Hatutan.com, (04 Novembru 2024), Díli-Ministériu Juventude, Desportu, Arte no Kultura (MJDAK) atribui ona orsamentu rihun $13- resin bá Conselho Nacional Juventude Timor-Leste (CNJTL) hodi gasta bá eventu komemorasaun “Masákre Santa Krús bá dala-33 no selebrasaun Loron Nasionál Juventude dala-19 iha territóriu nasionál.

Lee Mós: Projetu Monumentu Memoriál Masakre Santa Krús Hahú iha 2021 To’o Ona 2024 Mós Seidauk Finaliza

CNJTL halo konferénsia imprensa, Segunda (04/11/2024). Foto/Tome da Silva

Ministru Juventude Desportu Arte no Kultura, Nélio Isaac Sarmento, informa, orsamentu hirak ne’e MJDAK enterga ona bá iha CNJTL maka organiza, hamutuk ho joven jerasaun 12 Novembru, no iha mós grupu joven sira hodi organiza atividade sira no governu fó de’it apoia ténika no finansiamentu.

“Governu fó apoiu to’o munisípiu sira, to’o postu sira sei organiza hotu. Orsamentu bá 12 Novembru ne’e liu $130,000.00. Ne’e bá fatin hothotu, to’o iha postu sira, inklui atividade nasionál ne’e,” Ministru Nélio Isaac Sarmento, informa bá Jornalista sira iha Palásiu Governu, Díli, foin lalais.

Prezidente Conselho Nacional Juventude Timor-Leste (CNJTL), Maria Dadi Soares Magno, dehan, ema hotu hatene katak, estadu Repúblika Demokrátika Timor-Leste, rekoñese katak partisipasaun juventude indiskutível, bainhira ko’alia kona-bá sira nia sakrifísiu, sira-nia dedikasaun, sira-nia abnegasaun, sira-nia vida ne’ebé maka kontribui bá iha luta hodi liderta Timor-Leste sai nasaun ida ne’ebé maka independente no sibaranu.

“Iha kontestu luta hothotu, antes kedas hosi 12 fulan-Outubru 1989, mai 28 fulan-Outubru 1991, mai 12 fulan-Novembru 1991, depois mai to’o iha pontu kulminante ida Referendu, estadu fó rekoñesimentu bá 12 Novembru sai hanesan Loron Nasionál bá Juventude ne’ebé mak ho istória ne’ebé mak ita hahú kedas hosi luta juventude nian hahú kedas hosi OPJTL, mai Juventude Asuwain no Juventude Rezisténsia, Masa Juventude no estudantil nia kontribuisaun boot bá TL nia independénsia,” Prezidente CNJTL, Maria Dadi Mago, hateten bá Jornalista sira liuhosi konferénsia imprénsa iha kna’ar fatin Farol-Dili, Segunda (04/11/2024).

Komemorasaun dala-33 Masakre Santa Krús, no Selebrasaun tinan-19 Loron Nasionál Juventude nian bá tinan ida-ne’e, hala’o ho tema “Orgullu ho Ita-nia Istória, no Hamutuk Dezenvolve Ita-nia Nasaun Ida Prósperu iha Futuru”.

Maria Dadi Magno konsidera tema ida ne’e importante bá juventude, no povu TL, atu hatete loron istóriku sira ne’e. CNJTL hamutuk ho organizasoens lubuk ida, Jerasaun 12 (J12), Juventude Hadomi Natureza (JHN), Alumni Parlamentu Foinsa’e, Asosiasaun Defisiénsia Timor-Leste, Centro Juventude Comoro (CJC), União Escuteiro Timor-Leste (UETL), Cruz Vermelha, Aliança Nacional Contra Tabaco (ANCT).

“Iha eventu selebrasaun, organizasaun ualu (8) mak lidera, ne’ebé maka prezide hosi CNJTL, no eventu Komemorasaun bá tinan-33 Masákre Santa Krús, lidera hosi Juventude 12 Novembru,” nia informa.

Kona-bá orsamentu rihun $130 resin ne’e sei atribui rihun $22 bá Juventude 12, rihun $39 bá organizasaun 8, ne’ebé CNJTL rasik mak lidera. Nune’e mós restu hosi rihun $48 mak atribui bá iha Centro Juventude sira iha Munisípiu hotu, atu selebra to’o Postu administrativu.

“Tanba ne’e, ho biban ida ne’e, atu husu katak, ho komemorasaun no selebrasaun, husu bá sentru sira atu koopera, atu servisu hamutuk ho estrutura baze, konsellu nasionál juventude munisípiu no postu sira ho estrutura baze komite 12 nia ema sira iha munisípiu no postu,” Marai Dadí Magno fó hanoin.

Ajenda atividade sira bá komemorasaun loron importante rua ne’e, iha 05 Novembru 2024, CNJTL hahú dadauk ona atividade selebrasaun no komemorasaun loron importante rua ne’e iha Munisípiu Lautem.

Loron 06 to’o 07 Novembru 2024 iha atividade Talk Show, ne’ebé mak sei fahe parte rua. Ida, kona-bá Masákre nian maka sei konvida oradór prinsipál no importante sira. Rua nian mak sei konvida juven millenial sira ne’ebé mak ho prespetiva kona-bá juventude.

Abertura iha 08 Novembru, 9 Novembru hala’o Atividade Sertáme, 10 Novembru iha kompetisaun diskursu entre Estudante sira ho lian Inglés, 11 Novembru iha Reflesaun. Iha mós feira nasionál bá juventude sira no kompetisaun druam band bá estudante sira.

Jornalista: Rogério Pereira Cárceres