Hatutan.com, (23 Janeiru 2025), Díli—IX Governu Konstitusionál ne’ebé lidera hosi Primeiru-Ministru (PM), Kay Rala Xanana Gusmão, estabelese ona feriadu nasionál sira ho total  loron 18 iha tinan tomak 2025 nian.

Reuniaun Konsellu Ministru.Foto/Dok

Sita hosi portal  ofisial Governu Timor-Leste (timor-leste.gov.tl) edisaun 22 Janeiru 2025, katak feriadu sira ho data fiksu no data variavel nian determina husi Lei númeru 10/2005, loron 10 fulan-agostu, feriadu sira ba tinan 2025 ho total loron 18 maka hanesan tuir mai ne’e;

1. Loron 1 fulan-janeiru – Loron Tinan-Foun nian (feriadu ho data fiksu);
2. Loron 3 fulan-marsu – Loron Veteranu sira nian (feriadu ho data fiksu);
3. Loron 31 fulan-marsu – Idul-Fitri (feriadu ho data variavel);
4. Loron 18 fulan-abril – Sesta-Feira Santa (feriadu ho data variavel);
5. Loron 1 fulan-maiu – Loron Mundiál Serbisu-na’in sira nian (feriadu ho data fiksu);
6. Loron 20 fulan-maiu – Loron Restaurasaun Independénsia nian (feriadu ho data fiksu);
7. Loron 6 fulan-juñu – Idul Adha (feriadu ho data variável);
8. Loron 19 fulan-juñu – Festa Korpu de Deus (feriadu ho data variável);
9. Loron 30 fulan-agostu – Loron Konsulta Populár nian (feriadu ho data fiksu);
10. Loron 1 fulan-novembru – Loron Santu sira Hotu nian (feriadu ho data fiksu);
11. Loron 2 fulan-novembru – Loron Matebian sira nian (feriadu ho data fiksu);
12. Loron 3 fulan-novembru – Loron Nasionál Feto (feriadu ho data fiksu);
13. Loron 12 fulan-novembru – Loron Nasionál Foin-Sa’e sira nian (feriadu ho data fiksu);
14. Loron 28 fulan-novembru – Loron Proklamasaun Independénsia nian (feriadu ho data fiksu);
15. Loron 7 fulan-dezembru – Loron Memória nian (feriadu ho data fiksu);
16. Loron 8 fulan-dezembru – Loron Nossa Senhora da Imaculada Conceição, mahein Timor-Leste nian (feriadu ho data fiksu);
17. Loron 25 fulan-dezembru – Loron Natál (feriadu data fiksu nian);
18. Loron 31 fulan-dezembru – Loron Eroi Nasionál sira nian (feriadu data fiksu nian).

Lei númeru 10/2005, loron 10 fulan-agostu nian, atu fó hanoin fila-fali, mak estabelese rejime jurídiku kona-bá feriadu sira, data ofisiál komemorativa sira no toleránsia pontu, no altera ona ho lei nnúmeru 3/2016, loron 25 fulan-maiu no Lei nnúmeru  10/2023 loron 5 fulan-abríl, ne’ebé halo ona alterasaun balu ho hanoin atu rekoñese data istórika sira kona-ba Luta ba Ukun Rasik an no mós ba rekoñesimentu Feto nia papel iha sosiedade timoroan.

Jornalista: Vito Salvadór