Hatutan.com, (05 Novembru 2024), Díli-Suspeitu na’in-neen (6) ne’ebé halo atake fíziku hasoru Tenente Koronél Laurentino Gusmão “Mau-Ular” iha área Aubaka, Triloka, Baucau,  Kinta (31/10/2024), bá hatán ona iha Tribunál Distritál Baucau (TDB).

Komandante PNTL Munisipiu Baucau, Superintendente Polisia, António de Sá. Foto/Dok.Hatutan.com.

Komandante PNTL Munisípiu Baucau, Superintendente Xefe Polísia António De Sá, haktuir kronolojia katak, iha Kinta kalan, 31 fulan-Outubru 2024, Tenente Koronél Laurentino Gusmão “Mau-Ular”, hamutuk ho família ho sira-nia karreta viajen hosi Díli atu liubá selebra loron matebian nian (Finadu) iha rai moris fatin, Ostiku.

Bainhira to’o iha estrada área Aubaka, Suku Triloka, Postu Administrativu Baucau Vila, Munisipiu Baucau, hale’u tuku 23:46 Otl, grupu joven sira balu mosu derrepente iha estrada ibun, uza ho sasán kro’at sira ka arma branka, inklui fatuk no ai, sira diretamente tuda hasoru Ofisiál F-FDTL ne’e ho nia família sira to’o karreta ne’ebé nia kondús, espellu parte karreta nia kotuk mós rahun hotu.

Komandu PNTL Baucau mós simu kedas informasaun hosi Pesoál Servisu Sekreta sira no mós hosi komunidade sira rasik kona-bá akontesimentu kazu insidente ne’e rasik. Nune’e, komandu orienta  membru sira tun bá halo intervensaun no atuasaun no konsege kaer suspeitu sira hamutuk ema na’in-neen (6).

“Komandu orienta kedas ita-nia seguransa iha terrenu, bá kedas iha fatin akontesimentu, konsege kaptura autór sira ne’ebé maka envolve iha kazu asaltu ne’e no autór prinsipál na’in-rua, ita kaptura kedas iha momentu ne’e, ho natureza flagrantedelito, no lori kedas bá komandu, no ita konstitui kedas, bá hatama nia iha sela polisia nian 72 oras,”  Superintendente Xefe Polísia  António De Sá, informa bá Jornalista sira iha Díli, Tersa (05/11/2024).

PNTL Baucau buka tuir mós autór sira seluk ne’ebé mak envolve iha nia grupu ne’e hodi ikus mai kaptura suspeitu na’in-neen (6).

Durante atuasaun iha terrenu, komandu PNTL Baucau nia membru na’in-rua mós kanek tanba hetan tuda hosi grupu joven sira ne’e. Membru Polísia na’in-rua ne’e; na’in-ida nu’udár Ofisial Polísia Suku (OPS) Triloka nian, ida seluk kolokadu nu’udár Servisu Informasaun Polísia (SIP).

“Insidente ne’ebé mak akontese iha Baucau, iha kinta kalan, rezulta karreta ida rahun, no membru ha’u nian, na’in-rua  kanek,” nia hateten.

Hatán kona-bá motivu loloos hosi kazu ne’e, Komandante António De Sá, dehan kazu ida ne’e la’ós foin mak mosu, maibé  grupu ida ne’e envolve iha problema kuaze dala-tolu, ka atu dala-haat tiha ona.

Problema anterior, sira baku malu iha parte Ossu, sira ne’e mesak uma-laran de’it. Entaun, autór prinsipál ida ho inisiál Maulai, nia uluk halo problema iha Ossu ne’ebá, konsege baku vítima ida to’o baixa iha Ospitál iha sala ICU no to’o lakon nia vida.

“Kazu sira ne’ebé akontese iha Triloka ne’e, kuaze grupu ida ne’ebé mak hanesan, autór mak ida ne’e (Maulay), ho ninia grupu. Iha ha’u nia tempu, kala hetan tiha fiar hosi komandu jerál, bá, akontese kazu ne’e, ita halo intervensaun imediata, ita kaptura kedas autór sira ne’e, inklui ninia membru sira ne’ebé envolve iha ninia grupu, ita kaptura, no horiseik, ita aprezenta ona bá iha Tribunál, halo primeiru interrogatóriu judisiál,” António De Sá hateten.

Baze bá istória akontesimentu sira antes nian, Komandante António De Sá deskonfia katak, grupu sira ne’ebé halo asaltu bá Ofisiál F-FDTL nian iha Triloka ne’e mai Grupu Arte-Marsiál (GAM) ida, mesmu nune’e, sira ne’ebé envolve la urtiliza atributu arte-marsiál nian.

“Ne’e kazu klásiku, problema klásiku, ne’e uluk kedas. Tanba ita haree konfrontu iha fatin-fatin ne’e, kuaze mai hosi grupu juventude ne’ebé mak ho ninia istória, beckground ne’e mai hosi ninia GAM no GAR. Ida ne’e mak akontese,” António De Sá tenik.

Jornalista: Rogério Pereira Cárceres