Hatutan.com, (18 Novembru 2024), Díli—Alokasaun Orsamentu bá Ministériu Obras Públikas (MOP) iha Orsamentu Jerál Estadu (OJE) tinan 2025 ho totál $270.757.350.

Diskusaun no aprovasaun proposta Orsamentu Jerál Estadu (OJE) 2025 faze espesialidade loron da-lima iha Parlamentu Nasionál, segunda (19/11/2024). Foto: Tomé da Silva.

Ministru Obras Públikas, Samuel Marçal aprezenta ona orsamentu ne’e iha Parlamentu Nasionál (PN),  no aprovadu iha sesta (15/11/2024) ne’ebé sei tau prioridade bá seitór tolu importante liu mak hanesan estrada ho ponte, bee moos no eletrisidade.

Lee Mós: Orsamentu bá ME $113.098.099 no $207.069.136 bá MAKLAN Pasá iha Debate Espesialidade

“Estrada ho ponte, eletrisidade ho bee mos ne’e mak sai prioridade bá orsamentu ne’e,” Samuel Marçal hateten hafoin partisipa debate espesialidade iha PN.

Ministru Samuel deklara katak, inundasaun ne’ebé durante ne’e sai problema boot maka problema valeta sira iha Díli laran ne’e halo kedan iha tempu naruk no seidauk hadi’a fali, nunka halo manutensaun bá estrada, drainazen no bá mota nune’e fó impaktu bá estrada ho ponte naksobu iha fatin-fatin nune’e atu hadi’a persiza kustu ne’ebé bo’ot.

Atu halo manutensaun bá fatin hirak ne’e la’ós halo iha tinan ida nia laran maibé presiza tempu naruk, nune’e iha tinan 2025 ne’e MOP sei tau prioridade bá fatin sira ne’ebé risku, ameasadu liu bá komunidade nia uma no bá fatin públiku.

Daudaun ne’e tékniku sira MOP nian halo hela prosesu alargamentu bá estrada no halo mós  levantementu bá dadus, nune’e bainhira iha indeminazasaun bele hatene kustu loloos no sei implementa iha tinan 2025.

Oras ne’e daudaun halo hela iha parte Becora, Elemloi to’o rate ain Manleuana, Fatuhada nian bá tasi ibun, no mós iha parte Ministeriu Defeza ne’ebé sei loke tán bá leten tuir predisaun bá futuru katak antisipa tráfiku ne’ebé sei makas iha tinan 5 ka 10 oin mai.

Orsamentu bá MOP pasa iha espesialidade iha loron sesta (15/11/2024) ho montante $270.757.350 ho rezultadu votasaun a favór 43, kontra 15 no abstensaun 5.

Orsamentu ne’e fahe ba kategoria salariu no vensimentu $9.182.148, Bens no servisu $19.032.404, Tranferénsia Públika $176.500.000, Kapitál Menór 0 no kapital dezenvolvimento $66.042.798.

Jornalista: Leopoldina de Carvalho