Hatutan.com, (06 Dezembru 2024), Díli- Prezidente Tribunál Rekursu (PTR), Deolindo dos Santos, informa bazeia ba desizaun koletivu husi juis sira iha Supremu Tribunál Rekursu iha  Segunda, 02 fulan-Dezembru 2024, liu ba deside estradita fujitivu Arnolfo Teves Jr ba nia país orijin Filipina.

Lee Mós: Governu A-favór bá Pedidu Estradisaun Fujitivu Teves Jr Maibé Hein Desizaun Tribunál

Arnolfo Tavares Jr. Foto/Espesiál

Deklarasaun ne’e Prezidente Tribunál Rekursu (PTR), Deolindo dos Santos hato’o ba jornalista sira iha ámbitu inaugurasaun edifísiu foun Tribunál Judisiál Primeira Instánsia Díli iha Caicoli, Sesta (06/12/2024).

“Hanesan Prezidente Tribunál Rekursu no hanesan mós juis iha ne’ebá, ha’u mós tama iha prosesu ne’e, ne’ebé kona-bá méritu ha’u lakohi esplika ba média, ne’e la’ós tamba ha’u maka lakohi, maibé lei mak bandu ha’u atu halo buat ida-ne’e. Mas, nuntantu desizaun ida koletivu nian sai ona iha Segunda liubá no akordaun ne’e deside haruka fila,” Prezidente Tribunál Rekursu Deolindo dos Santos hateten.

Deolindo hatutan iha posibilidade parte sira ne’ebé la konkorda ho desizaun ne’e sei rekorre, no depois de rekorre mak iha rekursu karik mak plenária sei haree fali prosesu ne’e  ba oin.

“Parte sira iha direitu atu hato’o rekursu tuir buat saida mak lei hateten,” Deolindo dos Santos subliña hodi dehan tan prazu ba rekursu tuir lei iha loron 15 ba hatama motivasaun no prazu ba alegasaun ne’e hamutuk loron 30 iha parte ida rekursu no iha parte ida fali iha direitu atu fó resposta iha prazu ne’ebé mak hanesan.

Lembra fali katak fujitivu red notice hosi Organizasaun Internasionál Polísia Kriminál (INTERPOL, sigla inglés) ho naran kompletu Arnolfo “Arnie” Alipit Teves Jr ka Arnolfo Teves Jr, tama iha territóriu Timor-Leste iha loron (la fiksa), fulan-Abríl 2023 ho aviaun jet privadu hamutuk ho nia feen no oan-feto.

Durante hela iha  Díli-Timor-Leste,  Arnolfo Teves Jr halo esforsu oioin atu bele hetan azilu polítika, inklui halo komunikasaun ho figura importante balun iha Timor-Leste  atu bele fasilita nia tama Eropa, maibé esforsu sira-ne’e la konsege no la hetan aseitasaun.   

Eis membru Parlamentu Filipina ne’ebé reprezenta provínsia Negru Oriental sai hanesan autór kazu asasinatu oho ema na’in-sia (9) inklui Governadór  Negru Oriental, Roel de Gamo hetan kapturasaun no detensaun  hosi autoridade Polisiál Timor-Leste bainhira halimar hela golf iha área balun iha Díli laran, Kinta loraik, 21 fulan-Marsu 2024, hale’u tuku 16:00 Otl.

Iha loron 26 fulan-Jullu tinan 2023 iha Manila-Filipina, Konsellu Anti-Terrorizmu (ATC, sigla inglés) hasai rezolusaun númeru 43 (2023) hodi konsidera  Arnolfo A. Teves, Jr ho nia grupu armadu nu’udár grupu terrorista tanba envolve iha kazu omisídiu no abuzu seksuál iha Negros Oriental.

Eis  lejizladór Falipina nian ne’e rejista hanesan red notice Organizasaun Internasionál Polísia Kriminál (INTERPOL, sigla inglés)  iha fulan-Fevereiru 2023. Notifikasaun  red notice hosi INTERPOL ne’e nu’udár anúnsiu ne’ebé husu bá autoridade justisa sira iha mundu atu buka tuir no kaptura fujitivu ne’ebé presiza halo estradisaun, entrega aan no enfrenta ka kolabora ho justisa.

Arnolfo Teves Jr beibeik ona la simu akuzasaun no desizaun sira judisiáriu nian hasoru nia no duni nia sai hosi Parlamentu tanba nia hahalok la disiplina no dezobediénsia.

Jornalista: Vito Salvadór