Hatutan.com, (24 Outubru 2024), Bobonaro- Estrutura Membru Asosiasaun Futeból Bobonaro (AFB) husi klube hamutuk 17, Kinta (24/10/2024), hala’o konferénsia imprensa iha Jináziu Maliana, Munisípiu Bobonaro hodi hato’o pedidu mosaun sensura hasoru Prezidente Domingos Gouveia Moniz ho estrutura ezekutivu tamba durante mandatu la kontribui ba dezenvolvimentu futeból iha munisípiu Bobonaro.

Lee Mós: Klube 17 iha Bobonaro Submete Pedidu bá FFTL Husu Desizaun Kongresu Estraordináriu AFB

Membru Asosiasaun Futeból Bobonaro aprezenta mosaun sensura hasoru prezidente asosiasaun liuhusi konférensia imprensa, Kinta (24/10/2024). Foto/Vito Salvadór

Portavós ekipa mosaun sensura no Prezidente ba Klube FC, Maria Tapo Domingos Lopes lori estrutura membru Asosiasaun Futeból Bobonaro deklara mosaun sensura ba órgaun hotu iha Asosiasaun Futeból Bobonaro no demite ba órgaun Prezidente Asosiasaun Futeból Bobonaro (AFB) Domingos Goveia Moniz, ho estrutura tomak bazeia ba Estatutu Asosiasaun Artigu 15.

Nia afirma razaun halo mosaun sensura ne’e tamba estrutura atuál durante mandatu laiha vontade di’ak atu kontribui ba hadi’a no dezenvolve Futeból iha Munisípiu Bobonaro.

“La halo enkontru ho membru asosiasaun tomak hodi kolia kona ba futuru dezenvolvimentu futeból iha Munisípiu Bobonaro. La hato’o relatóriu durante mandatu, no nunka realiza torneiu ka kompetisaun iha tinan 2024 nia laran no mós la halo hikas kongresu estraordináriu ne’ebé pendente hela,” Maria Tapo Domingos Lopes deklara.

Nia subliña liután katak estrutura atuál mós la fó resposta kona-bá membru asosiasaun sira-nia karta ne’ebé dirije iha dia loron 07 fulan-Outubru 2024 kona-ba Re-Kongresu ka Re-Konferénsia Asosiasaun Futeból Bobonaro (AFB).

Durante prezidente Domingos Gouveia Moniz nia mandatu mos Asosiasaun Futeból Bobonaro (AFB) nunka organiza jogadór atu ba tuir selesaun nasionál Timor-Leste nian iha nasionál. Durante mandato Asosiasaun Futeból Bobonaro (AFB) nunka organiza jogadór sira atu ba tuir eventu iha nasional.

“Ho razaun hirak ne’e hotu maka, ami lakon konfiansa ba Prezidente ho estrutura tomak iha Asosiasaun Futeból Bobonaro (AFB),” nia tenik.

Porta Voz ne’e mós hatutan katak membru asosiasaun rasik sei organiza hamutuk atu hala’o kongresu estraordináriu hodi hili estrutura foun ho programa dezenvolvimentu futeból iha Munisípiu Bobonaro iha tempu tuir mai.

Hatán ba asaun ne’e, Prezidente AFB Domingos Gouveia Moniz ba jornalista sira iha nia rezidénsia iha Suku Holsa, Bobonaro, hateten iha fulan ida liubá, iha ajendamentu husi nasionál atu realiza kongresu nivel munisípiu no marka prezensa husi Klube membru AFB nian hamutuk 19, maibé ikus mai kansela ho razaun ne’ebé la klaru tamba ne’e prosesu ne’e la too ba nia rohan, nune’e federasaun husu ba membru sira AFB atu halo karta hodi realiza hikas konferénsia no membru Asosiasaun sira mak tenke finansia rasik maibé too agora seidauk realiza.

Prezidente AFB Domingos Gouveia Moniz. Foto/Vito Salvadór

Nia rekoñese mós katak membru asosiasaun sira lori dunik karta ida ba iha sede AFB maibé nia orienta atu membru sira dirije direita ba iha Federasaun tamba Federasaun mak iha kompeténsia ba realiza konferénsia nivel munisípiu no asosiasaun ezekuta de’it.

“Mandatu ida ha’u nian ne’e mós sei hotu iha fulan-Novembru nia rohan, tinan ne’e, no agora ha’u ativu hela,” Domingos Gouveia Moniz hateten.

Nia argumenta mosaun sensura bainhira ezekutivu sira asosiasaun halo sala no kontra regra FIFA no FFTL nian foin mak bele halo mosaun sensura.

“Mosaun sensura hasoru ha’u ne’e kona-bá saida, asosiasaun halo sala saida no kontra ona, estatutu Federasaun nian artigu ida ne’ebé?, be durante ha’u nia mandatu ne’e prodús ona árbitru 60 resin no treinadór kuaze 40 no kompetisaun hala’o iha munisípiu mesmu la la’o regular, ida ne’e mak asosiasaun halo.” Nia esplika.

Mesmu hetan mosaun sensura husi membru sira AFB maibé sei partisipa iha kongresu extraordináriu FFTL nian hanesan Prezidente AFB too konferénsia Assosiasaum nian realiza no Prezidente eleitu ba AFB simu posse no eleitu ho legitimidade husi kongresista sira iha konferénsia ka kongresu asosiasaun nian.

Sei la ré–kandidata iha konferénsia AFB

Prezidente AFB Domingos Gouveia Moniz hateten iha kongresu AFB sei iha posibilidade la rekandidata an tamba Prezidente asosiasaun ne’e laos simu osan, servisu gratuita.

“Ha’u hatete ba sira, bainhira maka realiza konferénsia AFB ha’u 60% sei la kandidata an. Ha’u hatete ba sira deputadu de’it ha’u lakohi satan prezidente asosiasaun, mais tamba futeból no Bobonaro ne’e hanesan armazén ba futeból ita kontribui,” Domingos Gouveia Moniz tenik.

Nia husu ba membru asosiasaun hotu iha Munisípiu Bobonaro atu kalma la’o tuir prosesu tamba iha rejimentu no estatutu hateten katak bainhira ema ida atu kandidata nia an tenke mínimu tinan hat iha Ezekutivu.

Nia subliña sei koopera ho membru sisiraa realizasaun kongresu ka konferénsia AFB nian, no bainira termina mandatu karik sei entrega ho didi’ak, para bola iha munisípiu Bobonaro ne’e bele lao ba oin nafatin ho susesu liután.

Klube sira ne’ebé hatama karta petisaun ba FFTL no halo asaun mosaun sensura hasoru Prezidente AFB Domingos Gouveia Moniz mak hanesan FC MADIRAN, FC RIVER BULOBO, FC MARIA TAPO, FC MEMORIA, FC DEGANADORES , FC RUSA, FC USlLU, FC ABOMKASE, FC ZEBRA, FC DUABESI, FC SAHOL,  FC HUL TOPOL, FC SOBO AI, CTFJTL-M. B, COR. ARBT FUTSAL, COR.ARBT FOTEBOL no ikus liu BOBONARO LEGEND.

Jornalista: Vito Salvadór