Hatutan.com, (19 Dezembru 2024), Díli-Ekipa  fiskalizasaun konjunta sei halo operasaun bá veíkulu estadu nian ne’ebé funsionáriu ka kargu xefia sira uza hodi halo  movimentu iha ambitu feriadu Natal ho tinan foun.

Lee Mós: CAC Halibur Hela Informasaun Kona-bá Karreta Estadu Hetan Asidente iha Loron La’ós Servisu Nian

Ekipa Fiskalizasaun Konjunta halo aprrensaun bá karreta ho motór Estadu ne’ebé sirkula iha loron feriadu. Foto/Dok.Elio dos Santos da Costa

Ekipa sira fiskalizasaun konjunta nian ne’e konstitui hosi Comissão da Função Pública (CFP), Comissão Antí-Corrupção (CAC), Provedória dos Direitos Humanos e Justiça (PDHJ), Instituto de Gestão do Estado (IGE), hamutuk tán ho Polisia Nasionál Timor-Leste (PNTL) liuhosi Departamentu Tránzitu no Seguransa Rodoviário.

Komisáriu Komisaun Funsaun Públika nian bá Asuntu Dixiplinár, Agapito da Conceição, informa, ho baze bá akordu ne’ebé asina tiha ona, maka iha tempu besik  sei halo operasaun, hodi kontrola diresaun kargu xefia sira ne’ebé ‘toman’ uza veíkulu sira estadu nian iha tempu feridadu.

Nia dehan, operasaun konjunta ida ne’e sei akontese iha nasionál ho mós iha komandu munisípiu sira hotu iha territóriu nasionál.

“Foin dadauk ne’e mós ami asina ona MoU ida ho ekipa ne’ebé maka hosi CFP, CAC, PDHJ no IJE, ami hamutuk, asina ona memorandum para atu hala’o kna’ar ne’ebé maka tuir ida-idak nia kompeténsia,” Komisáriu Agapito da Conceição, hateten bá Jornalista sira, hafoin partisipa iha seremónia posse ba kargu xefia sira iha Notáriudu no Konservatóriu, Ministériu Justisa, Kinta (19/12/2024).   

Komisáriu Agapito dehan, iha tempu besik, sira hahú ona oeprasaun, tanba preparasaun iha tiha ona, maibé kona-bá loron no oras sira operasaun nian ne’e ekipa konjunta labele fó hatene, tanba ne’e segredu, atu nune’e sira bele identifika katak, funsionáriu ka kargu  xefia sira ne’e ida ne’ebé sei kontinua utiliza kareta sira.

Bainhira iha terrenu mak hetan ka kaer-toman, lala’ok sira kona-bá prosesu ninian ne’e, CFP, haree liu bá iha área administrasaun nian, CAC ho IJE, haree liu-liu bá iha asuntu investigasaun nian bá aprovizionamentu, ezekusaun orsamentu sira ne’e, no parte seluk, inklui mós kontrolu bá patrimóniu estadu, liu-liu veíkulu sira ne’ebé maka atu utiliza bá iha natál nian,” nia hateten.

Jornalista: Rogério Pereira Cárceres