Hatutan.com, (30 Outubru 2024), Díli– Ministru Juventude Desportu Arte no Kultura (MJDAK), Nélio Isaac Sarmento,  lori Governu nia naran afirma, loloos ne’e atividade desportiva sira labele hetan intervensaun hosi poder polítiku, poder ekonómiku no satán intervensaun forsada hosi militár.

Lee Mós: Aleixo Cobra Halo Ona Keixa bá MP

Ministru Juventude Desportu, Arte no Kultura (MJDAK), Nélio Isaac Sarmento.

Ministru Nélio Isaac Sarmento, afirma asuntu ne’e, hodi responde kona-bá dezentendimentu ne’ebé mosu iha Kongresu Estraordináriu Federasaun Futeból Timor-Leste (FFTL), Sábadu (26/10/2024), iha ne’ebé membru FALINTIL-Forsa Defeza Timor-Leste (F-FDTL)  husi Unidade Polísia Militár (PM) simu orden hosi Tenente-Jenerál Domingos Falur Rate Laek nu’udár prezidente interinu FFTL tama to’o iha plena kongresu nian hodi atua ka lori sai forsadamente  Prezidente Asosiasaun Futebol Dili Leste, Aleixo Cobra.

MJDAK Nélio Isaac Sarmento, dehan, nia mós rona ona informasaun sira kona-bá akontesimentu ne’e. Maibé, to’o oras ne’e seidauk simu relatóriu eskríta ruma, tanba Komisaun Nasionál Desportu (CND-sigla Português), sei halo hela análize ho nia relatóriu sira.

Tuir Nélio Isaac antigu Sekretáriu Jerál FFTL ne’e katak atu saida de’it mak akontese, organizasaun desportiva sira hotu, ninia finalidade ka nia output ne’e maka hakarak oinsá mak dezenvolve desportu futebol. Maibé, kada organizasaun iha ninia regra, iha nia prosedimentu, ninia manuál, ka ninia bíblia ne’ebé tau bá nia para atu la’o loloos ne’e mak ninia estatutu.

“Kongresu ka Assembleia FFTL nian hanesan aktu demokrátiku ida. Entaun, desportu ne’e laiha influensia hosi aktu polítiku, aktu ekonómiku, sá tán aktu forsa militár,” Ministru Nélio Isaac Sarmento, informa bá Jornalista sira, hafoin partisipa iha sorumutuk Konsellu Ministru ordináriu iha Palásiu Governu, Díli, Kuarta (30/10/2024).

Nélio Isaac mós rona katak, iha kongresu ne’e mosu duni intervensaun balu mais, hanesan governu, nia espera katak, sira iha FFTL bele tuur rezolve ho didi’ak. Tanba ema hotu hatene katak, hosi inísiu  FFTL ne’e iha grupu ona, entaun, ita labele kontinua halo ida-ne’e, depois grupu seluk mosu tán.

“Nusá mak ita la tuur hamutuk, ko’alia bá malu para ita halo solusaun ida de’it, para tuir mai laiha tán problema hanesan ne’e. Ne’ebé, ha’u hanesan Governu, fó hanoin de’it bá organizasaun desportivas hotu, liuliu bá FFTL, atu nafatin kaer bá sira nia estatutu, hodi la’o ka servisu tuir lala’ok organizasaun desportiva FFTL nian,” Nélio Isaac fó hanoin.

Governante ne’e informa mós kona-bá karta ne’ebé nia haruka Prezidente Interinu FFFTL, Domingos Raúl “Falur Rate Laek” iha semana hirak kotuk bá, atu haree asuntu sira ne’e. Konteúdu karta ne’e, nia husu atu prezidente interinu FFTL, Domingos “Falur Rate Laek” kaer nafatin de’it estatutu, no sente katak, iha ema infernál organizasaun nia laran maka halo aktu ruma ne’ebé dezakredita prezidente interinu nia naran no hamonu kredibilidade FFTL nian, hasai tiha de’it.

“Hasai tiha de’it, para husik prezidente servisu independentemente haree bá ema hothotu, la’ós haree bá grupusida de’it. Ida ne’e mak ha’u sujere. Mais, prontu, agora, ita hein lai relatóriu hosi komisaun nasionál desportu, depois, governu sei introdús buat ruma, relasiona ho kongresu anuál FFTL nian,” Nelio Isaac Sarmento tenik.

Úniku iha Mundu, TL Mak Militár Invade Kongresu FFTL

Ministru Nélio Isaac Sarmento, dehan, úniku iha mundu,  Timor-Leste de’it mak militár sira invade bá kongresu estraordináriu FFTL nian.

“Ha’u bele dehan katak, úniku, ha’u akompaña hothotu kongresu organizasaun futeból iha mundu, inklui FIFA, buat ida intervensaun seguransa, aktu militár iha kualkér kongressu, ne’e proibidu. Maibé, sé ita hatudu ida ne’e, hanesan direta ita intervensaun bá iha kna’ar loloos FFTL ninian, liuliu bá FIFA nian,” Nélio Isaac hatán.

“Ita-boot sira hatene katak, FIFA ninia regras mak ne’e, laiha intervensaun bá poder polítiku, poder ekonómiku, sá tán bá militár. Ne’e nunka la akontese. Prontu, ita espera katak, ho buat sira ne’e hotu, ita hothotu dehan hakarak hadomi futeból, hakarak kuidadu futeból, depois ita hatudu aktu hanesan ne’e, ema haree ita ne’e hanesan ne’e, ita iha poder, bele manda buat hothotu. Ne’e labele akontese iha bola,” tenik Nélio Isaac.

Governante ne’e sujere katak, FFTL ho meius rasik, ho ezekutivu sira bele tuur haree didi’ak, solusiona, tanba nia lakohi fahe Timor ne’e bá grupu-grupu, maibé, nia hakarak haree rai ida ki’ikoan hanesan Timor ne’e, hanoin ida de’it, hamutuk, lori dezenvolve bola ne’e bá oin.

Jornalista: Rogério Pereira Cárceres