Hatutan.com, (18 Outubru 2024), Díli-Komisáriu Comissão Anti-Corrupção (CAC), Rui Pereira dos Santos, Kinta (17/10/1014), fó posse bá Komisariu Adjuntu na’in-rua atu tulun nia lidera instituisaun CAC iha Kuartu Mandatu bá periodu 2024-2028.

Lee Mós: Komisáriu CAC Rui Pereira Kompromete Lori Autór Kazu Korrupsaun Tama To’o Becora

Termu juramentu Rosario Salsinha Araújo bá Adjuntu Prevensaun no Sensibilizasaun no Miguel Acacio Faria bá Komisáriu Adjuntu Serviços de Apoio e Cooperação CAC. Foto/CAC

Iha komunikadu ne’ebé Hatutan.com asesu iha Sesta ohin, fó sai katak, serimónia tomada posse nian ne’e hala’o iha Salaun Ministeriu Justisa, Colmera, Díli.

Nomeiasaun ofisial ne’ebé anúnsia iha Jornál Repúblika Sesta 11 fulan-Outobru 2024 Série II, No. 41 ne’e, indika Rosario Salsinha Araújo bá Adjuntu Prevensaun no Sensibilizasaun no Miguel Acacio Faria bá Komisáriu Adjuntu Serviços de Apoio e Cooperação. Nomeasaun ba kargu iha CAC esklusivamente mandatu Komisáriu nian bazeia ba Lei No. 8/2009 15, Jullu 2009.

Formasaun estrutura CAC nian ho ninian tarefa sira bazeia bá Dekretu Lei No. 23/2015 no Dekretu Lei n.º 24/2015.

Maske nune’e, estrutura ida ne’e seidauk kompleta tanba Komisariu Adjuntu CAC bá Asuntu Investigasaun Kriminál nia kandidatu tenke mai hosi PNTL no Ministériu Públiku (MP).

Molok ne’e Komisáriu CAC, Rui Pereira, haruka tiha ona pedidu bá komandu PNTL, Ministériu Interior ho Prokuradória Jerál Repúblika (PGR-sigla Portugés), atu autoriza sira ninia ema esperiente ruma hodi tulun hala’o servisu CAC nian. Infelizmente, kandidatu hosi PNTL la hetan autórizasaun hosi Ministru Interior (MI), Francisco da Costa Guterres, liuhosi karta resposta Komisário PNTL nian no kandidatu hosi MP hafoin sorumutu entre Komisáriu ho Prokuradór Jerál Repúblika, Alfonso Lopez, maibé posibilidade sei mai iha tinan oin no Komisáriu Rui sei haruka mós karta ofisial ida bá iha Konsellu Superior Ministériu Públiku (KSMP).

Rosário Araújo nu’udár Espesialista Anti Korrupsaun (EAC) kareira iha instituisaun CAC ne’ebé hetan fiar hosi Komisáriu Rui Pereira dos Santos, iha mandatu Da-haat Komisariu nian hodi asume kargu nu’udár Komisáriu Adjuntu bá Prevensaun no Sensibilizasaun. Rosário iha ona esperiénsia natoon iha luta kontra korrupsaun hahú hosi mandatu da-huluk Komisariu nian funsionamentu iha tinan 2010.

Komisáriu Adjuntu bá Asuntu Servisu Apoiu no Kooperasaun Miguel Acacio Faria nu’udár advogadu foinsa’e ida ne’ebé sei tulun mós Komisáriu Rui dos Santos iha parte administrasaun, finansas no kooperasaun esterna.

Ho Esperiénsia Komisáriu Adjuntu CAC na’in-rua (2) ne’ebé iha Lisiensiatura Direitu sei tulun duni Komisáriu Rui Pereira iha ninian kombinasaun koñesimentu, orizonte no esperiénsia sira hosi líderes prinsipais CAC nian ne’e hodi bele mellora tebes servisu luta kontra korrupsaun iha rai doben Timor Leste.

Ho posse bá Komisáriu Adjuntu na’in-rua ne’e, garante katak, iha Kuartu Mandatu Komisariu CAC nian sei hetan suporta, apoiu polítika, finanseiru sufisiente hodi hala’o funsaun ho mellor tuir lei. Nomós bele kontribui rezultadu estratéjiku ida inovativu no refleta nesesidade sira nasaun Timor-Leste nian iha luta koletiva prevene no kombate korrupsaun.

Jornalista: Rogério Pereira Cárceres