Hatutan.com, (11 Janeiru 2025), Díli- Emprezáriu Timoroan nu’udár na’in bá Empreza Grupu Esperansa Timoroan (ETO),  Nilton Gusmão eleitu ba Prezidente ezekutivu Federasaun Futeból Timor-Leste (FFTL) ba restante mandatu 2022-2026.

Lee Mós: Asosiasaun Futeból 13 Kongratula Kongresu FFTL Hili Komité Independente

Nilton Gusmão  kompromete hamoris hikas Liga Timorense ka Liga Futeból Timor-Leste ne’ebé dezde tinan tolu ikus paradu.

Nilton Gusmão eleitu ba Prezidente ezekutivu Federasaun Futeból Timor-Leste (FFTL) ba restante mandatu 2022-2026. Foto/Elio dos Santos da Costa

Nilton Gusmão eleitu ba Prezidente ezekutivu FFTL ba restante mandatu 2022-2026 hafoin kandidatu Estanislau Baptista deside rezigna an iha kongresu laran. Ho rezignasaun ne’ebé Estanislau Baptista hato’o perante delegadu no kongresista sira halo komite eleitorál deside Nilton Gusmão manan ho votu apresiasaun husi asosiasaun Futeból Munisipál sira no asosiasaun Profisionál inklui Kampiaun Liga I no II.

Hafoin manan, Nilton Gusmão iha nia diskursu hateten kongressu ne’e fo poder ho tempu limitadu, tinan ida deit, atu kompleta deit estrutura anteriór ne’ebé Prezidente sesante Francisco Jerónimo husik hela.

Nia afirma tinan ida, hotu-hotu hatene dehan tempu badak maibé koko atu halo buat ruma iha tinan ida nia laran.

“Portantu program prinsipál ne’ebé ha’u hanoin atu halo mak reativa fila liga Futeból Timor-Leste no mos tulun asosiasaun Munisipál sira no asosiasaun profisionál sira para bele hahú organiza an, atu nune’e bele hahú organiza atividade Futeból iha munisípiu sira hotu. Ida ne’e mak misaun prinsipál ne’ebé sei halo iha tempu badak, mesmu tempu badak maibé ita hakarak halo buat ida ho estraordináriu,” Nilton Gusmão afirma iha Ótel Novo Turismu, Sábadu (11/01/2025).

Nilton Gusmão subliña atividade ne’ebé sei hala’o ho asosiasaun Futeból Munisipál sira mak atividade Futeból juvenil ho objetivu atu fó biban liután ba alin sira, oan sira besik liu ba Futeból hanesan preparasaun ba futuru jogadór hahú husi idade ki’ik.

Iha Misaun prinsipál sira ne’ebé iha sei iha mos formasaun kontinua ba árbitru sira, treinadór sira no mos formasaun tékniku ba ho hanoin atu hasae kualidade Futeból iha rai laran.

“Ha’u mós agradese ba delegadu sira hotu-hotu ne’ebé ho konfiansa fó fiar ba ha’u liu husi votu aklamasaun iha kongresu FFTL, ida ne’e iha signifikadu boot tebes ba ha’u no tenke asume ho responsabilidade atu bele responde votu aklamasaun ne’ebé hotu-hotu fo iha kongresu ida ne’e,” tenik Nilton Gusmão.

Agradese mós ba média sira hotu ne’ebé nafatin buka tuir atu hare kona-ba lala’ok Futeból iha Timor-Leste. Tamba Futeból ema hotu nia responsabilidade no tenke sai urgullu nasionál.

Estanislau Baptista Futeból tenke dezenvolve ho pás no domin

Diretór Ezekutivu DIT FC, Estanislau Baptista ne’ebé mós hanesan kandidatu ba Prezidente ezekutivu Federasaun Futeból Timor-Leste (FFTL), ba restante mandatu 2022-2026 ne’ebé deside rezigna an hameno hela ba Prezidente ezekutivu eleitu Nilton Gusmão katak Futeból tenke dezenvolve ho pás no domin.

Nia afirma dezde tinan rua ikus, akompaña dezenvolvimentu Futeból iha Timor-Leste la’o ho tendénsia sira ne’ebé buka hatún malu de’it no laiha responsabilidade moral ba aktu sira hodi hamonu kredibilidade instituisaun Futeból iha Timor-Leste no fó imajen la di’ak ba sosiedade hadomi Futeból sira.

“Hanesan ema akadémiku ha’u lakohi kontribui ba hahalok sira ne’e,” hateten Estanislau Baptista.

Estanislau Baptista hatutan hakarak dezafia Prezidente asosiasaun Futeból no asosiasaun profisionál sira atu hatudu paixaun ba bola ho asaun konkretu laos hatudu tendénsia ódiu no vingansa tamba iha rivalidade ne’e iha manan no mós lakon. Sempre iha pro no kontra tamba husi ne’e mak bele eskola no define ida ne’ebé di’ak liu ba lidera FFTL hodi tau matan ba Futeból ne’ebé ema hotu hadomi.

Nia afirma atu dezenvolve Futeból la’ós hein kongresu FFTL besik ona mak konvense malu, halai tun-sa’e, buka votu mas too ikus la iha, responsabilidade. Selesaun nasionál ba joga lakon laiha ezekutivu Federasaun ida mak hamriik iha média hola responsabilidade ba derita sira ne’ebé iha, husi jogadór sira lori sala sira ne’e hotu.

Falur Rate Laek husu Halo Mudansa

Vise-prezidente FFTL, Domingos Raul Falur Rate Laek hateten prezidente eleitu tenke halo mudansa ba FFTL, liu-liu iha aspetu mentalidade nian.

“Ha’u rekomenda ba estrutura foun atu tau prioridade iha mudansa mentalidade dependénsia iha FFTL, no mantein funsionáriu sira ne’ebé iha vontade hodi kontribui ba dezenvolvimentu Futeból.” Hateten Falur Rate Laek.

Jere rekursu finanseiru ne’ebé disponivel ho di’ak, tau prioridade ba infraestrutura ne’ebé atu harii, investe nafatin iha, rekursu umanu no iha jestaun sustentável ba Federasaun Futeból ida ne’ebé sei sai hanesan orgullu nasionál ba ema hotu.

Jornalista: Vito Salvadór