Hatutan.com, (24 Outubru 2024), Bobonaro- Prezidente Asosiasaun Futeból Bobonaro (AFB), Domingos Gouveia Moniz, deklara Federasaun Futeból Timor-Leste (FFTL) iha problema ho orsamentu, nune’e afeta ba atividade futeból, liu-liu kompetisaun regular sira hanesan Liga Timorense no kompetisaun sira iha nivel munisípiu la la’o dezde fulan ikus tinan 2023 to’o mai 2024.

Lee Mós: Mosaun Sensura Hasoru Prezidente Asosiasaun Futeból Bobonaro

Prezidente Asosiasaun Futeból Bobonaro (AFB), Domingos Gouveia Moniz hato’o deklarasaun ne’e hodi responde ba preokupasaun no mosaun sensura ne’ebé membru AFB sira halo hasoru nia no ezekutivu sira AFB tamba durante tinan ida resin kompetisaun regular nivel munisípiu liu-liu iha AFB paradu total.

Edífisiu FFTL. Foto/Tome da Silva

“Ha’u nia hanoin kona-bá AFB la realiza kompetisaun iha fim do ano 2023 to’o mai 2024 ne’e tamba FFTL enfrenta  problema bo’ot tamba ne’e alokasaun orsamentu husi Federasaun ba Asosiasaun sira kuaze tinan rua ona laiha. Ha’u atu realiza kompetisaun hodi osan ida ne’ebé, kompetisaun ne’e ita hala’o presija selu Arbitrajen, buat hotu presija osan, jogadór se mak manan nia presija prémiu, no buat sira ne’e hotu mak la realiza kompetisaun ne’e,” Prezidente AFB Domingos Gouveia Moniz ba jornalista sira iha nia rezidénsia iha Suku Holsa, Bobonaro, Kinta (24/10/2024).

Nia subliña liután katak Futeból iha munisípiu Bobonaro la la’o tamba FFTL mos hasoru problema orsamentu no agora ho deit Prezidente interinu.

Portavós no reprezentante Membru AFB no prezidente Klube FC MARIA TAPO, Domingos Lopes ba jornalista sira iha Jináziu Munisípiu Maliana, hateten durante ne’e Liga Futeból Timor-Leste la la’o no kompetisaun sira iha nível munisípiu kuaze paradu mesmu FFTL kada tinan simu hela subsídiu husi FIFA no AFC.

“AFB durante ne’e nunka realiza torneiu ka kompetisaun iha tinan 2024 nia laran,  AFB nunka organiza jogadór atu ba tuir selesaun nasionál no lori jogadór sira atu ba tuir eventu iha nasional,” Domingos Lopes hateten.

Too notísia ne’e publika, Hatutan.com tenta ona atu halo konfirmasaun ho parte FFTL liu husi Sekretáriu Jerál Gregório Correia, maibé la fó resposta no husu atu marka ba loron selok tamba sei konfirma lai ho Prezidente interinu FFTL Tenente Jenerál Domingos Raul “Falur Rate Laek “ molok ko’alia ba media.

Tuir fonte konfirmadu iha FFTL ne’ebé lakoih temi nia identidade hateten kada tinan FFTL simu apoiu husi Federation Internationale de Football Association (FIFA) ho montante $ 1,000,000.00, Asian Football Confederation (AFC) $500,000.00 no ASEAN Football Federation (AFF)  $ 30,000.00.

Jornalista: Vito Salvadór