Hatutan.com, (14 Outubru 2024), Díli- Movimentu Amante Futeból Timor-Leste, José Luis Oliveira, konsidera kazu falsifikasaun idade jogadór selesaun nasionál Jaimito Antonio da Costa Soares no António da Costa Soares Moniz, hatudu instituisaun Federasaun Futeból Timor-Leste (FFTL) seidauk moos no sei domina ho mafia futeból sira.

Lee Mós: Fundadór no Antigu Jogadór Selesaun Nasionál Ezije FFTL Responsabiliza Aktu Falsifikasaun Idade

Edifisiu FFTL. Foto/Dok

Movimentu Amante Futeból Timor-Leste, José Luis Oliveira, hateten bainhira Amante Futeból moris iha 2015 ezije kedas reforma iha FFTL, maibé rezultadu hatudu mudansa iha estrutura FFTL la hotu tamba ne’e ema sira ne’ebé konsidera mafiozu ba futeból iha Timor-Leste kontinua iha FFTL no ida-ne’e mak halo to’o agora kazu falsifikasaun idade jogadór selesaun nasionál kontinua akontese no nafatin akontese too ikus mai AFC fó sansaun ba jogadór sira.

Nia afirma dezenvolvimentu futeból iha Timor-Leste dezde tinan rua ikus ne’e la la’o, no falsifikasaun domina nafatin, prátika sira ne’ebé la tuir espíritu desportivizmu kontinua la’o tamba ema sira mafiozu mak kontinua iha FFTL

“Imi haree futeból la la’o, subsídiu kada tinan husi FIFA no AFC mai Timor-Leste ne’e kontinua, gasta de’it ba saláriu sira iha ne’ebá no ema sira iha ne’ebá la hatene servisu too agora liga mós la la’o ona. Se ita ko’alia dezenvolvimentu no talentu futeból ba jogadór sira ne’e so bele halo liu husi kompetisaun ne’ebé rutina, tamba ita bele iha treinadór selesaun nasionál ne’ebé mai husi fulan ba mos kuandu la iha kompetisaun rutin, imposivel iha jogadór selesaun nasionál di’ak ruma ba ekipa nasionál Timor-Leste nian,” José Luis Oliveira ba Hatutan.com iha nia servisu fatin Faról, Segunda (14/10/2024).

Fundadór Klube Karketu Díli FC ne’e mós argumenta liután katak kompetisaun liga no kompetisaun rutina iha Timor-Leste para kuaze tinan rua resin no ezekutivu FFTL hahú ho pratika sira uluk, halo falsifikasaun idade ba jogadór ekipa selesaun nasionál, atu nune’e, Timor-Leste bele iha ekipa para ba kompete atu hetan subsídiu ne’ebé nia finalidade mak sei mout no hela metin de’it iha mafia sira nia bolsu no jogadór ho futeból iha Timor-Leste kontinua hakdasak no sai aat liután.

Kompetisaun liga ka jogu rutina sira iha rai-laran mak bele sai hanesan eventu ba kaderiza jogadór, se jogu liga sira ne’e laiha Timor-Leste sei la hetan jogadór selesaun nasionál ida di’ak no ikus mai mak kazu falsifikasaun idade sempre akontese no ida ne’e hamonu imajen Timor nian iha mundu futeból.

Movimentu Amante Futeból Timor-Leste, José Luis Oliveira

Amante Futeból ne’e mós konsidera mafiozu sira iha FFTL la hatene oinsá dezenvolve Futeból maibé hatene de’it mak osan subsídiu husi FIFA no AFC, ida-ne’e mak akontese no uluk Timor-Leste hetan ona sansaun husi AFC no ida-ne’e sai hanesan lisaun ida atu hadi’a no kombate buat ida falsifikasaun ne’e lae, mosu mai kazu ne’ebé nafatin ho lideransa foun sira ne’ebé ema hotu-hotu tau esperansa ba.

Nia haktuir iha Indonézia mafiafFuteból iha federasaun ne’e kombate lidera husi Polísia Repúblika Indonézia (POLRI, sigla Indonézia) no agora iha Timor-Leste Komandante F-FDTL no Komandante Jerál PNTL mak iha ezekutivu FFTL, maibé krime falsifikasaun sira ne’e buras iha ne’ebá no halo moe de’it Timor-Leste nia naran.

“Ba ha’u estrutura atuál FFTL sira la merese ona iha ne’ebá, tenke akontese kongresu para hodi hili lideransa foun ba FFTL nune’e liga lao no kombate falsifikasaun sira ne’e iha Federasaun.” tenik nia.

Ezekutivu FFTL Benefisia Malu ho Osan Subsídiu husi FIFA no AFC

Movimentu Amante Futeból Timor-Leste, José Luis Oliveira hateten haree ba akontesimentu no lala’ok lideransa sira FFTL nia hatudu sira benefisia malu ho osan subsídiu husi FIFA no AFC hodi sakrifika tiha dezenvolvimentu Futeból ba rai ida ne’e.

“Sira iha Federasaun ne’e benefisia malu de’it, balun simu osan iha instituisaun estadu ne’ebé servíl ba no simu tan iha federasaun, maibé la halo buat ida ba Futeból, ida ne’e inkompativel ona tamba simu saláriu husi fatin rua maibé prestasaun laiha, no Futeból iha Timor-Leste mate dadauk ona ne’e.” Hateten José Luis Oliveira.

Nia hatutan ho akontesimentu falsifikasaun idade ba jogadór ekipa selesaun nasionál no sansaun husi AFC bele mos akontese sansaun seluk ne’ebé bo’ot no dalaruma FIFA no AFC bele hapara subsídiu kada tinan ne’ebé FFTL simu, tamba ho falsifikasaun ida-ne’e nu’udár indikadór ida katak Futeból la l’ao no hatudu momoos katak subsídiu husi FIFA no AFC ne’ebé kada tinan FFTL simu sangate de’it.

Uluk Amante Futeból deteta katak relatóriu finansas ne’ebé kada tinan FFTL haruka ba AFC no FIFA ne’e relatóriu falsu, no auditor ne’e mos sira falsifika hotu no ida-ne’e atu hateten katak iha FFTL ne’e mafiozu mak nakonu iha laran no halo sasán falsu mak barak, ne’e mak halo futeból iha Timor-Leste la dezenvolve ba oin ne’e.

“Solusaun ba oin mak kongresu tenke muda ema sira ne’e, maibé tamba sa mak sira lakohi haka’as an atu halo kongresu tamba sira enjoy ho situasaun ne’e, atividade no kompetisaun futeból laiha mós sira simu saláriu nafatin.” Tenik nia.

Nia subliña lideransa FFTL atuál laiha kapasidade totál atu jere Futeból tamba ne’e mosu falsifikasaun ida ba jogadór tamba ne’e sira tenke responsabilidade ba aktu ne’ebé sira komete.

To’o notísia ne’e publika Hatutan.com tenta atu halo konfirmasaun ho parte ezekutivu FFTL maibé parte resepsionista husu atu marka audiénsia ba tempu seluk tamba ezekutivu sira FFTL nian laiha tempu no sei halo servisu seluk.

Lee Mós: Jogador Selesaun Nasionál Na’in-rua Falsifika Idade no Hetan Penalidade hosi AFC

Jornalista: Vito Salvadór