Hatutan.com, (03 Dezembru 2024), Díli-Primeiru-Ministru (PM) Malázia, Dato’ Seri Anwar Ibrahin, fó apoiu tomak Timor-Leste (TL) nia preparasaun sira atu bele adere lalais bá Organizasaun Rejionál Association of Southeast Asian Nations (ASEAN) iha 2025.

Lee Mós: Timor-Leste ho Malázia Asina Akordu Kooperasaun Tolu

PM Xanana ho nia delegasaun hasoru malu ho PM Málazia, Anwar Ibrahim. Foto/BERNAMA

Primeiru-Ministru Malázia espresa nia apoiu ida-ne’e durante simu vizita hosi Primeiru-Ministru (PM) Timor-Leste, Kay Rala Xanana Gusmão ho  nia delegasaun iha Palásiu Perdana Putra, Purtajaya,  Kuala Lumpur, Malázia, Segunda (02/12/2024).

“Primeiru-Ministru Malázia Anwar Ibrahim konvida ko’alia kona-bá oinsá sira bele ajuda ita atu bele tama lalais bá ASEAN. Enkontru la’o di’ak tebtes no Primeiru-Ministru Ibrahim hakarak tebetebes atu apoia ita sai membru ASEAN iha tinan 2025,” Primeiru-Ministru Xanana Gusmão, hateten iha komunikadu ne’ebé Hatutan.com sita, Tersa (03/12/2024).

Vizita  PM Xanana hodi hasoru malu ho nia omólogu iha Malázia ne’e, bazeia bá ajenda ne’ebé parte rua deside ona bainhira hasoru-malu iha simeira ASEAN nian, foin lalais, iha Laos no PM Xanana fó hatene ona kona-bá área saida mak Timor-Leste presiza tebes atu kompleta tán ho baze bá iha rekezitu sira hanesan dalan bá ASEAN nian.

Primeiru-Ministru Malázia espresa prontidaun katak, nia sei halo esforsu hotu atu oinsá Timor-Leste bele kompleta lalais roteiru sira ne’ebé iha hodi bele sai lalais membru permanente bá ASEAN iha tinan 2025.

“Bainhira ami lidera ASEAN, ami sei halo buat hotu-hotu ne’ebé mak presiza atu bele tulun nasaun maun-alin Timor-Leste liu-liu ami sei fasilita liu tán prosesu hodi aselera liu tan no hein atu TL bele sai hanesan membru permanente iha tinan 2025,” PM  Anwar Ibrahim hateten.

Asuntu seluk ne’ebé parte rua ko’alia maka kooperasaun bilaterál entre nasaun rua nian iha área infraestrutura, agro-indústria, pekuária, defeza, seguransa, edukasaun, saúde no seluk tán.

Aproveita vizita ne’e, Governu Timor-Leste reprezenta hosi Ministru Negósius Estranjeirus no Kooperasaun (MNEK), Bendito dos Santos Freitas no Ministru Negósius Estranjeirus Malázia, Mohammad Hassan, troka akordu kooperasaun tolu ne’ebé antes ne’e asina ona iha Díli.

Akordu tolu ne’e maka kona-bá izensaun vístu ba titulár passaporte servisu no diplomátiku, akordu relativamente ho terrenu instalasaun embaixada Malázia nian iha Dili no anúnsiu kona-bá operasaun aviaun Batik Air hosi Malázia.

Iha serimónia boas-víndas nain, molok enkontru bilaterál, autóridade sira Malázia nian simu PM Xanana ho Ónra da Guarda no kontinua ho aprezentasaun membru Governu ida-idak hosi Primeiru-Ministru na’in-rua.

Delegasaun ne’ebé akompaña Xefe Governu durante enkontru mak hanesan Vise Primeiru-Ministru no Ministru Koordenadór Assuntus Ekonómikus no Ministru Turízmu no Ambiente, Francisco Kalbuadi Lay, Ministru Ensinu Superiór Siénsia no Kultura, Ministra Saúde, Élia dos Reis Amaral, Vise-Ministra ba Assuntu ASEAN, Sekretáriu Estadu Komunikasaun Sosiál, Expedito Dias Ximenes, Embaixadór Timor-Leste bá Malázia, Lisualdo Gaspar, Embaixadór Malázia bá Timor-Leste, Amarjit Sarjit Shin.

Iha Tersa, 03 Dezembru 2024, Primeiru-Ministru Xanana Gusmão ho delegasaun to’o ona iha Dili, Timor-Leste.

Jornalista: Rogério Pereira Cárceres