Hatutuan.com, (24 Dezembru 2024), Dilí- Jesus Kristu Nia moris mak atu hafoun fila-fali ema nia moris no oinsá ema ida-idak bele muda nia hahalok hosi aat bá di’ak.

Lee Mós: Maromak Halo An Ki’ik Atu Ema Besik ba Nia no Simu Rahun Di’ak iha Moris

Prezepiu Natal ne’ebé harii iha resintu Palasiu Prezidensial. Foto/Média GPM

Lia hirak ne’e  padre Hélio Catro Alves iha nia omilia misa kalan Natál, 24 fulan-Dezembru 2024  iha Igreja Parókia São José Aimutin, Comoro, Díli.  Nia haktuir kalan natál  hanesan kalan furak ne’ebé sarani katóliku hotu hein atu selebra no simu Kristu ne’ebé mak moris mai hanesan  ema, Maromak oan hodi  oferese nia an no  fó perdaun bá  ema hotu hodi sai husi nakukun laran.

“Jesus Kristu Nia moris iha kalan Natal ida-ne’e tuir loloos atu hafoun fila-fali ita nian moris, ita moris hikas fali husi Kristu kosok-oan Nia moris iha kalan ida-ne’e hodi lori ita bá naroman, Oinsá mak ita  simu naroman iha kalan natál no tinan foun ida-ne’e  bele muda netik ita-nian hahalok nune’e ema bele haree ita nia di’ak,” Padre Hélio Catro Alves  esplika.

Jesus Kristu Nia prezensa, Padre Hélio Castro Alves tenik, la’ós de’it lori ksolok, maibé  nu’udár sarani  loke oda-matan bá ida ne’ebé dere oda-matan katák Maromak fó esperansa hodi simu bensan.

 “Dala-barak Maromak Nia di’ak no bensa ita bele hetan  liuhosi ema sira ne’ebé mak besik bá ita. Tán ne’e  loke ita nia oda-matan loron-kalan atu Maromak hela iha ita-nia leet nune’e bele muda ita hosi aat sai di’ak, muda hosi  hahalok aat bá hahalok ida ne’ebé di’ak, muda ita-nia ibun ne’ebé loron-kalan ko’alia liafuan tolok,” Padre Hélio Catro Alves afirma.

Jornalista Estajiária : Zita Menezes