Hatutan.com (15 Janeiru 2025), Díli – Prezidente Koreia-Súl, Yoon Suk Yeol, hetan kapturasaun ofisiál, Kuarta (15/1/2024). Ida-ne’e maka eskalasaun foun ida hosi drama hosi Yoon nia deklarasaun lei marsiál ne’ebé falla iha fulan-Dezembru liubá, iha prosesu impeachment nia leet ne’ebé hahú iha loron-tersa ne’e.

Prezidente Koreia-Súl Yoon Suk Yeol/Foto: REUTERS/The Presidential Office)

Sita hosi ajénsia AFP, katak kapturasaun ne’e akontese hafoin investigadór atus resin hosi ajénsia korrupsaun Koreia-Súl nian, CIO, hamutuk ho polísia halo buska ba nia rezidénsia dezde madrugada. Kapturasaun sira ne’e relasiona ho abuzu podér nian kona-bá anúnsiu Estadu de sítiu ka emerjénsia militár nian no hanesan daruak hafoin falla iha loron 03 fulan-Janeiru.

Iha inísiu, investigadór sira no polísia hetan obstrusaun ka empedimentu hosi Servisu Seguransa Prezidensiál (PSS), guarda prezidensiál ofisiál Yoon nian. Relatóriu anteriór sira hatete katak akontese baku-malu no dudu-malu, hodi halo ema ida hetan kanek.

Iha inísiu, Yoon nia advogadu fó sai katak Prezidente konkorda ona atu ko’alia ho investigadór sira. Katak, nia deside ona sai hosi rezidénsia hodi prevene “insidente grave ida”.

“Prezidente Yoon deside ona aprezenta pesoalmente iha Gabinete Investigasaun Korrupsaun nian, ohin”, Seok Dong-hyeon hatete iha Facebook, hodi hatutan katak Yoon mós sei halo diskursu ida. Maibé lakleur hafoin anúnsiu, investigadór sira hatete katak Yoon hetan kaer. Fonte sira hatete katak investigadór sira tama iha Yoon nia rezidénsia liuhosi eskada sira hodi evita guarda sira.

“Kuartél Jerál Investigasaun Konjunta nian ezekuta ona mandadu kapturasaun ida ba Prezidente Yoon Suk Yeol, ohin, (15 Janeiru) iha tuku 10:33 dadeer,” sira anunsia iha komunikadu.

Antes ne’e, Yoon nia guarda sira instala ona arame farpadu no barrikada sira iha rezidénsia, hodi transforma ida-ne’e ba saida maka opozisaun bolu “fortaleza”. Yoon nia apoiante sira mós tuir informasaun prenxe fatin no hakilar “mandadu ilegál!”.

Deputadu na’in-30 resin hosi Yoon nia Partidu Podér Povu nian ne’ebé maka ukun mós trava investigadór sira. Maibé, CIO no polísia insiste ona katak esforsu sira ne’ebé maka la tuir lei no abuzu podér nian.

Yoon bele hetan detensaun to’o oras 48 bazeia ba mandadu ne’ebé iha ona. Investigadór sira presiza hatama mandadu kapturasaun seluk hodi detein nia.

Yoon nia ekipa legál denunsia beibeik mandadu ne’e hanesan ilegál. Iha investigasaun paralelu ida, julgamentu ba destituisaun Yoon nian hahú iha loron-Tersa ne’e ho audiénsia badak ida hafoin nia rekuza atu marka prezensa.

Fontes: cnbcindonesia