Hatutan.com, (15 Novembru 2024), Dilí—Orsamentu Jerál Estadu (OJE) tinan 2025 ne’ebé alokadu bá Ministériu Edukasaun  (ME) ho montante $113.098.099 pasá iha debate espesialidade ho rezultadu votasaun a-favór 42 kontra 0 abstensaun 20.

Deputadu sira vota iha debate Orsamentu Jerál Estadu (OJE) tinan 2025 iha plenária, sesta (15/11/2024). Foto:Elio dos Santos da Costa.

Hosi totál orsamentu ne’e fahe bá kategoria lima mak hanesan, Saláriu no Vensimentu $92.383.226, Bens no Servisu $11.161.334, Transferénsia Públika $4.602.080, Kapitál Menór $1.054.214 no Kapitál Dezenvolvimentu $3.897.930.

Lee Mós: OJE 2025 Bá MF ho Montante $18,889,241 Pasa iha Espesialidade

Durante debate espesialidade ne’e Ministra Edukasaun, Dulce de Jesus Soares halo aprezentasaun no defende katak, alokasaun orsamentu ne’e bazeia bá nesesidade Ministériu nian atu responde bá kestaun sira liga ho edukasaun nian iha territóriu tomak durante tinan 2025.

“Ministériu Edukasaun halo ezersísiu boot ida, nune’e atividade no programa sira iha tinan 2025 sei la’o  duni,” Dulce de Jesus hateten iha plenária, sesta (15/11/2024).

MAKLAN  $207.069.136

Iha fatin hanesan, deputadu sira mós aprova Orsamentu ho totál $207.069.136  ne’ebé alokadu bá Ministériu Asuntu Kombatente Libertasaun Nasionál (MAKLAN).

Iha votasaun bá debate espesialidade ne’e ho rezultadu a-favór 45, kontra 0 no abstensaun 17.

“Orsamentu bá Ministériu Asuntu Kombatentes Libertasaun Nasionál passa,” Prezidente Parlamentu Nasionál, Maria Fernanda Lay hateten iha plenária, sesta (15/11/2024).

Hosi totál orsamentu ne’e fahe bá kategoria lima mak hanesan, Saláriu no Vensimentu $1.787.636, Bens no Servisu $5.945.982, Transferénsia Públika $195.515.922, Kapitál Menór $76.000 no Kapitál Dezenvolvimentu $3.739.596.

Jornalista Estájiaria: Zita Menezes