Hatutan.com, (14 Novembru 2024), Díli- Prezidente Repúblika (PR), José Ramos-Horta kontente governu responde situasaun arte-marsiál ho di’ak no situasaun seguransa iha territóriu nasionál kontroladu no ema hotu maris hakmatek.

Lee Mós: Governu Kontínua Suspende Atividade Prátika Arte-Marsiál bá Fulan-6 Tan

PR Ramos-Horta ho PM Xanana konversa iha Palásiu Prezidensiál, Kinta (05/09/2024). Foto/Elio dos Santos da Costa

Deklarasaun Prezidente Repúblika José Ramos-Horta nian ne’e hato’o husi Primeiru-Ministru Kay Rala Xanana Gusmão ba jornalista sira hafoin enkontru semanál ho Xefe Estadu iha Palásiu Prezidensiál Nicolau Lobato, Kinta (14/11/2024).

“Ko’alia buat balun ho Prezidente Repúblika, ko’alia kona-bá situasaun sira, Prezidente Repúblika kontente nafatin tanba arte-marsiál bele responde ho di’ak, no Xefe Estadu husu para tau nafatin iha ulun ba para labele kria problema tanba rai presiza pás,” Xanana Gusmão haktuir.

Iha enkontru semanál ne’e ko’alia mós kona-ba selebrasaun loron proklamasaun Independénsia 28 Novembru ne’ebé sei hala’o iha Rejiaun Administrativu Oé-Cusse Ambeno (RAEOA) no governu prepara hela, la hatene bainaka sesé mak atu mai, tanba sei iha loron 14 tan tanba ne’e governu nafatin halo preparativus sira.

Governu liu husi Sorumutuk Konsellu Ministru ordináriu, Kuarta (30/10/2024), iha Palásiu Governu, aprova  projetu Rezolusaun Governu nian ida hodi kontínua halo suspensaun ka hapara atividade sira prátika grupu arte-marsiál nian bá fulan-neen (6) tán.

Iha Rezolusaun Governu ida ne’e extende, to’o loron 10 fulan-Abríl 2025, suspensaun bá ensinu, aprendizajen no prátika arte-marsiál no enserramentu temporáriu bá fatin no instalasaun hotu-hotu ne’ebé destinadu bá ensinu, aprendizajen no prátika arte-marsiál ne’ebé inisiálmente hetan aprovasaun hosi Rezolusaun Governu n. 17/2024, loron 24 fulan-Abríl.

Objetivu hosi Rezolusaun Governu nian ida-ne’e  atu konsolida no reforsa pás sosiál ne’ebé alkansa ona husi kedas fulan-Novembru tinan 2023. Ho abordajen ida ne’ebé konsideradu no kontroladu, hakarak atu iha futuru, permite prátika arte-marsiál nian iha de’it kontestu desportivu, hodi promove ezersísiu saudavel no kontribui ba edukasaun no formasaun sívika no umanista ba joven sira. Maibé, iha tempu ida-ne’e, nafatin mantein suspensaun ba ensinu, aprendizajen no prátika arte-marsiál no enserramentu temporáriu ba ninia fasilidade sira.

Jornalista: Vito Salvadór