Hatutan.com, (19 Dezembru 2024), Díli-Vise Primeiru-Ministru no Ministru Koordenadór bá Asuntu Ekonómiku, Ministru Turízmu no Ambiente, Francisco Kalbuadi Lay, enkoraza dadur sira hotu ne’ebé mak dadauk ne’e iha hela fatin prizaun Becora atu hateke bá futuru no lalika lakon esperansa.

Lee Mós: PM Xanana Apela ba Joven sira Kontínua Mantein Pás no Estabilidade Durante Natal-Tinan Foun

Vise Primeiru-Ministru no Ministru Koordenadór bá Asuntu Ekonómiku, Ministru Turízmu no Ambiente, Francisco Kalbuadi Lay lori ksolok Natal hamutuk ho dadur sira iha Prizaun Becora, Kinta (19/12/2024). Foto/Elio dos Santos da Costa

Vise Primeiru-Ministru, Kalbuadi Lay, hato’o nia mensájen ida ne’e bainhira reprezenta Prezidente Repúblika (PR), Ramos-Horta ho Primeiru-Ministru (PM), Kay Rala Xanana Gusmão, iha seremónia Natál Hamutuk ho dadur sira iha sentru prizionál Becora-Dili, Kinta  (19/12/ 2024).

Governante ne’e hato’o nia domin bá dadur ka prizoneiru sira hotu. Sente haksolok tebes, tanba  bele bá halibur malu hamutuk iha fatin ida ne’e.

Vise Primeiru-Ministru hatene katak, maske fatin ida ne’e oin seluk, iha limitasaun, maibé, bá iha loron-boot hanesan natál, ema hothotu iha direitu atu selebra hamutuk nu’udár ema sarani, ne’ebé mak fiar bá Na’i-Jesus.

“Ha’u ata lori prezidente repúblika nia naran, hamutuk ho governu, liu-liu avo Nana ninia naran, atan ha’u hamutuk ho Ministru Justisa, Sergio Hornai ho komitiva tomak ne’ebé mak tuur iha ne’e, atu lori sira na’in-rua, avo sira nia naran, mai hato’o boas-festa natál bá ita-boot sira. Hatene katak, na’i-prezidente, horseik, foin fila mai hosi rai-liur, halo hela servisu lubuk ida, ohin, aban, sei simu bainaka sira, avo Nana ona fatin hothotu, no mós sempre mai hela iha ne’e,” Vise Primeiru-Ministru, Francisco Kalbuadi Lay, hateten iha nia intervensaun molok distribui parsela sira natál nian bá dadur sira.

Ministru Koordenadór bá Asuntu Ekonómiku ne’e esplika, programa natál-hamutuk ida ne’e, organiza hosi prezidente repúblika, hamutuk ho governu, para atu bá fó hanoin bá maluk dadur sira, nune’e hanoin hikas katak, domin ida ne’e mai hosi ita-nia abo na’i-rua ne’e, bá ita-boot sira hotu.

“La’os, tanba prezente ne’ebé mak ami lori mai hamutuk ho ita-boot sira, maibé, simplesmente, atu hatudu katak, imi iha ne’ebé de’it, domin ne’e hosi sira na’in-rua, abo Nana ho abo Horta, laiha rohan. Ne’e maka ami hothotu mai iha ne’e, reprezenta hela sira na’in-rua,” nia esplika.

Vise primeiru-ministru RDTL ne’e mós, lori IX Governu nia naran, hato’o hela mós sira-nian domin bá Dadur sira. Lakleur tán, ita komesa tama ona bá iha ambiente ida ne’ebé mak selebra natál.

“Ne’ebé, ami iha oportunidade iha meiu-dia ida ne’e, hato’o de’it bá ita-boot sira katak, hateke bá futuru, ami fiar katak, ita-hothotu reza hamutuk, na’i-Maromak sei fó loron ida ne’ebé di’ak liu fali bá ita-hotu, iha loron aban bainrua nian,” Kalbuadi Lay, fó hanoin.

“Ha’u la repete saida mak ministru ohin hato’o tiha ona bá ita-boot sira, dala-ida tán, lori governu ninia naran, ho prezidente repúblika naran, liu-liu abo Horta ho Abo Nana, ninia domin, mak liuhosi ami lubuk ida iha ne’e hamutuk ho ita-boot sira ohin, meiudia, atu selebra natál ho ita-boot sira hotu. Husu bá na’i-Maromak, fó domin nafatin bá ita-hotu, liu-liu bá ita-boot sira hotu, ho ami hothotu nia saúde nia di’ak. Maromak hadomi ita hothotu, Maromak fó forsa nafatin bá ita hotu, mai ita hothotu selebra loron-boot bá iha  natál ne’e hamutuk ho domin, nakonu ho dame,” tenik nia.

Dadur Sira La Mesak

Governu natal hamutuk ho dadur sira iha Prizaun Becora, Kinta (19/12/2024). Foto/Elio dos Santos da Costa

Iha fatin hanesan, Ministru Justisa (MJ), Sérgio de Jesus Hornai, dehan, dadur sira la mesak, maibé, Governu, no ema hothotu, sei hamutuk nafatin ho sira, no husu dadur sira ne’e atu halo nafatin reflesaun, no fiar katak, dadur sira ne’e mós aprende ona buat barak iha fatin izolamentu ida ne’e. 

Biar dadur sira ne’e iha hela sela laran, sira nia liberdade bele limte, maibé, Ministru Sérgio Horna, dehan, ita-nia na’i prezidente repúblika, primeiru-ministru, vise primeiru-ministru, no membru governu sira tomak, ho dirijente iha ministériu justisa ninian, nia fuan, nia hanoin, nia neon, hamutuk ho dadur sira.

