Hatutan.com, (24 Janeiru 2025), Díli– Parlamentu Nasionál (PN) sei eskolla nia kandidatu na’in-rua atu reprezenta Parlamentu Nasionál ba iha Konsellu Imprensa Timor-Leste.

Prezidente PN, Maria Fernanda Lay. Foto/Hatutan.com

Konsellu Imprensa pesóa koletiva ida ne’ebé iha direitu públiku, ho natureza entidade administrativa independente, hetan autonomia administrativa, finanseira no iha patrimóniu rasik, no define ho independénsia kona-bá orientasaun ba ninia atividade sira sein sujeita ba kualkér diretriz ka orientasaun hosi podér polítiku.

Konsellu Imprensa ne’e kompostu hosi membru na’in-lima, ne’ebé hili tuir Lei Komunikasaun Sosiál nian ho nia dezignasaun hanesan tuir mai:

1. Reprezentante na’in-rua hosi jornalista ne’ebé sira hili, liuhosi eleisaun;
2. Reprezentante na’in-ida hosi órgaun komunikasaun sosiál (mídia),hili husi sira, liu husi eleisaun;
3. Sidadaun na’in-rua ho idoneidade rekoñesidu no méritu profisionál, prefere liu iha ligasaun ho mídia ka peritu mídia no ida husi sira jurista ka advogadu

Prezidenti Parlamentu Nasionál (PPN), Maria Fernanda Lay, Sesta (24/01/2025), Parlamentu Nasionál  sei eskolla kandidatu hodi aprezenta bá konsellu imprensa tuir rekizitu lei Komunikasaun Sosiál.

“Ha’u hanoin membru sira atuál sei mantein no atu troka ami sei fó nian kandidatu antes fulan-Fevereiru tomada posse. Iha lidér Bankada mós ko’alia ona kandidatu iha ona, agora entre kandidatu ne’e ami sei eskolla no ida-ne’e tenke  ko’alia bá malu entre Bankada sira,” PPN Maria Fernanda Lay  haktuir.

“Iha ne’ebá iha regra no rekizitu,  labele foti ema arbiru de’it. Rekizitu ida mak;  ida nia tenke jurista no  ida  komprende bá servisu mídia nian. Tanba Membru konsellu Imprensa ne’e atu bá fiskaliza mídia hotu-hotu inklui jornalista sra,” PPN Maria Fernanda Lay.

Prezidenti Parlamentu Nasionál Maria Fernanda Lay informa mós katak posibilidade prazu tomada pose ba membru foun Konsellu Imprensa períodu 2025-2029 sei   iha akontese fulan-Marsu 2025.

Kandidatu poténsia Na’in-haat

Informasaun seluk ne’ebé Hatutan.com simu hosi fontes oioin no sai diskusaun iha entidade mídia ho jornalista sira katak daudaun ne’e iha pesoál na’in-haat (4) mak sira-nia naran no dokumentu sira submete ona ba iha Bankada  Parlamentár nian, mak hanesan

1. Benevides Correia Barros, atuál membru KI ho espesialidade iha área jurídiku ka jurista
2. Isabel M.F de Jesus, atuál membru KI
3. Miquito Faluxai atuál asesór ida iha Sekretaria Estadu Komunikasaun Sosiál (SEKOMS)  
4. Ato “Lekinawa” Costa, atuál Xefe Redasaun Mídia online RENETIL, Noen Metin

Iha fulan-Dezembru liubá Konsellu Imprensa organiza ona eleisaun ba hili reprezentante jornalista na’in-rua ba Konsellu Imprensa períodu 2025-2029 mak hanesan António Cesar Mali, jornalista no korrepndente Kiyodo News iha Timor-Leste ho Joaquim Qoutinho, jornalista hosi Radiu Komunidade Maubisse. 

Iha fulann hanesan Konsellu Imprensa mós organiza konférensia orgaun komunikasaun sosiál sira ne’ebe rejistu hia KI hodi hili nia reprezentante ida ba KI mak Suzana Cardoso nu’udár na’in ba mídia online OneTimor.  

Jornalista Estajiária: Zita Menezes