Hatutan.com, (06 Dezembru 2024), Díli- Prezidente Repúblika, José Ramos-Horta, konfirma laiha dadus eis Padre Richard Dasbach iha lista indultu ne’ebé Governu haruka ba Prezidénsia Repúblika atu hetan perdaun ka atu hetan indultu.

Lee Mós: Relatóriu Topo Honis, Xanana Entrega Ba Barbara Liuhosi Joaquim Fonseca

Eis Padre Richard Dasbach hamutuk ho dadur sira seluk iha prizaun Becora. Foto/Espesiál

Prezidente Repúblika, José Ramos-Horta ba jornalista sira iha salaun Nobre MNEK, Sesta (06/12/2024), hateten dadur na’in ne’ebé governu haruka komentáriu mai husi Primeiru-Ministru hatete konkorda dala tolu ba na’in tolu no sira seluk ne’e la’e.

“Ne’e-duni agora daudaun ha’u nia Office jurídiku sira halo peskiza ba ko’alia ho ema balun atu haree see, informasaun ne’ebé ONG balun temi kona-ba ema ida ne’e no ida ne’ebá loos duni ka la’e. Tanba ha’u la rona de’it ONG balun hatete ida ne’e halo akuzasaun ida ne’e no la rona vítima sira rasik, ha’u nia ema rasik mak rona, la’ós de’it ONG ne’ebé ko’alia,” Prezidente Repúblika José Ramos-Horta hateten.

Xefe Estadu subliña ONG ne’e la’ós Amu Papa, ONG ne’e la’ós Tribunál Rekursu, la’ós Prezidente Tribunál Distritál ne’e ONG ida, sira bele iha informasaun, maibé informasaun ne’e dupla cek didi’ak portantu ne’e prosesu la’o daudauk.

“Lista indultu ne’ebé governu haruka ne’e kondenadu kazu pedofilia eis padre Ricard Dasbach laiha. Hanesan ha’u hatete ne’e tolu, governu konfirma de’it na’in tolu ne’e tanba hakerek iha ne’ebá konkorda, konkorda, konkorda na’in tolu, entaun tolu ne’e mak ha’u fó indultu,” Horta firma tan.

“Amu Dasbach la tama iha lista indultu no la tama iha lista governu, ha’u hatete na’in tolu ne’e mak ha’u fó indultu, tanba governu hatete konkorda,” Ramos-Horta afirma tan.

Jornalista: Vito Salvadór