Hatutan.com, (23 Outubru 2024), Díli-Jornalista na’in-22 ne’ebé Gabinete Sekretáriu Estadu Komunikasaun Sosiál (SEKOMS) organiza hodi halo kobertura loron-tolu no kalan-tolu durante eventu Festivál Kulturál iha Rabilau, la simu sira-nia perdiam kompletu.

Lee Mós: SEKOMS “La Entende” Regra DSA Internasionál bá Viajen Estranjeiru, Jornalista Hatutan.com Sai Vítima iha Bali

Abinete kalan Festival Kulturál Rabilau, 18 Oytubru 2024. Foto/Lázaro Pereira Quefi

Jornalista na’in-22 husi Televizaun Grupo Média Nacionál (GMNTV) na’in-rua (2), Ajénsia Notisioza TATOLI, Institutu Públiku (I.P) na’in-rua (2) (Tétum ho Melayu), Televizaun Edukasaun Timor (TVE) na’in-ida (1), Loluwary na’in-ida (1), Hatutan.com  na’in-ida (1), Jornál INDEPENDENTE  na’in-ida (1), Dili Post  na’in-ida (1), Timor Post na’in-ida (1), Suara Timor Lorosa’e (STL) na’in-ida (1), Media One Timor na’in-ida (1), Lafaek News na’in-ida (1), Gardamor TV na’in-ida (1), média LABEH  na’in-ida (1), MFTV na’in-ida (1), Media Mudansa (MD) na’in-ida (1), Orluli News na’in-ida (1), VIP TV na’in-ida  (1), SAPNews TL na’in-ida (1), ho Jornalista Timor Post na’in-ida (1) ne’ebé detakadu iha Manufahi, organiza hosi SEKOMS hodi fasilita sira sai husu Díli bá halo kobertura Festival Kulturál Rabilau hosi loron 16 to’o loron 18  no viajen fali husi Rabilau mai Díli iha loron 19 fulan-Outubru 2024.

Sura husi loron sai hosi Dili bá toba iha Rabilau, jornalista sira-ne’e   kompleta sira nia viajen kobertura loron-tolu no kalan-tolu, nune’e Tuir Dekretu-Lei Númeru 20/2010, 01 Dezembru kona-bá Rejime Suplementu Remuneratóriu sira iha Administrasaun Públika, jornalista sira ne’e merese bá hetan perdiam $40.00 kada loron no tamba kompleta loron tolu no kalan-tolu, maka sira iha direitu bá perdiam $120.00 kada jornalista.

Iha realidade SEKOMS ne’ebé halo komunika direta ho Palásiu Prezidensiál hodi prosesa perdiam bá jornalista na’in-22  selu ka konsidera deit perdiam loron-rua ba sira ho montante kada jornalista simu $80.00.

Dekretu-Lei Númeru 20/2010, 01 Dezembru kona-bá Rejime Suplementu Remuneratóriu sira iha Administrasaun Públika define katak perdiam bá viajen munisípiu fahe bá kategoria tolu;

1. Iha pratika nivel membru Governu kada loron tomak to’o kalan ida $80.00 (Mézmu rejime ida-ne’e la aplika bá membru Governu)
2. Nivel diretór sira kada loron otmak to’o kalan ida $60.00
3. Funsionáriu baibain kada loron to’o kalan ida $40.00

Ho nune’e, jornalista sira ne’ebé organiza husi SEKOMS bá halo kobertura bá Festival Kulturál  Rabilau tanba kompleta loron-tolu no kalan tolu, iha direitu atu hetan perdiam kompletu ho montante kada jornalista $120.00 la’ós $80.00 kada jornalista ba loron tolu no kalan tolu nian iha Rabilau.

Iha loron 16 fulan-Outubru 2024, tuku 06:30 dadeersan Otl, jornalista sira ne’e konsentra hotu ona iha Palásiu Governu hodi aranka bá Rabilau, Maubisi ne’ebé lidera husi  Asesór SEKOMS, Noémio Falcão no sira hola parte iha konvoiu hamutuk ho delegasaun Prezidente Repúblika (PR), José Ramos-Horta.

Molok aranka bá Rabilau, Segunda (14/10/2024), tuku 11:00 dadeer Otl Asesór SEKOMS Noémio  Falcão, organiza breafing média ho jornalista sira iha Gabinéte SEKOMS nian, Palásiu Governu.  Hafoin breafing ne’e, Asesór SEKOMS orienta Jornalista hirak ne’e bá foti sira-nia osan viájen ka “perdiem” loron-tolu nian iha Palásiu Prezidénsial. Maibé, parte finansa Prezidénsia Repúblika  nian informa bá jornalista sira ne’e katak, perdiem bá jornalista sira, loron rua de’it ho montante $80.00 kada jornalista. Tanba ne’e maka jornalista deside atu lakohi ona bá Rabilau, tanba osan bá loron tolu, maibé fó de’it perdiem loron nian.

Gabinete Finansas Predénsia Repúblika nian informa katak sira bazeia de’it bá karta hosi SEKOMS ne’ebé dehan de’it loron-rua (2). Entaun, jornalista sira deside fila hotu. To’o lokraik mak hetan asesór  SEKOMS Noémio Falcão konfirma fila-fali liuhosi grupu WhatsApp Rabilau nian, katak, jornalista sira  bele bá foti sira-nia osan perdiem loron-rua nian kada jornalista $80.00 no sei halo kobertura de’it bá loron-rua  iha Rabilau.

Asesór Noémio Falcão mós fó hatene bá jornalista sira ne’e katak, atu halo de’it kobertura bá loron-rua nian tuir peridiem ne’ebé simu. Maibé, to’o iha enseramentu Festivál Kulturál, Asesór SEKOMS ne’e husu jornalista sira atu kontribui halo kobertura bá seremónia enserramentu hodi kompleta loron-tolu no kalan-tolu.

Iha Kurata, 23 Outubru 2024, haleu tuku 14:50 lorokraik Otl, Jornalista hosi Hatutan.com, Lázaro Pereira Quefi ho jornalista Cesar Pires hosi Média Lolowari ne’ebé reprezentante sira-nia maluk jornalista na’in-20 seluk to’o iha Gabinéte SEKOMS hodi konfirma kona-bá perdiam loron ida nian ne’ebé to’o oras ne’e seidauk halo pagamentu.

Asesór SEKOMS, Noémio Falcão ne’ebé atende jornalista na’in-rua hosi Hatutan.com ho Loluwari iha gabinéte SEKOMS  hatán hodi dehan de’it katak, sira mós oras ne’e prosesu hotu hodi komunbika ho Kaza Sívil Prezidénsia Repúblika atu bele prosesa tán osan perdiem loron ida nian bá jornalista na’in-22 ne’ebé semana ida liubá SEKOMS moboliza no organiza halo kobertura iha  Festival Kulturál Rabilau.

Jornalista Estajiáriu: Lázaro Pereira Quefi