“Hakarak partilla ho ita-boot sira iha loron importante sira hanesan ne’e, bá ema sira ne’ebé tanba ho razaun seluk, sira nia liberdade limite tiha. Maibé, imi la mesak, imi la kuran buat ida. Ohin, lakleur tán, ita atu tama bá iha ita-ninia loron-boot, hodi simu ita ninia belun, na’i-jesus Cristo, hanesan ema fiar na’i, ita agradese bá buat sira ne’e,” Ministru Sérgio Hornai, fó hanoin.

“Ita-boot sira aprende buat lubuk oan ida, iha ita-boot sira-ninia prezensa iha fatin ne’e. no halo nafatin reza, halo reflesaun, hadi’a ita-ninia kualidade, para atu aban bainrua ita-boot sira fila bá iha ita-boot sira-nia família, ita-boot sira nian sosiedade, buat ne’ebé iha kotuk liubá, ita-boot sira haree la-loos, ita-boot sira iha ona bukae, para atu bele mai,” tenik nia.

Governante ne’e afirma, ministériu justisa fó importánsia maka’as bá dadur sira. Foin dadauk, ita-ninia Sua Santidade Papa Francisco, mai iha Timor, vizita. Biar ita iha situasaun ida, tempu limite loos, mais, dadur sira ne’e ninia reprezentante ida mós to’o iha tasi-tolu, hodi partisipa iha missa.

“Ne’e signifika katak, ita-nia governu, ita-nia estadu, tau importánsia maka’as bá iha ita-boot sira ninia ezisténsia, biar ita iha fatin izolamentu ida ne’e, maibé, iha importánsia, ita-boot sira mós bele halo interasaun bá oin,” nia fó hanoin.

Natal hamutuk ho dadur sira iha Prozaun Becora. Foto/Elio dos Santos da Costa

Hanesan Ministru Justisa, tau matan mós bá iha servisu prizionais ninian, Sérgio Hornai, hato’o nia saudasaun nafatin bá dadur sira, katak, primeiru, tenke iha kontente nafatin, para bele manán, psikolójikamente, ita-boot sira ninia mentál saudável, fízikamente, para atu hasoru saida mak ita hasoru. Segundu, husu dadur sira atu hatudu disiplina iha fatin ida ne’e,

“Entaun ida ne’e, ita-boot sira sei manán buat sira seluk ne’ebé lei hatete, karik, atu halo liberdade kondisionál, tanba iha liberdade razaun da lei. Hirak ne’e hotu, husik bá iha reflesaun ida ita koalia, mais, ohin, tempu ida oportunidade, ita-ninia vise primeiru-ministru lori governu nia naran, ho ninia persolidade rasik, hakarak husik hela mensájen ida bá iha ita-boot sira, katak, governu, hamutuk ho imi, sosiedade hamutuk ho imi, média komunikasaun sosial hamutuk ho ita-boot sira, katak, ita-boot sira la-mesak, ita-boot sira la kuran buat ida.”

Sérgio Hornai, kontínua husu bá dadur sira ne’e atu komporta halo didi’ak. Halo reflesaun bá, loron ruma, hakvesik aan padre sira iha sentru prizionál ne’e, liu-liu Amu Kapelaun, halo nafatin reflesaun, atu nune’e, sira bele manán buat hothtou ne’ebé iha ne’e duni, nomós iha avaliasaun sira seluk ne’ebé guarda prizionais sei fó bá dadur sir aida-idak.

“Lori ha’u nia naran rasik, lori estrutura ministériu justisa ninian, fó votus feslidade bá ita-boot sira, hakuak-boot bá ita-boot sira, para atu ita-boot sir abele manán konfiansa ida, hodi nune’e, ita-boot sira bele hakat bá iha loron sira besik mai, it abele festeza iha natál, nomós iha tinan-foun ne’ebe nakonu ho felisidade bá ita-boot sira,” hateten Sérgio Hornai.

 Sei Apoia Fasilidade Desportu no Ekipamentu Múzika

IX Governu Konstitusionál liuhosi Vise Primeiru-Ministru, no Ministru Koordenadór bá Asuntu Ekonómiku, Ministru Turízmu no Ambiente, Francisco Kalbuadi Lay, deklara no komprometidu atu sosa no fó apoia fasilidade desportu nian ho ekipamentu sira múzika nian bá dadur sira iha sentru prizionál, Becora.

“Ha’u hamutuk ho ministru justisa, nunee mos hosi prezidente re públika nia serbisu fatin, prezidénsial, ami lori governu ninia naran ho mós prezidente republika, hamutuk liu-liu Abo Nana, ha’u prontu hamutuk ho sira, atu oferese alat foun ida kompletu bá ita-boot sira,” promete Kalbuadi Lay.

Tuir planu, fasilidade ho ekipamentu hirak ne’ebé atu apoia dadur sira ne’e, sei akontese iha fulan-janeiru tinan 2025. Kalbuadi Lay, fiar metin katak, ho fasilidade sira ne’ebé atu tulun tán, sei fasilita maluk dadur sira espressa liután sira nian talentu ne’ebé mak iha.

“Ho ekipa desportu, Volleibool, Basketbol ho futebool, depois sei entrega bá iha diretór prizaun Becora nian, ne’ebé entrega, depois ita-boot sira organiza bá. Ne’ebé, semana ida imi dahur dala-ida iha sesta-sesta ne’e, keta halo, alat foun mai, sira sábadu, domingu fali tán, ne’e araska. Depois haluha tiha be depois la bá missa, la bá reza,” Governante ne’e hateten ho hamnasa.

Jornalista: Rogério Pereira Cárceres