Hatutan.com, (06 Dezembru 2024), Díli- Prezidente Repúblika, José Ramos-Horta husu povu Timor  fó omenajen ba erói sira ne’ebé lakon vida iha loron 07 fulan-Dezembru 1975 tamba ho sira nia mate no sakrifísiu mak ikus mai Timor-Leste hetan dalan ba independénsia.  

Lee Mós: Hanoin Hikas Loron Invazaun ho Reflesaun Kle’an

Prezidente Repúblika, José Ramos-Horta. Foto/Tome da Silva

Prezidente Repúblika, José Ramos-Horta hateten kada  loron 07 fulan-Dezembru, Timor-Leste selebra loron invazaun militár Indonézua mai Timor-Leste tamba ne’e hakru’uk de’it ba eroi vítima sira ne’ebé mate.

Nia afirma Prezidente Nicolau Lobato nia ferik-oan mate iha loron 07 Dezembru ne’e, Timoroan lubuk ida mak mate.

“Ha’u koñese ema lubuk ida, Rogér East, ha’u nia amigu belun boot ami na’in rua mak funda East Timor News Agency (ETNA) laiha ema seluk, iha fulan-Outubru 1975 hahú ETNA, ema lubuk ida mate, depois liu tiha ne’e ema mate, to’o 1991 rihun atus ida tiha ona mak mate, tanba funu, hamlaha. Hakru’uk ba vítima sira hotu-hotu, povu ne’e hanesan maun Xanana hatete bei-beik brani duni, erói duni,” Prezidente Repúblika José Ramos-Horta  ba jornalista sira iha salaun Nobre MNEK, Sesta (06/12/2024).

Roger East, jornalista Australianu ida ne’ebé militár Indonézia oho durante invazaun Timor  Leste  iha tinan 1975 iha loron 08 fulan-Dezembru iha Dili. East nu’udar jornalista freelance ne’ebé servisu ba Australian Associated Press.

Joven sira aprende husi luta na’in sira

“Ha’u hatete de’it ba joven sira iha oportunidade ne’e atu estuda, estuda, no estuda, tanba rai ne’e sai bo’ot la’ós ho kilat maibé ho kakutak ka matenek ne’e mak ha’u hatete estadu iha obrigasaun tau bolsa estudu tan haruka jove sira ne’ebé remata ona kursu ruma iha rai laran, hanesan lisensitura ruma ne’ebé iha nota di’ak haruka ba liur Austrália, Indonézia, Portugál, Brazil, Amérika ba estuda ita nia Timoroan rihun ba rihun ho mestradu no doutoramentu,” Prezidente Repúblika José Ramos-Horta tenik.

Ramos-Horta hatutan tinan 22 nia laran halo barak ona, Timoroan ho doutoramentu lubuk ida ona, atus ba atus ho mestradu liu rihun ida ka rua nune’e. Purtantu médiku, doutór agora iha  300,000 iha 2002 iha de’it 20, uluk iha de’it universidade ida UNTL, agora iha  universidade 18 maibé tenke kontinua tau apoiu ba universidade sira inkluidu universidade privadu fó osan ruma ba sira, sira bele selu profesór ho vensimentu ne’ebé di’ak mas tanba profesór universitáriu sira manán $300-$400 ita nia ekonomia fraku ne’e-duni estudante sira laiha osan atu selu universidade privadu sira.

Jornalista: Vito Salvadór