bá António Guterres iha ámbitu serimónia solene komemorasaun loron konsulta populár bá dala-25 (30 Agostu 1999 – 30 Agostu 2024), iha Parlamentu Nasionál (PN) ho rezolusaun ida ne’ebé asina hosi Prezidente Parlamentu Nasionál (PPN), Maria Fernanda Lay.

Hafoin entrega sertidaun ne’e, Xefe Governu Xanana Gusmão ho Guterres hala’o mós diskusaun kona-bá Simeira ONU nian, inklui fahe hanoin bá malu kona-bá problema multilateral nian, mantein páz bá nasaun hotu-hotu hodi kumpre prinsípiu demokrasia no respeita direitus umanus sidadaun sira nian hodi lori nasaun sira avansa bá dezenvolvimentu.

ONU mós komprometidu atu kontinua apoia dezenvolvimentu Timor-Leste liu-hosi ninia ajénsia sira ne’ebé hala’o servisu besik ho povu no Estadu Timor-Leste.

Jornalista: Rogério Pereira Cárceres