Hatutan.com, (07 Novembru 2024), Díli—Polísia Nasionál Timor-Leste (PNTL) liu-hosi Departamentu Investigasaun Kriminál (DIK), Seksaun Forensic, deskobre ona ruin hosi saudozu Lino da Costa “Olo-Cassa” nian ne’ebé mate iha ai-laran durante reziste iha luta bá libertasaun nasionál.

Deskobrimentu ida-ne’e ekipa Forense PNTL deskobre liu-hosi prosesu teste DNA bá amostra ruin saudozu Olo-Cassa nian iha Indonézia, hosi fulan-janeiru tinan ne’e no rezultadu pozitivu hodi anunsia iha fulan outubru foin lalais.

Lee Mós: 2025, Governu Rekruta Membru PNTL 300

Nune’e, iha Kinta 07 Novembru 2024, Komandu PNTL realiza serimónia entrega rezultadu teste DNA ne’e bá Komandu FALINTIL Forsa Defeza Timor-Leste (F-FDTL).

Ministériu bá Asuntu Kombatentes no Libertasaun Nasionál (MAKLN) reprezenta hosi Sekretáriu Estadu bá Asuntu Veteranu (SEAV), Cesar dos Santos da Silva “Merak”, inklui família ho oan-ki’ak sira mós partisipa iha serimónia ne’e iha sala Auditóriu Kuartél Jerál PNTL, Caicoli.

Sekretáriu Estadu Cesar “Merak” esplika, prosesu autópsia ka teste bá saudozu sira nian ruin ne’e, hala’o dala-barak ona, maibé seidauk detekta. Iha fali Saudozu “Olo-Cassa” nia ruin mak foin deskobre bá dala-uluk.

“Loos duni, mate-ruin ida-ne’e pertense bá família oan ki’ak sira ne’ebé mai hosi família Lino da Costa Oli-Cassa. Tanba ida-ne’e mak ha’u lori ministériu hateten de’it katak, agora ministériu iha koordenasaun ho instituisaun relevante, liu-liu PNTL atu haree prosesu ida-ne’e. Ami sei haree nafatin, tanba restus mortais ne’e balun agora daudaun iha hela HNGV atu submete bá prosesu autópsia,” Merak hateten.

MAKLN haruka ona mós pedidu bá Komandu PNTL atu kontinua halo tán autópsia ka teste bá ruin rua ne’ebé oras ne’e hela ekipa Forense PNTL nia liman. Governu mós sei haree ho neneik tanba deskobrimentu bá prosesu ida-ne’e foin bá dala-uluk.

MAKLN promete atu nafatin haree katak, iha possibilidade duni atu bele halo autópsia, nune’e família sira mós bele hatene.

Komandante Jerál PNTL, Komisáriu Jerál Polísia Henrique da Costa esplika, Forensik nia kna’ar atu halo ezaminasaun sira DNA ninian.

PNTL nia membru sira iha seksaun forense, sira iha kapasidade bá prosesu sira nune’e tanba hetan ona formasaun, treinamentu ne’ebé mak relevante bá hala’o servisu sira espesífiku ida ne’e.

Komandu PNTL mós estabelese ona nia ligasaun ho parseiru sira seluk hosi País amigu Australia ho Repúblika Indonézia, iha ne’ebé sira apoiu membru Forense sira hodi halo halo teste bá ida ne’e.

“Ita halo komunikasaun ho Universidade ida iha Indonézia hodi halo teste iha ne’ebá. Ita haree katak, nia rezultadu pozitivu, bá oin, karik, ita hetan nafatin konfiansa, ita sei mantein nafatin komunikasaun ho sira parte Indonézia ninian atu bele apoia ita bá iha teste DNA ninian,” Komisáriu Henrique hateten.

Problema Orsamentu

Maski membru PNTL iha ona kapasidade bá hala’o teste bá buat sira ne’e, maibé Komisáriu Henrique dehan, komandu hasoru hela difikuldade ida maka kona-bá orsamentu.

Prosesu ida foin dadauk bá kotuk ne’e, membru Forense sira prontu, preparadu, tanba hetan apoiu orsamentu hosi Governu liuhosi Ministeriu bá Asuntus Kombatentes no Libertasaun Nasionál.

“Ohin mós ha’u ko’alia ona ho eselénsia sekretáriu estadu, katak bá futuru, ami prontu hodi apoiu nafatin, depois exelénsia sira bele haree mós oinsá apoiu fundus ruma, atu ita nia membru sira bele halo servisu. Ida ne’e tanba ita hatene, teste ne’e halo iha rai-liur, presiza billete aviaun ninian, presiza otél bá sira toba, presiza transporte ruma para sira hodi halo movimentu iha ne’ebá. Ida ne’e mak ita husu bá iha ministériu relevante,” Komisáriu PNTL ne’e preukupa.

Iha fatin hanesan, Saudozu “Olo-Cassa” nia oan mane, Domingos Correia, lori família tomak nia naran, agradese lutadór sira ne’ebé mak oras ne’e sei moris, nomós bá eroi sira ne’ebé mak fó ona aan bá libertasaun rai ida ne’e.

“Agradese tebtebes bá iha IX Governu liuhosi Primeiru-Ministru, Maun Boot Kay Rala Xanana Gusmão, hanesan ami nia aman ne’ebé mak sempre iha ami nia sorin, suporta ami iha kualker situasaun. Nia sempre hamriik hamutuk ho ami, hodi fó suporta bá iha prosesu ida ne’e tomak,” Domingos Correia agradese.

Saudózu “Olo-Cassa” nia oan mane mós lori família tomak agradese bá Ministru Gil da Costa Monteiro “Oan-Soru”, tanba tau esforsu boot tebtebes bá iha prosesu teste sira nia aman ninia ruin. Ministru interior ne’ebé mak lidera PNTL, hodi fó sira nia profisionalizmu tomak bá iha prosesu ida ne’e, no iha ministériu saúde ne’ebé mak iha ligasaun forensic ne’ebé mak servisu hamutuk iha prosesu ida ne’e.

“Hosi parte família, ami labele temi hotu ema ida-idak, maibé, ami hakarak agradese hotu kedas bá esforsu tomak, liu-liu bá iha komandu jenerál F-FDTL, Tenente Jenerál Falur Rate Laek, ne’ebé ke inisia prosesu ne’e tomak,” tenik nia.

“Ohin loron ita hetan rezultadu, ami família agradese tebtebes. Servisu Polisia Nasionál Timor-Leste nian liuhosi diresaun Forensik, profisionál tebtebes, maske ita iha limitasoens oioin, maibé, sira fó sira-nian esforsu tomak bá iha prosesu ida ne’e. Ne’ebé, hanesan família, dala-ida tán, ami agradese,” nia agradese.

Domingos Correia dehan, parte família sei koordena nafatin ho Governu liuhosi MAKLN, hodi deside fatin atu haloot sira nia aman “Olo-Cassa” nian ruin, entre iha Jardim dos Herois Metinaro, no bele mós Saudozu nia rai-moris fatin.

Jornalista: Rogério Pereira Cárceres