Hatutan.com, (26 Novembru 2024), Vientiane- Sekretariadu Association of Southeast Asian Nation (ASEAN) konsidera média nia servisu importante ba dezenvolvimentu sustentável iha rejiaun Sudeste Aziátiku.

Lee Mós: ASEAN Media Forum 2024 Fó Importánsia Papél Média iha Komunidade ASEAN

Panelista sira fó sira-nia hanoin kona-bá importánsia média iha dezenvolvimentu sustentavel ASEAN. Foto/Vito Salvadór

Diretór ba Diresaun Asuntu Komunidade Sekretariadu ASEAN, Lee Yoong Yoong iha enserramentu ba ASEAN Media Forum (AMF) 2024, hateten faktu simples tebes mak forum ne’e organiza atu dala ruma mós koko muda ka hanoin fila fali kona-bá saida mak di’ak liu kona-bá buat ne’ebé relevante, no mós kontaktu ho kolega komunikasaun sosiál sira.

Iha edisaun dahuluk ne’ebé hahú iha Filipina 2017, halo AMF la’o dook ona no tama ba tinan-ualu (8), no iha tinan oin mai sei halo iha Malázia no tuirmai sei iha nafatin no partisipante sira iha ne’e merese ba ida-ne’e.

Jornalista Hatutan.com, Vito Salvadór ne’ebé partisipa ASEAN Media Forum 2024 iha sidade Vientiane-Laos, informa sekretariadu ASEAN nian liu-liu AMF nafatin husu partisipante sira nia komentáriu atu iha AMF tinan sira tuir mai bele la’o ho di’ak no tuir hotu-hotu nia espetativa.

“Ami hakarak duni atu envolve média hodi lori dezenvolvimentu pozitivu iha buat ne’ebé ami bolu nu’udar rikusoin. Hosi fatin ne’ebé ha’u tuur hela, ha’u hakarak serbisu hamutuk ho ema ne’ebé lori progresu no dezenvolvimentu ba ASEAN, liu-liu iha Sudeste Aziátiku,” Lee Yoong Yoong iha nia diskursu ne’ebé hala’o iha Crowne Plaza Hotel, Vientiane, Segunda (25/11/2024).

Obrigadu ba partisipante hotu, ba sekretariadu no membru sira hotu ne’ebé apoiu iha AMF ne’ebé lao ho susesu di’ak tebes. Hein katak buat ne’ebé di’ak liu mak partisipante sira gosta tebes.

Hein katak partisipante sira sei aplika no fahe ho kolega média sira seluk kona-ba asuntu no materia sira iha AMF no hein katak sei hasoru malu fali iha AMF tinan oin.

Diskusaun ba tematiku importante rua

Partisipante sira iha AMF 2024 iha oportunidade ba halo diskusaun ho painél sira iha sesaun rua ne’ebé hatudu koñesimentu intelektual kona-ba “ASEAN Connectivity – Achievements and Prospects “ no “Dezenvolvimentu Sub-Rejiaun Mekong nian “ respetivamente.

Painél dahuluk, inklui Diretór Divizaun Konetividade Sekretariadu ASEAN nian Lim Chze Cheen; Peskizadór Lider, Programa Mudansa Klimátika iha Sudeste Aziátiku ISEAS-Yusof Ishak Institute Mirza Sadaqat Huda, Embaixadór Uniaun Europeia ba Laos PDR Mark Gallagher no Diretór Ezekutivu Institutu Mekong Suriyan Vicehitlekarn, ho panelista haat ne’e partisipante sira ezamina progresu, dezafiu no perspetiva konetividade rejionál ASEAN nian.

Durante diskusaun painél na’in-haat ne’e hotu, iha prinsípiu, konkorda katak ASEAN, uma ba ema millaun 650-resin, mak rejiaun ida-ne’ebé nakonu ho oportunidade boot. Liu husi infraestrutura ne’ebé forte liu atu liga ASEAN, tuir matadalan husi Planu Mestre kona-ba Konetividade ASEAN (MPAC) 2025, rejiaun ne’e sei kria rede rejionál ida ba ema no infraestrutura sira atu hadi’a dalan moris, servisu no viajen ema ASEAN nian.

Iha temátiku daruak kona-bá Dezenvolvimentu Sub-Rejiaun Mekong iha tinan 40 liu ba, aprezenta hosi panelista na’in-haat hanesan Diretór Sentru Estudu ASEAN husi Universidade Chulalongkorn Asst Prof. Sineenat Sermcheep, kooperasaun Area Lider ASEAN no GIZ Shamer Khanal, Embaixadór Yung Chanthalangsy husi Laos PDR, no Azhar Xefe Seksaun Konetividade Transporte no Lojístika Nasoins Unidas nian Komisaun Ekonómika no Sosial Azia no Pasífiku Jaimurzina Duclest.

Panelista na’in-haat iha sesaun daruak ne’e mós fahe sira-nia matenek no koñesimentu ba partisipante sira kona-bá saida mak Dezenvolve ona no esforsu signifikativu sira ne’ebé iha ba dezenvolvimentu sub-regional Mekang iha tinan 40 liubá, liuhosi asisténsia kapasitasaun husi parseiru dezenvolvimentu internasionál sira hanesan Asia Development Bank liu-liu iha área sira hanesan agrikultura, enerjia, ambiente, saúde, no dezenvolvimentu rekursu umanu.

Iha AMF 2025 ka AMF ba dala-VIII ne’e konklui ho Konversasaun ho Prezidente ASEAN ho Diretór Jerál (DG) Chatoulong Bouasisavath husi Departamentu ASEAN, Ministériu Negósiu Estranjeiru Laos PDR nian.

Iha sesaun ne’e, ko’alia liu kona-bá rezultadu sira ne’ebé Laos PDR hetan durante nia Prezidénsia ASEAN, nk Diretór Jeral Chatoulong aproveita oportunidade atu atualiza partisipante sira husi AMF kona-ba vizaun pos-2025 ASEAN nian ba rejiaun ne’e. Nia mós hala’o sesaun ida-ne’ebé matenek ho partisipante sira no iha interasaun ne’ebé ativu husi panelista sira no mos partisipante sira.

Ikus liu nafatin subliña mós katak AMF ba dala-VIII ne’ebé hala’o iha sidade Vientiane ne’e ko’alia liu kona-bá papél importante husi média sira iha avansa integrasaun rejionál ASEAN nian. ***