Hatutan.com, (20 Janeiru 2025), Díli—Dezastre natural ne’ebé akontese iha Timor-Leste hahú iha loron 13-20 fulan Janeiru 2025, rai-lakan fera no hamate Joel de Araújo (14) no akontese mota bo’ot lori labarik mane 1 iha munisípiu Viqueque to’o agora seidauk hetan.

Porta-vóz APC, Nelson Nunes de Orleans.

Durante seman ida, iha rejiaun Timor-Leste akontese tipu dezastre ho normal tanba ne’e Sentru Nasional Opersaun Protesaun Sivil – Aitoridade Protesaun Sivil (CNOPC-APC) rejista kazu dezastre Ahi han uma (3), Anin Bo’ot sobu uma (3), rai lakan fera ema (1) no mota lori ema (1).

Lee Mós: Dezastre Naturál, Anin Sobu Uma 13 no Uma Haat Sofre Inundasaun

Munisipiu Aileu, Postu administrativ Aileu, Suku Hoholau, Aldeia Maururia, iha loron 14 Janeiru 2025 akontese railakan fera ema ida ho naran Joel de Araújo ho tinan 14.

Munisipiu Baucau, Postu administrativu Venilale, Suku Fatulia, aldeia Bahadato, iha loron 12 Janeiru 2024 akontese ahi han komunidade nia uma (1).

Munisipiu Dili, Postu administrativu Dom Aleixo, Suku Bairru-pité, aldeia Tane Timor, iha loron 10 Janeiru 2025 akontese ahi han komunidade nia uma (1).

Iha Postu administrativu Cristo Rei, suku Becora, aldeia Darlau, iha loron 11 Janeiru 2025 akontese anin sobu uma komunidade (1).

Munisipiu Ermera, Postu administrativu Ermera, Suku Riheu, Aldeia Gumhei, iha loron 12 Janeiru 2025 akontese anin sobu komunidade nia uma (1).

Munisipiu Manufahi, Postu administrativu Same, Suku Holarua, aldeia Urufu, iha loron 11 Janeiru 2025 akontese anin sobu uma komunidade (1).

Munisipiu Viqueque, Postu Administrativu Viqueque, Suku Carau balu, aldeia Lamak-klaran, iha loron 13 Janeiru 2025 akontese mota bo’ot lori labarik mane 1 to’o agora vitima seidauk hetan.

Iha Postu Administrativu, Suku Carau Uabubo, Aldeia Lequibuti, iha loron 13 Janeiru 2025 akontese Ahi han komunidade nia uma (1).

Komandu APC Munisipiu ho Parseirus Relevante verifika kedan dadus no fornese asisténsia emerjénsia bá familia afetadu sira mak hanesan ai-han no la’ós ai-han (food item & Non-food Item).

Komandu Operasionál Autoridade Protesaun Sivil (APC) munisipiu sira sei kontinua halo hela levantamentu detallu kona-bá sasan ne’ebé estragus no lakon.

“APC husu bá komunidade atu ita rasik mak asegura ita-nia an hodi labele hetan dezastre. Tanba mudansa klimátika atu viazen bá fatin ruma karik matan moris neon na’in labele hetan dezastre iha dalan. Atu haris mota ka tasi karik nani la hatene lalika obriga-an,” Porta-vóz APC, Nelson Nunes de Orleans hateten iha Caicoli, tersa (20/01/2025).

Autoridade Protesaun Civil hakarak rekomenda bá Komunidade bainhira akontese udan bo’ot  tenke hases an hosi fatin risku sira hanesan mota ninin, foho lolon, ai-hun bo’ot, liña eletrisidade, rai dokumentu importante iha fatin seguru.

APC husu komunidade bainhira iha kazu emerjénsia ruma, tenke halo tuir orientasaun Autaoridade lokál no protesaun sivil ne’ebé besik karik presiza halo evakuasaun, mantein kalma, buka fatin seguru no evita pániku.

 Jornalista Estajiáriu: Lázaro Pereira Quefi