Hatutan.com, (02 Dezembru 2024), Díli-Primeiru-Ministru, Kay Rala Xanana Gusmão, ho Primeiru-Ministru Malázia, Dato’ Sri Anwar Ibrahim, sei sai sasin bá seremónia asinatura akordu tolu ne’ebé mak  realiza iha Malázia.

Lee Mós: Malázia Oferese Millaun $3 Mai Timor-Leste Liuhosi Programa Formasaun Diplomata Timoroan

PM Xanana to’o iha Malázia, Domingu (01/12/2024). Foto/Espesiál

Akordu tolu ne’e mak hanesan, akordu Izensaun Vistu, akordu relativu ho Terrenu bá Edifísiu Sanselaria no Rezidénsia Ofisiál Governu Malázia iha Díli no akordu ida tan mak  anúnsiu kona-bá voo aviaun komersiál Batik Air.

PM Xanana Gusmão ho delegasaun, Domingu dadeer  (01/12/2024), sai hosi Díli hodi hala’o viajen serbisu ho aviaun komersiál Aero Dili bá Malázia. Sita hosi komunikadu imprensa ne’ebé Hatutan.com asesu, relata durante estadia  iha Malázia, Primeiru-Ministru Xanana Gusmão sei hasoru-malu ho nia omólogu Primeiru-Ministru Malázia, Dato’ Sri Anwar Ibrahim iha ninia eskritóriu Perdana Putra ne’ebé lokaliza iha Putrajaya.

Primeiru-Ministru hetan konvite atu hala’o vizita bá Institutu Diplomasia no Relasaun Exteriór (IDFR) Malázia, ne’ebé sei hato’o Palestra Públika kona-bá: “Diplomasia Internasionál iha mundu fragmentadu no frázil”.

Iha mós ajenda jantar traballu hamutuk ho investidór potensiál sira hosi Malázia, ne’ebé koordenadu hosi Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay.

Primeiru-Ministru (PM), Kay Rala Xanana Gusmão ho delegasaun to’o Aeroportu internasionál Kuala Lumpur iha tuku 19:35 oras lokál, Domingu (01/12/2024), simu hosi Embaixadór Malázia mai Timor-Leste (TL), Dato’ Amarjit Sigh ho Embaixadór Timor-Leste bá Malázia Lisualdo Gaspar akompaña hosi Xefe protokolu Malázia nian Dato’ Yubazland Bin Yusof.

Iha vizita ofisiál ne’e autóridade sira Malázia nian simu PM Xanana ho Onra da Guarda  estátika no kontinua bá iha Complex Bunga Raya.

Hafoin serimónia bem-vindo, PM Xanana ho delegasaun diretamente bá iha fatin deskansa nian iha otél Interkontinental Kuala Lumpur.

Delegasaun ne’ebé akompaña Primeiru-Ministru durante vizita ofisiál iha Malázia mak hanesan Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, Ministru Negósius Estranjeirus no Kooperasaun, Bendito dos Santos Freitas, Ministru Ensinu Superiór, Siénsia no Kultura, José Honório da Costa Pereira Jerónimo, Ministra Saúde, Elia A. A. dos Reis Amaral, Vise-Ministra ba Asuntus ASEAN, Milena Maria da Costa Rangel ho Sekretáriu Estadu Komunikasaun Sosiál, Expedito Dias Ximenes.

Tuir ajenda, Primeiru-Ministru Xanana Gusmão ho delegasaun sei fila-hikas mai Timor-Leste iha Tersa,  03 fulan-Dezembru 2024.

Jornalista: Rogério Pereira Cárceres