Hatutan.com, (22 Outubru 2024) Díli– Daudaun ne’e pasiente na’in-86 seidauk bele bá halo tratamentu iha ospitál sira iha rai-li’ur tanba Governu seidauk fó desizaun.

Lee Mós: Dívida Millaun $20 iha Ospitál Estranjeiru Sira Mai husi 2021

Pasiente sira ne’e nia estatutu  pendente hodi hein desizaun Governu foti desizaun tanba iha implikasaun direta bá orsamentu Estadu.

Família sira hein hela pasiente ne’ebé halo tratamentu iha Sentru Saúde Vera Krúz. Foto/Dok

Diretór Nasionál Servisu Ospitál  (DNSH), Carlos de Carvalho Guterres, informa iha tinan 2024 iha pasiente ne’ebé tama hamutuk na’in-434 no hirak ne’ebé pendente ne’e hamutuk 86.

“Ida pendente ne’e la’ós la bá, maibé hein desizaun Governu, ne’e Ministra Saúde de’it mós labele foti desizaun tanba ne’e gastu orsamentu Estadu ne’ebé, mais agora daudaun ami halo prosesu pagamentu balu la’o ona, depois ami verifika hela dokumentu balu mós la’o daudaun,” Carlos de Carvalho Guterres informa bá jornalista sira hafoin halo audiénsia ho Komisaun F-Parlamentu Nasionál, Tersa (22/10/2024).

Bá ospitál sira iha  rai-li’ur, hanesan iha Malázia, Singapura no Indonézia ne’ebé Governu deve ka seidauk halo pagamentu, tuir Carlos de Carvalho Guterres, presiza halo verifikasaun didi’ak tanba ne’e uza sistema hodi asegura tanba osan ne’e povu no nasaun nian.

Jornalista Estajiária: Zita Menezes