Hatutan.com, (18 Outubru 2024), Maubisi-Komunidade Aldeia tolu ho nia abitante liu 100 iha  Suku Maubisi Vila, Postu Administrativu Maubisi, Munisípiu Ainaro, tinan barak ona moris la ho eletrisidade.

Lee Mós: Ramos-Horta Husu Populasaun Tau-Matan bá Meiu-Ambiente Rabilau

Eletrisidade ne’ebé fó naroman bá área Festival Kultural iha Rabilau. Foto/Lazaro Pereira Quefi

Maske daudaun ne’e sira haksolok no dahur no animadu ho konsertu muzikál  iha festival kulturál Rabilau nian ho ukun na’in-sira, hahú husi Prezidente Repúblika, José Ramos-Horta to’o membru Governu balun ho nia funsionáriu nomeasaun polítika sira, inklui funsionáriu administrasaun balu, tékniku sira no seluk-seluk tan, maibé sira sente laran susar tanba tinan barak ona sira la bele asesu naroman eletrisidade hanesan agora iha Rabilau.    

 Komunidade atus resin ne’ebé horik iha Aldeia Raimori, Aldeia Balibo ho Aldeia Golala, to’o ohin loron, balu sei suni deit lampu uza mina-rai no balun sunu-lilin deit no balun ne’ebé iha kapasidade finanseira naton sosa solar panel hodi bele hetan naroman ba eletrisidade.  

Xefe Suku Maubisi Vila, Uilsunivio Mendonça, informa preokupasaun ne’ebé  komunidade sira iha Aldeia Riamori, Balibo ho Golala to’o  agora seidauk asesu  eletrisidade, maske sira-nia parte submete ona  proposta  ba parte relevante, liuliu Eletrisidade Timor-Leste, Empreza Públiku (EDTL,E.P), maibé seidauk iha rezultadu serteza.

Maski nune’e, Xefe Suku ne’e konfirma katak hafoin festival kulturál iha Rabilau termina, nia ho ekipa sei tuun halo identifikasaun atu nune’e molok to’o fulan-Dezembru, tinan ne’e, parte sira bele iha ona solusaun ba sofrimetu naruk komunidade aldeia tolu iha Suku Maubisi Vila nia laran ne’e.

Bá Hatutan.com iha Rabilau, Sesta (18/10/2024), Uilsunivio Mendonça hateten nu’udár autoridade lokál nafatin buka meius atu koopera ho parte relevante, liuliu EDTL, E.P atu identifika  komunidade sira ne’ebe mak to’o agora sei moris iha nakukun laran iha Suku Maubisi Vila rasik.

“Iha tinan ida ne’e ami garante katak ahi sei lakan hotu no EDTL, E.P komprometidu bá ami,  katak sei rezolve problema ne’ebé mak ami nia komunidade enfrenta,” nia hateten.

Komunidade balun iha aldeia tolu ne’e hola inisiativa rasik sosa fiu hodi dada no liga tutan husi viziñu sira, maibé bá hirak ne’ebé hela dook malu la konsege dada husi viziñu sira, nune’e, sira sunu de’it lampu uza mina-rai, hanesan tempu sira iha tinan 1975 to’o mai 1990.

Iha fatin hanesan komunidade hosi Aldeia Riamori, Raimundo de Jesus Soares hateten iha Raimori uluk kedas la iha eletrisidade, moris terus liu, maske haree bá komunidade seluk nia uma hetan naroman eletrisidade.

“Ami nia ahi mak seidauk tama se falta, inklui laiha bee-moos, ami iha uma-kain 10-resin mak to’o agora seidauk asesu ba eletrisidade. Agora ami sosa tenaga Surya mak uza. Ha’u husu ba Estadu atu rezolve ami nia ahi ba uma-kain 10 resin iha Aldeia Riamori ne’e,” Raimundo de Jesus Soares hateten.

Nia hatutan, Estadu dehan atu lori ahi mai maibé to’o agora tinan hira tan ona seidauk lori mai labarik sira kalan atu Estuda mós arraska ba ahi eletrisidade.

Jornalista Estajiáriu: Lazaro Pereira Quefi