Hatutan.com, (01 Outubru 2023), Díli- Federasaun Futeból Timor-Leste (FFTL) la iha seriedade organiza Konferénsia iha Asosiasaun Futebol Munisípiu (AFM) sira ne’ebé iha dezintendimentu hodi armoniza no adia tan konferénsia extraordináriu ba fulan-Outubru 2024.

Lee Mós: Konferénsia Re-estruturasaun Ne’ebé Organiza husi Sekretáriu Jerál FFTL Ilegal

Deklarasaun ne’e hato’o husi Porta-voz Asosiasaun Futebol Munisípiu sira no Prezidente Asosiasaun Futeból Ermera, Lomelino Salsinha ba Hatutan.com iha Bairos Grilos, Segunda (30/09/2024).

Konferénsia asosiasaun futebol munisípiu Bobonaro ne’ebé la konsege realiza ho di’ak tanba la marka prezensa husi Komité Eleitoral FFTL. Foto/Dok.

“Loloos mandatu ba Asosiasaun Futebol munisípiu sira ne’e sei remata iha fim do ano 2024, maibé parte ezekutivu FFTL liu-liu Sekretáriu Jerál Gregorio Coreia ezije atu halo ona konferénsia hodi troka hotu prezidente asosiasaun sira ho razaun FIFA mak fó orientasaun, maibé iha realidade karta FIFA nian ne’ebé asosiasaun sira simu hateten katak asosiasaun Futeból munisípiu sira ne’ebé iha dezintendimentu tenke harmoniza sira-nia asosiasaun para bele realiza kongresu extraordináriu FFTL ne’e lao ho diak,” Lomelino Salsinha hateten.

Prezidente Asosiasaun Futebol Ermera ne’e hatutan kompeténsia atu halo konferénsia Assosiasaum Futeból sira munisípiu nian ne’e iha komité eleitoral FFTL nian, maibé la hatene iha mutivu saida no interese saida maka sekretáriu jerál FFTL ho membru ezekutivu sira maka tun direita ba asosiasaun munisípiu sira hodi obriga halo konferénsia no troka hotu no obriga halo konferénsia, maibé bazeia ba estatu, sekretáriu jerál ho membru ezekutivu laiha kompeténsia atu ba organiza ga halo konferénsia Assosiasaum munisípiu nian.

“Ho aktu ida ne’e hatudu violasaun ba estatu FFTL no Estatuto Asosiasaun nian ne’e grave tebes,” Nia subliña.

Fontes prinsipál iha konferénsia Assosiasaum Futeból Munisípiu Bobonaro ne’ebé lakoi temi nia identidade hateten momentu ne’ebá sira konvida nia ba iha konferénsia Assosiasaum Futeból Bobonaro tuir konvite ne’ebé nia simu, maibé haree katak konferénsia ne’e la tuir estatutu Asosiasaun nian tamba bainhira atu halo konferénsia karik prosesu akizisaun kandidatura ne’e tenke submete antes no tenke Transparante labele viola ida ne’e.

“Ho prosedimentu legal sira ne’e la tuir mós komu há’u hetan konvite tamba ne’e iha loron kinta (26/09/2024) dader ne’e ba partisipa atu hare lala’ok ne’e lao loos ka lae no iha oras tuku 09:00 Otl, Sekretáriu Jerál FFTL Gregorio Correia no komité ezekutivu Marito da Costa realiza konferénsia Assosiasaum Futeból Bobonaro ba da-ruak ,maibé laiha komité eleitoral husi FFTL no prezidente komité eleitoral iha nivel munisípiu mak tenke prezide meza konferénsia tuir estatu FFTL no asosiasaun nian, maibé komité eleitoral ne’ebé iha hela legitimidade tuir estatu asosiasaun munisípiu nian la dirije meza konferensia tamba Sekretáriu Jerál no komité ezekutivu viola tia hodi direitamente dirije meza konferénsia.” 

