Hatutan.com, (05 Dezembru 2024), Díli- Primeiru-Ministru (PM),  Kay Rala Xanana Gusmão, husu atu artista Timoroan sira labele hakerek de’it múzika kona-ba domin, maibé buka hakerek kona-bá beleza Timor-Leste nian no kona mós ba pás iha mundu, atu fanun ema hotu nia kontribuisaun ba estabilidade mundiál.

Lee Mós: Raul Lemos-KD Apoiu Trofeu Bá Manan Na’in sira Timor Leste Music Awards 2024

PM Xanana entrega sertifikadu apresiasaun ba artista lendariu Filipe dos Santos Arranhado iha eventu Timor-Leste Music Awards (TILMA) 2024 . Foto/Elio dos Santos da Costa

Primeiru-Ministru Kay Rala Xanana Gusmão hato’o deklarasaun ne’e ba artista Timoroan sira iha eventu nasionál Timor-Leste Music Awards (TILMA) 2024 ne’ebé foin ba dala uluk realiza iha Timor-Leste ne’ebé hala’o iha salaun Multiuzu, Bebora, Díli, Kinta kalan (05/12/2024).

“Ida-ne’e hanesan motivasaun ida ba imi nu’udár múzika na’in no ami nu’udár rona na’in no ba ita tomak, liu-liu mós ba imi nia alin sira no oan sira, ne’e dunik husu ba imi hotu se mak iha talentu halo nafatin letra,  se mak hatene hakerek múzika la’ós domin de’it, maibé hakerek mos kona-ba ita nia tasi nia furak, beleza naturál oin-oin ne’ebé Timor-Leste iha, beleza ema nian no buat oin-oin de’it, hasoru violénsia, hakerek mós múzika husu atu konstrui pás iha mundu no ho buat sira ne’e hotu, loke imi nia hanoin ba. Ha’u fiar imi hotu sei hakerek kona-ba ne’e,” Xanana Gusmão hateten.

Xefe Governu hatutan artista sira dezenvolve iha área ida ne’e, área ida ne’ebé la’ós ema hotu-hotu bele tama, área ida ne’ebé artista timoroan bele hatudu ba mundu katak timoroan mós iha talentu no bele kanta ba mundu, Timor bele lori valór ne’ebé povu ne’e iha ho matenek ba kanta iha mundu hodi sira mos bele dehan Timor mos bele, ne’e dunik parabéns ba imi.

Prezidente ALMAMOR, Filipus Nino Pereira, hateten hanesan ema hotu hatene katak ohin loron mundu múzika iha Timor-Leste kontinua dezenvolve an ba oin no ALMAMOR rekoñese iha foin-sa’e lubuk ida ohin loron ne’ebé partisipa eventu internasionál no TILMA bele sai hanesan sasukat ka barómetru ida atu artista Timoroan hotu ho firma hakat ba oin.

“Hamutuk dignifika obra artista sira nian no kontinua fó nafatin esperansa katak mundu múzika iha Timor-Leste kontinua moris no hakat ba oin nafatin,” Nino Pereira hateten.

Entertantu, Kategória no manan nain ba Timor-Leste Music Awards (TILMA) 2024 mak hanesan

1. Kategoria due/Grupu favoritu manan husi Jange and Valenada,
2. Kategoria Famela/Feto favoritu 2015/2024 manan husi Jessy Lopes,
3. Kategoria male/Mane favoritu husi 1975 to’o 1994 manan husi Anito Matos,
4. Kategoria male/Mane Artis favoritu hahú husi 1995 to’o 2014 manan husi Jenik Travolta,
5. Kategoria male /Mane favoritu manan husi Crimson,
6. Kategoria favoritu Band Artis hahú husi 1994 to 2015 manan husi Anar Band,
7. Kategoria favoritu Band huhú husi 2015 to’o 2024 manan husi Cocoustic band,
8. Kategoria Album favoritu manan husi Crimsson,
9. Kategoria favoritu Song Writing manan husi Ganjo,
10. Kategoria favoritu New Artist manan husi bá Jange,
11. Kategoria favoritu song manan husi Crimsson,
12. Kategoria favoritu Video múzika manan husi Quatro Cores.

Entrega Mós Sertifikadu  Apresiasaun ba Artista Lendariu sira hamutuk ema na’in-10 ida ne’e la’ós mai husi Votu maibé hanesan Onra ba Artista Lendariu sira ne’ebé sei iha no mos balu nebe  mate ona, 

1. Sequito Gama (matebian)
2. Lahane Group
3. Alo Perreira (matebian) reprezenta husi Toni Perreira
4. Toto Lebre (matebian0 reprezenta husi 5 de Oriente
5. Cico Maulohi (matebian) reprezenta husi oan Feto
6. Mario da Silva (matebian) reprezenta husi oan Feto
7. Agustinho Moniz
8. Abilio Araújo (matebian) reprezenta no tiun husi  Nino Perreira k nia tiun
9. Filipe dos Santos Aranhado
10. Domingos Alves reprezenta husi Paul 5 de Oriente

Jornalista: Vito Salvadór