Hatutan.com, (22 Janeiru 2025), Díli—Kada tinan, Governu rezerva fundu millaun $2 hodi indemniza komunidade afetadu hosi eviksaun. Nune’e, Ministériu Obras Públika (MOP) rekolla hotu ona dadus no dokumentu komunidade afetadu eviksaun iha área Fomento II to’o Bebnonuk hodi bele indemniza sira iha tempu badak.

Lee Mós: Governu Seidauk Fó Indenizasaun bá Komunidade Afetadu Eviksaun SEATOU

Ministru Obras Públiku (MOP), Samuel Marçal. Foto/Tome da Silva

Dadus ne’ebé Governu liuhosi Ministériu Obras Publika (MOP) rekolla hosi komunidade afetadu eviksaun iha Fomento II to’o Bebonuk porvolta uma-kain 200 ka 300.

“Komunidade afetadu eviksaun iha Fonteto II ho Bebonuk nia dadus, hanesan númeru konta bankária no  kartaun eleitorál  rekolla hotu ona, agora sei ajusta hela iha sistema,” Ministru Obras Públika, Samuel Marçal informa hodi responde jornalista sira iha Palásiu Governu, Kuarta (22/01/2025).

Governu rekoñese katak  iha  situasaun balun Governu  hasai komunidade ho urjente, maibé iha parte balun SEATOU fó ona notifikasaun antes fulan hira ba kotuk, liu-liu komunidade hanesan  iha mota-ibun ne’ebe ameasa tebes.  Mézmu nune’e, Governu la hasai de’it maibé Governu sei rekupera fali sira nia sasán sira ne’ebe sira lakon.

Dau-daun ne’e MOP halo esforsu no hein katak komunidade afetadu eviksaun sira-nia konta bankária submete hotu ona, nune’e bele hahú pagamentu.

Kana-bá komunidade afetadu eviksaun iha área Bidau Santana, Rai Kotuk ho Aitarak-Laran, Ministru Samuel Marçal hateten, selu hotu ona sira-nia diretu indenizasaun.

Jornalista: Leopoldina de Carvalho