Hatutan.com, (15 Outubru 2024), Díli—Prezidente Repúblika (PR), José Ramos-Horta fó posse bá embaixadór foun Timor-Leste (TL) bá Reinu Tailândia Francisco Tilman Cepeda no Rui Manuel Hanjam bá Uniaun Emiradus Árabe (UEA).

Prezidente Repúblika (PR), José Ramos-Horta fó posse bá embaixadór foun Timor-Leste (TL) bá Reinu Tailândia Francisco Tilman Cepeda no Rui Manuel Hanjam bá Uniaun Emiradus Árabe (UEA) iha Palásiu Prezidensiál Nicolau Lobato Bairru-Pité, tersa (15/10/2024). Foto: Elio dos Santos da Costa.

Embaixador Timor-Leste bá Reuni Tailándia, Francisco Tilman Cepeda ho fiar simu responsabilidade ida ne’ebé Estadu no Governu fó, hodi troka embaixadór ne’ebé remata ona misaun atu reprezenta Estadu TL. 

Lee Mós: UEA Konvida Xanana Partisipa Konferénsia COP28

“Agradese bá konfiansa ne’ebé Prezidente Repúblika no Primeiru-Ministru fó mai ha’u atu sai hanesan Embaixadór bá Reunu Tailándia,” Francisco Tilman Cepeda hateten Palásiu Prezidensiál Nicolau Lobato Bairru-Pité, tersa (15/10/2024).

Prióridade sira Governu fiksa ona ho programa oi-oin ne’ebé hala’o ho Tailándia iha kooperasaun, Tailándia iha ajénsia ida mak durante ne’e suporta maka’as TL maka Tailándia Internasionál Coorporation Ajensia ne’ebé halo kooperasaun  ho Timor-Leste no fó oportunidade barak bá Timoroan sira atu dezenvolve-an iha área oin-oin hanesan treinu diplomátiku, treinu bá ministériu sira hanesan turizmu, agrikultura no saúde.

“ida ne’e la’o kleur ona, ha’u sei buka explora tán área saida mak presiza ita atu hatama ba kooperasaun ne’e,” nia hateten.

Embaixadór Timor-Leste ba UEA, Rui Manuel Hanjam konsidera nomeasaun ida-ne’e hanesan primeiravez sai Embaixadór bá UEA ninian, iha prióridade ne’ebé presiza haree.

Bá dala uluk liu Rui Hanjam hakarak agradese bá Prezidente Repúblika ne’ebé fó konfiansa, bá Primeiru-Ministru no mós Ministériu Negósiu Estranjeiru no Kooperasaun ho mós entidade hotu-hotu atu bele sai hanesan Embaixadór iha UEA.

“UEA hanesan país ida ne’ebé kompostu hosi Estadu hitu. Sira nia kresimentu ekonómiku depende bá minarai ho gás. Sira komesa halo diversifikasaun bá ekonomia, atu la’ós depende de’it bá mina ho gás maibé sira mós halo alternativu sira seluk atu bele sustenta hosi parte ne’ebé halo parte hosi mina ho gás,” Rui Manuel Hanjam hateten.

Tanba ne’e prióridade importante sira sei konsulta ho entidade hotu-hotu, no sei haree bá prioridade ne’ebé liga liu bá Planu Estratéjiku Dezenvolvimentu Nasionál tanba bainhira haree kona-bá mina nian, haree Timor-Leste nia rekursu umanu ne’ebé iha futuru sei loke hanesan politékniku enjeñaria iha Suai ne’ebé foku bá mina.

Kona-bá diversifikasaun ekonomia haree mós hanesan investimentu ne’ebé foku liu bá iha área fábrika ho buat sira ne’ebé haree katak UEA avansadu tebe-tebes.

Alende ne’e, haree mós kapasitasaun rekursu umanu bá jestaun liu-liu iha Timor aban bainrua karik iha aeroportu iha Abudabhi, depois sidade ida tuir fali mai mak Dubai aeroportu ida ne’ebé bo’ot iha mundu ne’e tanba jestaun bá aeroportu presiza aprende hosi sira-nia esperiénsia.

Mandatu Embaixadór sira-nian pratikamente tinan tolu no bainhira mak arranka, agora sei hala’o hela preparasaun kleur liu fulan ida.

Jornalista: Vito Salvadór