Hatutan.com, (07 Novembru 2024), Díli- Sekretáriu-Jerál Partidu Frente Revolucionário do Timor-Leste Independente (FRETILIN), Mari Bin Amude Alkatiri, deklara prontu enfrenta justisa iha Timor-Leste kon-aba akuzasaun sira abuzu poder durante asume knar prezidente Autoridade Rejiaun Administrativu Oé-Cusse Ambeno, inklui kestaun Ró Haksolok.

Lee Mós: Xanana Deside Tenke Halo Auditória Internasionál bá Ró Haksolok no Aviaun ZEESM

Sekretáriu-Jerál Partidu FRETILIN, Mari Bin Amude Alkatiri. Foto/Elio dos Santos da Costa

“Ha’u la mai para atu ko’alia ida-ne’e mas ha’u dehan buat ida de’it, hein too desizaun final, lalika ko’alia naranaran, ha’u ábitua ona tinan hirak-ne’e lori de’it mak auditoria RAEOA nian para ataka ha’u. Horikalan ne’e ha’u toba dukur tebes, ha’u la preokupa tamba ha’u iha argumentu no hatama ona ba Tribunál iha kontraditóriu, ha’u la preokupa, Tribunál deside, deside ona no se la deside hein to’o deside.” Sekretáriu-Jerál Partidu FRETILIN Mari Bin Amude Alkatiri hateten hodi responde jornalista sira liuhosi konferénsia imprensa ne’ebé hala’o iha Sede Comite Central FRETILIN (CCF), Comoro, Kinta (07/11/2024).

Sekretáriu-Jerál no antigu Prezidente  Autoridade RAEOA ne’e argumenta mós katak lolos Ministériu Públiku devia preokupa ho sira ne’ebé fó osan millaun ba millaun fila ba estadu, auditoria tenke barak iha ne’ebá.

“Ha’u hanesan responsavel, ha’u la dun ema ida, ha’u asume ha’u nia responsabilidade, ha’u la dun fali ha’u nia kolaboradór, biar la’ós ha’u mak fó orden ha’u asume, mas ne’e responsabilidade solidária, uluk iha krize oin-oin iha Timor ne’e la’ós ha’u mak halo mós ha’u asume no ba para dunik iha Ministériu Públiku, uluk ne’e hanesan arguidu ona, agora ne’e mandadu, se ha’u hakarak ba tur iha ne’ebá ha’u ba tur, se ha’u lakohi ba, ha’u la ba. Tamba ne’e maka ha’u mesak de’it mak ba tur iha ne’ebá, laiha tan ema seluk, tamba ha’u respeita tribunál no órgaun judisiáriu sira tamba ha’u mak harii,” Alkatiri hateten.

Jornalista: Vito Salvadór