Hatutan.com, (21 Outubru 2024), Ermera- Prezidente Repúblika (PR), José Ramos-Horta husu komunidade hotu-hotu hadomi ambiente no labele soe fo’er arbiru tamba fó impaktu ba mudansa klimátika no saúde públika.

Lee Mós: Foin-sa’e 700 Partisipa Permayouth Camp ho Tema Kuda Bee Hamoris Komunidade

Ema kontínua soe foer ka lixu iha fatin-fatin. Foto/Vito Salvadór

Prezidente Repúblika (PR), José Ramos-Horta ba foin-sa’e sira iha Permayouth Camp 2024 ne’ebé konsentra iha Aldeia Kaitarahei, Suku Fatukeru, Postu-Administrativu Railaco, Munisípiu Ermera, Segunda (21/10/2024), husu  favór labele soe lixu arbiru, tamba iha Timor tomak sei haree nafatin lixu naklekar iha dalan ninin, tasi-ibun, mota-laran no soe la tuir fatin, husik de’it lixu sira iha fatin públiku no iha dalan sira husi Díli ba munisípiu, lixu iha fatin-fatin ema husik de’it la hamoos.

Ramos-Horta uluk sei hanesan Ministru Negósiu Estranjeiru no Kooperasaun sempre mobiliza funsionáriu sira no komunidade sira ba hamoos lixu iha tasi-ibun sira no iha fatin sira ne’ebé ema soe fo’er arbiru, maibé too agora komunidade sira nafatin soe lixu arbiru.

“ita tama karreta husi Díli too Same estrada ninin sira ne’e lixu barak loos, no husi Díli ba Baucau laiha metru kuadradu ida  moos, iha dalan sempre iha lixu naklekar tun-sa’e iha dalan. Ita ba Suku, Aldeia, lixu lubuk ida los,” Prezidente Repúblika José Ramos-Horta hateten.

Xefe Estadu husu atu mestre sira, xefe aldeia,  xefe suku sira tenke hatudu lideransa ida ezemplár ba hamoos fo’er, atu povu sira no estudante sira hola konsiénsia hodi hamos lixu no tau iha nia fatin própria.

Adelino Mendonça husi Munisípiu Aileu  ne’ebé partisipa iha Permayouth Camp 2024 hateten problema mudansa klimátika ne’ebé ohin loron hasoru nia faktor ida mós mai husi fo’er ka lixu ne’ebé soe arbiru tamba ne’e hanesan komunidade buka atu hamutuk ho komunidade sira seluk liu-liu foin-sa’e sira hodi hare no tau matan ba ida ne’e.

“Ha’u hanoin hanesan foin-sa’e ida sei ko’alia ho ha’u nia maluk joven sira seluk atu fó importánsia ba oinsá tau lixu sira iha nia fatin hodi kontribui ba ambiente ida matak no buras ba hotu-hotu,” Adelino Mendonça  hateten.

Lixu kontínua lekar iha fatin-fatin iha teritóriu Timor-Leste. Foto/Vito Salvadór

Filomena Ximenes Guterres husi Munisípiu Baucau hateten mensajen importante husi Prezidente Repúblika mak kona-bá oinsá atu tau lixu ka soe lixu iha nia fatin tamba ida ne’e bele kontribui ba ambiente mos no halo ema saudavel.

“Ha’u hanoin loos dunik katak ita hotu-hotu seidauk iha konsiénsia atu soe lixu iha nia fatin tamba ne’e importante dunik atu tau lixu iha nia fatin atu nune’e labele fó impaktu negatif ba ema nia saúde públika no mos ba animál sira inklui ai horis sira,” Filomena Ximenes Guterres hateten.

Governu iha ona planu atu jere lixu sira iha sidade Díli no mós munisípiu sira ba too iha aldeia, maibé komunidade sira mak dalaruma susar atu tau lixu iha nia fatin.

Jornalista: Vito Salvadór