Hatutan.com, (14 Novembru 2024), Díli- Prezidénsia Repúblika hamutuk ho Governu hola inisiativa promove komponente haat importante hanesan espozisaun siénsia no teknolojia, atletismu ho atividade Díli Maratona, taekwondo no ikus liu mak Timor Island Adventure ne’ebé sei hahú husi Malaka-Timor Osidentál (NTT, sigla Indonézia) no remata iha Munisípiu Baucau nu’udar meius ba promosaun turizmu Timor-Leste ba mundu internasionál.

Vise-Primeiru-Ministru no Ministru Koordenadór ba Asuntu Sosiál no Ministru Dezenvolvimentu Rural no Abitasaun Komunitária, Mariano Assanami Sabino. Foto/Tome da Silva

Prezidente Komisaun organizadora no Vise-Primeiru-Ministru no Ministru Koordenadór ba Asuntu Sosiál no Ministru Dezenvolvimentu Rural no Abitasaun Komunitária, Mariano Assanami Sabino, ba jornalista sira iha Palásiu Prezidensiál, Kinta (14/11/2024), hateten vizaun prezidente nian ba promosaun turizmu nasional, iha komponente haat, importante ne’ebé Prezidénsia Repúblika hamutuk ho governu halo.

“Husu ba komunidade, ba estudante sira, universitáriu  sira no intelektual sira, atu mai partisipa iha loron 15 too loron 16 fulan-Novembru 2024 iha Palásiu Pezidente,” Mariano Assanami Sabino informa.

Komponente seluk maka, sei halo liu-liu ba desportu nian, ne’ebé sei halo iha loron 16 fulan-Novembru tinan ne’e, hahú iha  tuku 06:00 dadeer, dalan sei taka, hotu-hotu sei konsentra iha Palásiu Prezidénsia hodi hala’o Dili Maratona, ne’ebé maka ema internasionál barak sei mai tuir, husi Indonézia no Kénia, maibé husu mós ba joven sira, liuliu atleta nasionál sira para atu bele partisipa.

Iha mos taekwondo iha loron 26 to’o loron 27 fulan-Novembru, ne’ebé maka sei loke ba públiku no partisipa husi atleta Timoroan no mai mos husi internasionál. Iha mós Boxing iha loron 30 fulan-Novembru, sei partisipa mos husi Boxista sira husi Indonézia, Tailándia no Filipina.

Komponente ida mais importante mos mak Timor Island Adventure ne’ebé maka sei hahú ih loron 08 to’o loron 13 fulan-Dezembru, ne’ebé sei hahú husi Malaka no sei remata iha Munisípiu Baucau.

Vise-Primeiru-Ministru Mariano Asanami Sabino hateten  kona-ba orsamentu ne’e, orsamentu  gabinete Prezidensiál nian, ne’ebé jere mós iha ne’e no mós hetan apoiu husi instituisaun ajénsia sira ne’ebé maka fo apoiu.

Timor-Leste nia turizmu ho valores oin-oin, iha turizmu relijiozu, tanba hanesan nasaun maioria Katólika, iha nia valores no iha nian identidade kulturál ne’ebé maka importante.

Iha mós turizmu ekologi, ne’ebé ema hotu hatene área lubuk ida ne’ebé protejida, iha tasi no foho ne’ebé importante tebes-tebes atu promove.

Fatin sira ne’ebé batalla, luta tiru malu, hatene katak akontese Masakre Santa Krús mós, ema lubuk ida maka involve, maibé la’ós ida deit, fatin sira ne’ebé talla no  fatin sira ne’ebé hotu iha valór istóriku no iha futuru mai sei haree atu promove sai fatin turizmu nian.

Jornalista: Vito Salvadór