Hatutan.com, (19 Dezembru 2024), Díli – Kapela Nossa Señora de Lourdes iha Ospitál Nasionál Guido Valadares (HNGV) konklui ona ho kustu $ 46,944,80.00

Kapela Nossa Señora de Lourdes HNGV, Díli. Foto/Lazaro Pereira Quefi

Kapela Nossa Señora de Lourdes iha HNGV konstroi ho orsamentu 2024 ho durasaun fulan-tolu, hahú konstrusaun iha loron 31 fulan-Agostu to’o loron 31 fulan-Outubru 2024 hosi kompañia Kuilelo Unipessoal, Lda, maibé kompaña hato’o pedidu estensaun fulan ida tanba ne’e mak foin remata iha fulan-Novembruhodi  entrega iha semana kotuk.

Kapela ne’e, Kinta (19/12/2024), halo ona inaugurasaun hosi Arsebispu Arkidioseze Metropolitana Díli, Mgr. Virgílio Kardeál do Carmo da Silva, SDB.

Ministra Saúde Elia A.A. dos Reis Amaral iha nia diskursu hateten, kapela ne’e konstrui hodi sai espasu ne’ebé ho silénsiu no orasaun, reflesaun no pás nune’e mós sai espasu independentemente hosi idak-idak nia  igreja, kultura no tradisaun.

“Kapela Nossa Señora de Lourdes iha HNGV reprezenta espasu ne’ebé mak di’ak hodi hakmaan ita nia isin. Ita hotu hatene katak espiritualidade ne’e iha ligasaun forte ho saúde,” Ministra Saúde Elia A.A. dos Reis Amaral hateten.

Kapela ne’e nu’udar símbolu akollamentu respeita no inkluzaun, fatin ne’ebe refleta diversidade no mós ba umanidade.

Iha fatin hanesan Diretora Administrasaun, Finansas no Lojístika HNGV, Sara Maria F. Xavier hateten kapela ne’e importante tebes hola parte mai HNGV hodi fó asisténsia ba pasiente ho família no mós staff tomak HNGV nian ba iha asisténsia espirituál.

HNGV hato’o agradese ba governu liuliu Ministériu Saúde no mós entidade tomak ne’ebé durante ne’e fó suporta másimu, inklui doadór sira nia ajudu ka suporta fasilidade sira seluk hodi kompleta iha kapela ne’e rasik ba ninia nesesidade.

Jornalista Estajiáriu: Lazaro Pereira Quefi