“Ho aktu ida-ne’e maka hamosu polémika ija konferénsia Assosiasaum Futeból Bobonaro tamba prosesu aprezentasaun kandidatura ba Prezidente asosiasaun mos la tuir prosedimentu  estatutu asosiasaun nian no iha deit kandidatu úniku signifika la demokrátiku, laiha transparansia, no tuir prosedimentu lolos ne’e antes loron 60 tenke halo avizu públiku ba membru asosiasaun hotu atu bele ba rejista sira nia kandidatu, halo verifikasaun ba kandidatura iha loron 30 nia laran no hafoin verifika iha loron 45 atu aprezenta ba Sekretáriu Jerál hodi prepara fatin no determina loron ba konferénsia Assosiasaum nian maibé ida ne’e la akontese no situasaun real mak loraik fo hatene no aban konferénsia no kandidatu úniku ne’ebé deskonfia prepara husi Sekretáriu jerál ho nia aluadu sira iha FFTL,” fontes ne’e afirma.

Nia haktuir iha konferénsia ne’e Komité ezekutivu FFTL Marito da Costa hateten status rai ketak tiha lai no ohin ne’e atu halo konferénsia maibé kongresista sira maioria hateten estatu mak kesi no sai baze ba konferénsia asosiasaun nian tamba ne’e tenke lao tuir estatutu.

Se ho hanoin hanesan ne’e ita hanoin atu dezenvolve Futeból ne’e laiha tamba abut husi asosiasaun ne’e mak estatu, se ita organiza husi munisípiu mak sabtaut hanesan ne’e ba tan FFTL ne’eba oinsa.

Ho situasaun ne’ebé iha konferénsia Assosiasaum Futeból Bobonaro adia no kongresista sira hotu-hotu aseita. No iha momentu ne’eba Sekretáriu Jerál FFTL rasik hateten konferénsia Assosiasaum munisípiu Bobonaro labele akontese ona tamba osan laiha, maibé Prezidente asosiasaun Futeból Bobonaro dhn karik posivel sei realiza hikas konferénsia iha semana ne’e, ho ida ne’e ami para no husik malu sai deit husi fatin konferénsia.

Komité ezekutivu FFTL Marito da Costa via Whatsaap ba Hatutan.com hateten konferénsia Assosiasaum Futeból Bobonaro ne’e kansela tamba sosializasaun ba membru asosiasaun foun sira seidauk entende nune’e adia fali, laos tamba ita viola regra ruma lae.

Nia afirma razaun seluk mos tamba ezekutivu Asosiasaun Futebol Bobonaro balun mos kuaze la ativu ona iha knar nune’e deside halo konferénsia hodi troka estrutura foun maibé mantein ho kandidatu úniku mak aktual Prezidente asosiasaun Futeból Bobonaro Domingos Gouveia Moniz.

“Semana ne’e mak há’u ho Sekretáriu Jerál FFTL Gregorio Correia ba fila fali Maliana atu halo konferénsia, ita ba hadia fila fali buat ne’ebé iha para realiza konferénsia ne’e maibé sira maioria kandidata maun Gouveia nafatin,” Marito da Costa ba Hatutan.com via mensajen WhatsApp, Tersa (01/10/2024).

Nia subliña liután katak sei ba hadia konferénsia Assosiasaum Futeból munisípiu sira nian ne’e molok realiza kongresu extraordinariu FFTL.

Hatutan.com mos tenta halo konfirmasaun ho Sekretáriu Jerál FFTL Gregorio Correia maibé la koalia.

Kongresu Estraordináriu FFTL Muda ba Fulan-Outubru

Prezidente Assosiasaum Futeból Ermera, Lomelino Salsinha hateten antes ne’e asosiasaun hotu-hotu simu karta notifikasaun atu submete lista delegadu asosiasaun nian ba kongresu extraordináriu FFTL ne’ebé atu realiza iha fulan-Setembru liu ba maibé kansela la ho razaun ne’ebé klaru.

“Ami asosiasaun Futeból munisípiu sira mós simu notifikasaun katak sei realiza kongresu extraordinariu FFTL iha loron 28 fulan-Setembru liubá, maibé la realiza no muda ba loron 26 fulan-Outubru no ida ne’e  mak realiza bafatin signifika ezekutivu sira FFTL viola ona estatutu FFTL artigu 33, alinea 4 ne’ebé hateten ajenda ba kongresu extraordináriu FFTL labele muda. Maibé iha realidade ezekutivu FFTL muda la ho motivu ne’ebé klaru.”

Bainhira iha tinan ne’e nia rohan mak kongresu extraordináriu FFTL la realiza maka Timor-Leste sei hetan sansaun husi FIFA.

Jornalista: Vito Salvadór