Hatutan.com, (19 Dezembru 2024), Díli- Primeiru-Ministru (PM), Kay Rala Xanana Gusmão apela ba joven sira atu mantein  pás no estabilidade durante selebrasaun Natal no tinan foun hodi hatudu identidade fraternidade Timoroan nian ne’ebé kuda metin iha fiar no valór kulturál sosiédade nian.

Lee Mós: Natal, Tempu Fahe Ksolok no Hakle’an Fraternidade Umana iha Sosiedade

PM Xanana hasoru malu ho PR Ramos-Horta iha Palásiu Prezidensiál, Kinta (19/12/2024). Foto/Elio dos Santos da Costa

Ba jornalista sira iha Palásiu Prezidensiál,  Kinta (19/12/2024), Primeiru-Ministru (PM), Kay Rala Xanana Gusmão hateten joven sira hotu iha tinan kotuk, hotu-hotu kontente tebe-tebes tanba iha períodu natál la akontese buat ida, to’o fim do ano hotu-hotu iha Palásiu Prezidensiál simu tinan foun 2024 la akontese buat ida.

“Ho ida ne’e mak nu’udar Primeiru Ministru no hodi Prezidente Repúblika nia naran ami fiar tebes katak joven sira iha bairru sira ne’e, ita kaer tuir mensajen Papa Francisco nian foin daudauk mai, imi rasik mak hatudu ba mundu katak pás no estabilidade iha imi nia liman, iha imi nia ulun, iha imi nia hahalok,” PM Xanana haktuir.

Xefe Governu hatutan Papa Francisco to’o tiha Vatikanu ba vizita rai seluk temi Timor-Leste kontente iha enkontru ho joven sira iha CCD, kontente tanba la akontese buat ida, ne’e-duni apelu boot ba joven hotu-hotu, ba Timor laran, liu-liu iha Díli hadomi malu ba, kaer metin nasaun ninia orgullu ne’ebé Papa Francisco rasik bainhira ba fatin seluk nia hatudu.

Iha tinan ida ne’e iha Portugál selebra loron mundiál juventude no tinan mai ne’e sei iha Korea du Súl Papa Francisco sei ba no joven sira mós sei ba husi Timor,  buka hametin nafatin mundu ninia koñesimentu kona-ba Timor ne’e.

“Mai ita hatudu ba mundu, Rai ida ne’ebé sei iha problema barak duni, mas rai ida ne’ebé, liu-liu joven sira bele kaer metin pás, estabilidade no harmónia.” Xanana Gusmão subliña.

Primeiru-Ministru Kay Rala Xanana Gusmão hodi Prezidente Repúblika, José Ramos-Horta nia naran hato’o dezeju natál kmanek ba povu tomak, liu-liu ba joven sira no tinan foun ne’ebé bele fó tempu, obrigasaun no misaun ba instituisaun estadu sira bele kumpri hodi hadia povu nia moris, no lori rai ne’e ba oin.

Iha biban hanesan Prezidente Repúblika, José Ramos-Horta hateten dala ida tan hamutuk ho Primeiru Ministru, nu’udar órgaun estadu, nu’udar lider nasionál hakarak hato’o votu natál kmanek ba família sira hotu-hotu iha Timor-Leste, família Timoroan sira ne’ebé iha liur, iha tasi balun ne’ebé buka moris iha rai seluk, estuda no ba moras sira iha ospitál, sira iha prizaun no iha ne’ebé de’it.

“Ami haruka votu natál kmanek no tinan foun ne’ebé sei di’ak liu tan, hakuak b’ot ba imi hotu-hotu, ba ferik, katuas, ki’ik oan, no hotu-hotu no Timor-Leste no mós iha rai sira seluk,” Prezidente Repúblika José Ramos-Horta hateten.

Ikus liu Primeiru-Ministru Kay Rala Xanana Gusmão subliña katak Kona-ba enkontru ho Prezidente Repúblika la’ós buat hotu-hotu ami ko’alia ne’e tenke ko’alia ba imi, Prezidente Repúblika horisehik foin mak mai husi liur no ha’u horisehik enkontru ho lurón sira ne’e no depois mak imi haree nia rezultadu.

Jornalista: Vito Salvadór